ԼԻԲԱՆԱՆԵԱՆ ԿԱՐՃ ԼՈՒՐԵՐ

0
142

– Մուսթաքպալ Հոսանքը յառաջիկայ  Ուրբաթ, 2 Օգոստոսին միաժամանակ  վեց  «իֆթար»ներ պիտի կազմակերպէ  Պէյրութի, Թրիփոլիի, Սայտայի  եւ  լիբանանեան այլ  շրջաններու մէջ:«Իֆթար»ներու  ընթացքին, հեռարձակուող  հաղորդակցութեան միջոցաւ խօսք պիտի առնէ նախկին վարչապետ Սաատ Հարիրին:

– Ապահովական աղբիւրներ կը հաղորդեն, թէ շէյխ Օսման Հանինա  սկսած է համախմբել Ահմէտ Ասիրի հետեւորդները: Ականատեսները կը յայտնեն, թէ Սայտայի Պիլալ Պըն Ռապահ մզկիթը,  երեկոյեան ուշ ժամերուն, ժողովատեղիի  վերածուած է  Ասիրի կողմնակիցներուն համար:

– Երեսփոխանուհի Պահիա Հարիրի, Շաբաթ օր, «Իֆթար» մը պիտի կազմակերպէ Պիէլի մէջ , ի պատիւ լիբանանեան  բանակի հրամանատար զօրավար  Ժան Քահուաճիի՝  բանակի   տօնին առիթով:  Հարիրի, երէկ  այցելութիւն մը տուաւ մարոնի համայնքի Պէյրութի  Պուլոս Մաթար եպիսկոպոսին:

– Հետապնդումի տակ գտնուող երգիչ Ֆատէլ Շաքէր անակնկալօրէն  այցելած է  Սայտայի  մէկ հիւանդանոցը եւ բուժման  ենթարկուելէ ետք, անմիջապէս  փախուստ տուած է իր թաքստոցը, որ շատերու կարծիքով Այն Հելու  գաղթակայանն է:

– Իսրայէլեան  բանակի  շտապի պետ, զօրավար  Պենի Կանց  զգուշացուց  լիբանանեան  կառավարութիւնը՝ Սուրիոյ   հակամարտութեան  միջամուխ դառնալու հետեւանքներէն:

– Մարոնիներու Պշարա Ռայի  գարտինալը  Կիրակի  օր այցելեց  Զահլէ եւ  հանդիպում մը ունեցաւ  շրջանի,արեւմտեան Պեքաայի եւ Ռաշայի երեսփոխաններուն, ինչպէս նաեւ  քաղաքական, հոգեւոր  ներկայացուցիչներուն հետ:  Ռայի իր  պատգամին մէջ միասնականութեան եւ  հաշտութեան կոչ ուղղեց  քաղաաքկան բոլոր կողմերուն:

– Ելեկտրականութեան  ընկերութեան սարակները նստացոյց մը կազմակերպեցին  ընկերութեան կեդրոնին առջեւ, պահանջելով իրենց իրաւունքները: Անոնք  քանի մը  ժամ  փակ  պահեցին ընկերութեան գլխաւոր  մուտքը:

-Ներքին գործոց  նախարար  Մարուան Շերպէլ դիտել տուաւ, թէ  Հըզպալլա պաշտօնապէս   ճանչցուած  քաղաքական  կուսակցութիւն մըն է, միաժամանակ՝ Դիմադրութեան կուսակցութիւն: Նախարարը  շեշտեց, որ Հըզպալլայի  մասնակցութիւնը  նոր կառավարութեան մէջ  կենսական է Լիբանանի համար:

-Հաւատարմութիւն Դիմադրութեան  խորհրդարանական  խմբաւորումի պետ Մուհամմէտ  Ռաատ  ըսաւ, թէ  կառավարութիւն  չի կրնար կազմուիլ, առանց Հըզպալլայի մասնակցութեան: Ռաատ աւելցուց, թէ  Հըզպալլա իր  բոլոր  դաշնակիցներուն հետ   մաս պիտի  կազմէ նոր կառավարութեան:

LEAVE A REPLY

Please enter your comment!
Please enter your name here