ՄԱՐԶԱԿԱՆ – ՏՈՐԹՄՈՒՆՏ ՇԱՀԵՑԱՒ ՍՈՒՓԸՐ ԳԱՓԸ

0
156

 Պորուսիա Տորթմունտի եւ  Գերմանիոյ ախոյեան  Պայերն Միւնիխի միջեւ աւանդական «Սուփըր Գափ»ի մրցումը  աւարտեցաւ   Տորթմունտի  յաղթանակով՝ 4-2: Տորթմունտի մարզիչ  Եուրկէն Կլոպ առաջին յաղթանակը տօնեց Պայերն  Միւնիխի  նորեկ մարզիչ  Խօսէփ  Կուարտիոլայի դէմ:  Տորթմունտի  կազմէն  վնասուածքի պատճառով կը  բացակայէր  Հայաստանի հաւաքականի կիսապաշտպան  Հենրիխ Մխիթարեանը:

Մրցումէն  ետք,  Պայերնի  մարզիչ Խօսէփ  Կուարտիոլա  յայտնեց, թէ Պայերն պիտի  ուղղէ իր սխալները:« Մենք պարտուեցանք 4-2  արդիւնքով, սակայն  չեմ կարծեր որ  Տորթմունտի  ֆութպոլիստները շատ աւելի զօրաւոր էին».յայտարարեց ան: Իսկ  Տորթմունտի մարզիչ  Եուրկէն Կլոպ ըսաւ, թէ Տորթմունտ միշտ ալ ունեցած է  Պայերնին յաղթելու ցանկութիւն:

Կ’արժէ նշել, որ մրցումի 70-րդ վայրկեանին, զայրացած Կուարտիոլա՝ ապտակեց  կիսապաշտպան  Թիակօ Ալքանթարային: Պայերնի  տնօրէնութիւնը խումբին կրած պարտութենէն   ետք,  մտադրած է  հետապնդել Չելսիի  պրազիլիացի  յետսապահ Տաւիտ Լուիզը: Գերմանական ակումբը պատրաստ է  40  միլիոն եուրօ վճարելու  26-ամեայ   յետսապահին ստորագրութեան համար:

 

ՌԷԱԼ  ՊԱՐՏՈՒԹԵԱՆ ՄԱՏՆԵՑ  ՓԱՐԻ  ՍԷՆ  ժԵՐՄԷՆԸ

Ֆութպոլի  միջազգային բարեկամական  մրցումի մը  ընթացքին, Ռէալ  Մատրիտ  1-0 արդիւնքով պարտութեան մատնեց  Փարի  Սէն  Ժերմէնը:  Մրցումին միակ կոլը 23-րդ վայրկեանին նշանակեց  Քարիմ  Պենզեման: Ռէալի  միջնապահներէն Քաքա յայտնեց,թէ մարզասէրները  գեղեցիկ ֆութպոլ դիտելու առիթ ունեցան: Իսկ  Սէն Ժերմէնի յարձակող  Զլաթան  Իպրահիմովիչ  յայտարարեց, թէ  Քրիսթիանօ  Ռոնալտօ կը մնայ աշխարհի  լաւագոյն յարձակողներէն  մէկը:

Միւս  կողմէ,  Ռէալ  Մատրիտի   միջնապահ  Սեմի Խետիրա  մտադրած  է  հեռանալ  սպանական ակումբէն:  Չելսի եւ  Մոնաքօ   հետաքրքրուած են  26-ամեայ   Խետիրայի  ծառայութիւններով:

ՎԱԼԵՆՍԻԱ – ՄԻԼԱՆ՝ 1-2

Սպանիոյ  Մեսթալիա մարզադաշտին մէջ, ֆութպոլի բարեկամական մրցումի մը ընթացքին, Ա.ՍԷ.  Միլան  2-1 արդիւնքով պարտութեան մատնեց տեղւոյն  Վալենսիան:  Ռուպինիօ եւ Տէ Եոնկ նշանակեցին  Միլանի կոլերը,  Պարեխօ՝  Վալենսիայի:

