ՀՐԱՆԴ ՏԻՆՔ ՊԻՏԻ ԴԱՌՆԱՅ ՀԱՄԵՐԳԻ ՀԵՐՈՍ

0
103

Թուրք ազգայնամոլներու կողմէ Յունուար  2007-ին  սպաննուած Հրանդ Տինք պիտի դառնայ աշխարհահռչակ «Փինք Ֆլոյտ» խումբի հիմնադիրներէն՝ Ռաճըր Ուոթըրզի՝ Պոլսոյ մէջ հրամցնելիք համերգին գլխաւոր հերոսներէն մէկը: Աշխարհի ամենայայտնի երաժիշտներէն մէկը հանդիսացող Ուոթըրզ իր եւրոպական շրջագայութեան ընթացքին կը ներկայացնէ «Փինք Ֆլոյտ»ի ամենայայտնի գործը՝ «The Wall»ը (Պատը, 1979):
Ըստ թրքական մամուլին՝ 4 Օգոստոսին կայանալիք համերգին համար, Պոլսոյ մէկ մարզադաշտին մէջ կը պատրաստուի 120 մեթրնոց պատ մը, որուն վրայ պիտի փակցուին Հրանդ Տինքի, ինչպէս նաեւ 1993-ին Թուրքիոյ մէջ սպաննուած մէկ այլ լրագրողի՝ Ուղուր Մումճուի լուսանկարները, մարդկային իրաւանց պաշտպան միջազգային շարք մը այլ գործիչներու կողքին: Թուրքիայէն այլ դէմք մը պիտի ըլլայ վարչապետ Ատնան Մենտերեսը, որ 1960-ին մահապատիժի ենթարկուեցաւ պետական յեղաշրջում իրականացուցած զինուորականներու կողմէ:
Ի դէպ, չի բացառուիր, որ Ուոթըրզի Պոլսոյ համերգը սահուն կերպով վերածուի Յունիսին Թուրքիոյ մէջ սկսած հակակառավարական բողոքի ցոյցերուն շարունակութեան՝ նկատի ունենալով, որ «Կեզի» զբօսայգիին մէջ սկսած բողոքի ցոյցերէն քանի մը օր ետք, սոյն երաժիշտը հանդէս եկած էր բաց նամակով՝ ի նպաստ թուրք երիտասարդութեան:
«Ձեր կողքին եմ, մենք բոլորս ձեր կողքին ենք: Դուք շատ իրաւացի էք, երբ կը դիմադրէք մենատիրութեան եւ բռնաճնշումներուն: Թուրքիան ձեր երկիրն է եւ մենք կ՛աջակցինք ազատութեան համար մղուող ձեր պայքարին: Միաժամանակ, դուք պէտք է գիտակցիք, թէ որքա՛ն կարեւոր է ձեր պայքարը ամբողջ աշխարհին համար», նշած էր Ուոթըրզ իր բաց նամակին մէջ:

 

LEAVE A REPLY

Please enter your comment!
Please enter your name here