«ԹՈՒՐՔԻԱՆ ՄԵԶՄԷ ՎԱԽՆԱԼՈՒ ՊԱՏՃԱՌ ՉՈՒՆԻ». Կ’ԸՍԷ ՔԻՒՐՏ ՂԵԿԱՎԱՐ ՄԸ

0
130

 Սուրիոյ մէջ քրտական Ժողովրդային պաշտպանութեան խմբակներու հրամանատար Սիփան Հեմօ, որուն ուժերը վերջերս հիւսիսային Սուրիոյ մէջ իսլամական խմբաւորումներու հետ բախումներուն ընթացքին որոշ շրջաններ գրաւեցին, յայտնեց, թէ Թուրքիան շրջանի քրտական ուժերէն վախնալու պատճառ չունի՝ նշելով, որ ծայրայեղ իսլամական խմբակներն են իսկական վտանգը: Հեմօ աւելցուց. «Հակառակ ըսուածին, մենք մեզ թուրք ժողովուրդին բարեկամները կը նկատենք»:
Ան նշեց, որ իր ղեկավարած ուժերը շրջանին մէջ զօրակցած են անոնց, որոնք ժողովրդավարութեան կը նպաստեն՝ աւելցնելով, թէ «իսլամ արմատականութեան յաղթանակը շրջանին համար աղէտ մը պիտի ըլլայ»:
Հեմօ շեշտեց նաեւ, թէ Թուրքիա քրտական դրօշին բարձրացումը հարց մը պէտք չէ նկատէ եւ թէ «Թուրքիան անհանգստացնողը այն իրողութիւնն է, որ քիւրտերը քրտական շրջանը կը ղեկավարեն»:
Սուրիոյ տագնապին նկատմամբ քիւրտերու կեցուածքին անդրադառնալով՝ Հեմօ ըսաւ, որ քիւրտերը չէզոք դիրքի վրայ են, եւ աւելցուց, որ քիւրտերը միայն Սուրիոյ քրտական շրջանը կրնան պաշտպանել:
Թուրքիոյ արտաքին գործոց նախարար Ահմէտ Տաւուտօղլու վերջերս անուղղակի կերպով զգուշացուցած էր Սուրիոյ մէջ քրտական ինքնավար շրջան մը հաստատելու գաղափարէն՝ նշելով, որ միակողմանի քայլերու հետեւանքով՝ Սուրիոյ տագնապը կրնայ բազմակողմանի պատերազմի վերածուիլ:
Նշենք, որ Թուրքիոյ խորհրդարանը Յուլիս 24-ին վաւերացուց թրքական բանակին՝ արտասահմանի մէջ զինուորական գործողութիւններ կատարել լիազօրող փաստաթուղթ մը:

LEAVE A REPLY

Please enter your comment!
Please enter your name here