ԱՄԵՐԻԿԵԱՆ ԲԱՆԱԿԻ ՇՏԱՊԻ ՊԵՏԸ ԿԸ ԶԳՈՒՇԱՑՆԷ ՍՈՒՐԻՈՅ ՄԷՋ ԶԻՆՈՒՈՐԱԿԱՆ ՄԻՋԱՄՏՈՒԹԵԱՆ ՀԵՏԵՒԱՆՔՆԵՐԷՆ

0
111

 Միացեալ Նահանգներու բանակի  միացեալ ուժերու  շտապի պետ զօր. Մարթին Տեմփսի դարձեալ  յայտնեց, որ ինք կը զգուշանայ Սուրիոյ մէջ զինուորական միջամտութեան ընտրանքէն՝ մեկնելով այն մտավախութենէն, որ չսերտուած որեւէ քայլ կրնայ պատճառ դառնալ, որ Սուրիա ձախողած պետութեան վերածուի:
Զօր. Տեմփսի լրագրողներուն յայտնեց. «Զինուորական լուծումի յանձնարարական մը ներկայացնելէ առաջ պէտք է համոզուիմ, որ զինուորական ընտրանքէն ետք եկողը պիտի չառաջնորդէ ձախողած պետութեան մը, որուն մէջ տառապանքը ներկայէն աւելի վատ կ՛ըլլայ»:
Զօրավար Տեմփսի նաեւ ըսաւ, որ քաղաքական ղեկավարները զինուորականին կողքին նաեւ այլ ընտրանքներ պէտք է քննարկեն: «Չեմ ըսեր, թէ միջազգային ընտանիքը ոչինչ պէտք է ընէ, այլ կ՛ըսե՛մ՝ դուք պէտք ունիք ռազմավարութեան մը, որ զինուորական ընտրանքը ուժի այլ միջոցներու կը կապէ»»:
Ռազմական  գետնի վրայ, ծայրայեղականները  Խան Ալ Ասալ գիւղաքաղաքին վրայ յարձակում գործելով՝ փակեցին  Հալէպի պաշարուած թաղամասերը սննդեղէնով մատակարարելու միակ ճամբան: Անոնք նաեւ սպաննեցին   41  քաղաքացիներ:
Սուրիական բանակը յառաջախաղացք կ’արձանագրէ Հոմս քաղաքին մէջ տեղի ունեցող ճակատամարտին:

 

LEAVE A REPLY

Please enter your comment!
Please enter your name here