ՄՈՒՐԻՆԻՕ ԿԸ ՓԱՓԱՔԻ ԱՇԽԱՏԻԼ ԻՊՐԱՀԻՄՈՎԻՉԻ ՀԵՏ

Բրիտանական «Տը Սան» օրաթերթին քաղած  տեղեկութիւններուն համաձայն՝  Լոնտոնեան Չելսիի  ղեկավարութիւնը կ’ուսումնասիրէ Փարի Սէն Ժերմէնի յարձակող  Զլաթան  Իպրահիմովիչի հետ պայմանագրութիւն կնքելու կարելիութիւնները:  Չելսիի մարզիչ  Ժոզէ Մուրինիօ ցանկութիւն յայտնած է  աշխատելու   Իպրահիմովիչի հետ:   Մուրինիօ պատրաստ է  Իպրահիմովիչի  փոխանցումին դիմաց  Ֆեռնանտօ Թորէզը առաջարկել  ֆրանսական ակումբին:

Հաւանական է, որ   յառաջիկայ օրերուն բանակցութիւնները սկսին երկու ակումբներուն միջեւ:

ՖԱԼՔԱՕ  ԱՄՍԱԿԱՆ 1.5  ՄԻԼԻՈՆ ԱՇԽԱՏԱՎԱՐՁ  ԿԸ ՍՏԱՆԱՅ

Ֆրանսական մարզաթերթերուն համաձայն՝ Աթլեթիքօ Մատրիտէն  Մոնաքոյի  միացած Ռատամէլ Ֆալքաօ ամսական  մէկուկէս միլիոն եուրօ աշխատավարձ կը ստանայ  ֆրանսական ակումբէն:

Նշենք, թէ Ֆալքաօ փոխան վաթսուն միլիոն եուրօ  գումարի միացաւ Մոնաքոյի:

ՖԱՊՐԵԿԱՍ ԿԸ ՍՊԱՍԷ  ՊԱՐՉԵԼՈՆԱՅԻ ՄԱՐԶԻՉԻՆ…

 Պարչելոնայի կիսապաշտպան Սեսկ Ֆապրեկաս մտադրած է իր ասպարէզը շարունակել սպանական խումբին հետ, եթէ  նոր մարզիչ  Ճերարտօ  Մարթինօ վստահութիւն յայտնէ սպանացի ֆութպոլիստին:

Անգլիական Մանչեսթըր Եունայթըտ խումբը կը փափաքի իր կազմին մէջ ունենալ 26-ամեայ  կիսապաշտպանը, որուն համար պատրաստ է վճարելու  36  միլիոն սթերլին գումար մը:  Ֆապրեկաս կը սպասէ  Պարչելոնայի նոր մարզիչին պատասխանին:

 

ԼԻՎԸՐՓՈՒԼ ՄԻԱՅՆ  50  ՄԻԼԻՈՆ ՍԹԵՐԼԻՆԻ  ՓՈԽԱՐԷՆ ՊԱՏՐԱՍՏ Է ՀՐԱԺԱՐԵԼՈՒ ՍՈՒԱՐԷԶԷՆ

Լոնտոնի Արսենալ  մէջ  ջանքեր կը թափէ իր կազմին մէջ  ունենալու  Լիվըրփուլի եւ Ուրուկույէի  հաւաքականի  յարձակող Լուիս Սուարէզը: 26-ամեայ  ֆութպոլիստը  կը  փափաքի «Չեմփիընզ Լիկ»ի մասնակցող ակումբի մը հետ շարունակել իր ասպարէզը: Լիվըրփուլ կը մերժէ  հրաժարիլ Սուարէզէն: Այդ պատճառով ալ  Սուարէզի փոխանցումին համար ճշդած է  նուազագոյնը  յիսուն միլիոն սթերլին գումար մը:

Լիվըրփուլի մարզիչը՝  Պրենտըն Ռոճըրզ  երէկ  յայտարարեց, թէ  Սուարէզ պիտի  չլքէ ակումբը:

ՇՈՒԱՅՆՇԹԱՅԿԸՐ  ԳԵՐՄԱՆԻՈՅ  ԼԱՒԱԳՈՅՆ ՖՈՒԹՊՈԼԻՍՏԸ’

 Գերմանիոյ  ազգային խումբի եւ Պայերն  Միւնիխի  միջնապահ  Պասթիան Շուայնշթայկըր  ընտրուեցաւ  ընթացիկ մարզաշրջանի Գերմանիոյ լաւագոյն  ֆութպոլիստը: Սոյն  մրցանակը Գերմանիոյ մէջ հաստատուած է 1960-ին՝ լրագրողներու եւ  Kicker  ամսաթերթի համագործակցութեամբ:

Շուայնշթայկըր ստացաւ 92  ձայն,  երկրորդ  տեղը՝ 87 ձայնով գրաւեց  Ֆրանք Ռիպերին:

ԵՈՒՆԱՅԹԸՏ ՄԷԿ ՊԱՅՄԱՆՈՎ ԿԸ ՀՐԱԺԱՐԻ ՌՈՒՆԻԷՆ’

 Բրիտանական «Տէյլի  Միրըր»  օրաթերթը կը գրէ, թէ Մանչեսթըր Եունայթըտ մէկ պայմանով պատրաստ է հրաժարելու Ուէյն Ռունիէն, եթէ  վերջինս  եւրոպական ակումբ մը  ընտրէ միանալու: «Կարմիր Սատանաներ»ու տնօրէնութիւնը կը  մերժէ անգլիական  որեւէ  ակումբի  վաճառել Ռունին:   Չելսի եւ  Արսենալ կը  փափաքին իրենց կազմին մէջ  ունենալ 27- ամեայ  ֆուփպոլիստը:

Մանչեսթըր  Եունայթըտ ակումբի երեւելի դէմքերէն՝ Սըր Պոպի Չարլթըն  յայտարարեց, թէ  Ռունի պիտի մնայ Օլտ Թրեֆորտի ակումբին հետ եւ նոր տիտղոսներ ապահովէ իր խաղընկերներուն:

ԼԻՎԸՐՓՈՒԼ ՅԱՂԹԵՑ ԹԱՅԼԱՆՏԻ  ՀԱՒԱՔԱԿԱՆԻՆ

Ֆութպոլի  բարեկամական մրցումի մը  ընթացքին, Լիվըրփուլ՝ 3-0 արդիւնքով պարտութեան մատնեց Թայլանտի  հաւաքականը:  Ֆելիփէ  Քութինիօ, Եագօ Ասփաս եւ Սթիվըն Ճերարտ նշանակեցին «Կարմիրներ» ուն կոլերը:

ԼՈՒԻՍ  ՀԵՄԻԼԹԸՆ ՇԱՀԵՑԱՒ ՀՈՒՆԳԱՐԻՈՅ ԿՐԱՆ ՓՐԻՆ

 Մերսետես  Ինքնաշարժի վարորդ  Լուիս Հեմիլթըն  շահեցաւ Ֆորմիւլա 1  ինքնաշարժներու Հունգարիոյ Կրան Փրին:  Քիմի Ռայքոնէն  գրաւեց երկրորդ դիրքը: Աշխարհի ախոյեան Սեպասթիան  Վեթէլ  գոհացաւ երրորդ դիրքով:

ՕԶՊԻԼԻՍ  ՄԻԱՑԱՒ ՍՊԱՐՏԱԿԻ

 Հայաստանի  հաւաքականի կիսապաշտպան  Արազ Օզպիլիս հինգ տարուան պայմանագրութիւն  մը կնքեց  Մոսկուայի Սպարտակին հետ: Նշենք, թէ Հայաստանի  հաւաքականի երկու  այլ  անդամներ՝ Եուրա Մովսէսեան եւ  Ռոման  Փերեզովսքի նոյնպէս կը կրեն  Սպարտակի  շապիկը:

 

ՊՈԼԹ՝ 100 ՄԵԹՐ ՎԱԶՔԻ ԱՇԽԱՐՀԻ  ԼԱՒԱԳՈՅՆԸ

Ողիմպիական խաղերու   վեցեակի ախոյեան,  100  եւ  200  մեթր   վազքի աշխարհի  մրցանիշակիր  Ուզէյն Պոլթ  յաղթանակա մը եւս արձանագրեց Լոնտոնի մէջ մեկնարկաղ »Ադամանդէ Լիկայի   հարիւր  մեթր վազքի մրցումներուն:  Արդարեւ,  Ճամայիքացի  աթլեթը  9.85 երկվայրկեանէն հատեց    հարիւր  մեթրը:  ամերիկացի  Մայք Ռոճըրզ՝ 9.98 գրաւեց երկրորդ  դիրքը:

ՌԷԱԼ   ՄԱՏՐԻՏ  81  ՄԻԼԻՈՆ  ՍԹԵՐԼԻՆ Կ’ԱՌԱՋԱՐԿԷ  ՊԷՅԼԻ  ՀԱՄԱՐ

Ռէալ Մատրիտ ակումբը  պատրաստ է  81 միլիոն սթերլին  գումար մը  վճարելու  Թոթենհամի   միջնապահ   Կարէթ  Պէյլի  ստորագրութեան համար: Անգլիական ակումբը   կը պահանջէ 100  միլիոն: Նշենք, թէ  24-ամեայ  Պէյլ՝  Թոթենհամի  տնօրէնութենէն պահանջած է   ընդառաջել Ռէալի  առաջարկին:

Սպանական ակումբը 2009-ին,  80  միլիոն սթերլին գումար մը վճարեց Մանչեսթըր Եունայթըտի  յարձակող  Քրիսթիանօ Ռոնալտօյի համար:

Ռէալ Մատրիտ  երէկ  մեկնեցաւ ամերիկեան շրջագայութեան:  Շրջագայութիւնը պիտի աւարտի  11 Օգոստոսին:

ՄԱՐԹԻՆԷԶ ԸՆԴՈՒՆԵՑ  ՆԱՓՈԼԻԻ ԱՌԱՋԱՐԿԸ

Փորթուգալական Փորթօ խումբի եւ  Գոլոմպիայի   հաւաքականի յարձակող  Ճեքսըն  Մարթինէզ ընդունեց  Նափոլիի միանալու առաջարկը:  Մարթինէզ տարեկան  երկու   միլիոն  եուրօ աշխատավարձ  պիտի ստանայ Նափոլիէն: Անոր փոխանումին համար, Նափոլի պիտի վճարէ 32  միլիոն  եուրօ գումար մը:

ԱՅԱՔՍ ՇԱՀԵՑԱՒ  ՀՈԼԱՆՏԱՅԻ   ՍՈՒՓԸՐ ԳԱՓԸ

Այաքս Ամսթերտամ դարձաւ  Հոլանտայի  «Սուփըր Գափ»ի տիտղոսակիրը: Մայրաքաղաքի  խումբը  3-2  արդիւնքով  պարտութեան  մատնեց Ալքմաարը:  Կ’արժէ նշել, որ   Այաքս  ութերորդ  անգամ ըլլալով կը շահէր Հոլանտայի  «Սուփըր  Գափ»ը:

ԳԵՐՄԱՆԻՈՅ  ԿԱՆԱՆՑ ՀԱՒԱՔԱԿԱՆԸ  ԵՒՐՈՊԱՅԻ ԱԽՈՅԵԱՆ

Գերմանիոյ կանանց հաւաքականը շահեցաւ Եւրոպայի ֆութպոլի ախոյեանութեան տիտղոսը: Եզրափակիչ  մրցումին,  Գերմանիա՝ 1-0  արդիւնքով պարտութեան մատնեց Նորվեկիան: Գերմանիոյ հաւաքականը  իններորդ անգամ ըլլալով կը նուաճէ սոյն  տիտղոսը:

ՏԻՈՒՔՈՎԻՉ ԿԸ ԳԼԽԱՒՈՐԷ ՀԱՄԱՇԽԱՐՀԱՅԻՆ  ԴԱՍԱՒՈՐՈՒՄԸ

Արհեստավարժ թենիսի  ֆետերասիոնը հրապարակեց   29  Յուլիսի դրութեամբ տղոց  թենիսի ընդհանուր դասաւորումը:  Սերպ  Նովաք Տիուքովիչ կը շարունակէ  գլխաւորել  համաշխարհային դասաւորումը: Երկրորդ դիրքի վրայ կու  գայ Էնտի Մըրէյը: Սպանացի Տաւիտ Ֆերէր կը  գտնուի   երրորդ դիրքի վրայ:

 

 

 

 

 

 

 

LEAVE A REPLY

Please enter your comment!
Please enter your name here