ՊԱՇՏՊԱՆՈՒԹԵԱՆ ԳԵՐԱԳՈՅՆ ԽՈՐՀՈՒՐԴԸ ՔՆՆԱՐԿԵՑ ԳԱՂԹԱԿԱՆՆԵՐՈՒ ԵՒ ԲԱՆԱԿԻՆ ԱՆՀՐԱԺԵՇՏՈՒԹԻՒՆՆԵՐԸ

0
101

Լիբանան կ’ապրի  քաղաքական տագնապ, որուն հետ  առնչութիւն չունի բանակը, սակայն  անմաս  չի  մնար քաղաքական տագնապին հակազդեցութիւններէն: Քաղաքական այս   թէժ  պայմաններուն  մէջ  Պաշտպանութեան Գերագոյն  Խորհուրդը  Պաապտայի պալատին մէջ  հանրապետութեան նախագահ  Միշէլ  Սըլէյմանի գլխաւորութեամբ գումարեց  նիստ մը: Նիստին մասնակցեցան  հրաժարեալ վարչապետ Նեժիպ Միքաթի,  պաշտպանութեան նախարար  ֆայէզ  Ղըսն,  ներքին գործոց նախարար Մարուան Շերպէլ,  ընկերային հարցերու նախարար Ուայէլ Ապու Ֆաուր,  գիւղատնտեսութեան նախարար  Հիւսէյն  Հաժ Հասան,  արտաքին գործոց նախարար Ատնան Մանսուր,   ելեւմտական հարցերու նախարար  Մուհամմէտ Սաֆատի, բանակի  ընդհանուր հրամանատար, զօրավար  Ժան Քահուաճի, ընդհանուր անվտանգութեան  ընդհանուր տնօրէն, հազարապետ Ապպաս Իպրահիմ, Պաշտպանութեան Գերագոյն Խորհուրդի  ընդհանուր քարտուղար, հազարապետ Մուհամմէտ  Խէյր  եւ  լիբանանեան բանակի  այլ բարձրաստիճան պաշտօնատարներ:

  Նախքան նիստը, հանրապետութեան նախագահը  կարճ խորհրդակցութիւն մը ունեցաւ  հրաժարեալ վարչապետ Նեժիպ Միքաթիի եւ պաշտպանութեան նախարար  Ֆայէզ Ղըսնի հետ:  Նիստի ընթացքին քննարկուեցան Լիբանանի մէջ ապաստանած սուրիացիներուն մարդասիրական օժանդակութիւն հայթայթելու,  Եւրոպական  Միութեան կողմէ  Հըզպալլայի  զինուորական թեւը ահաբեկչական կազմակերպութիւններու ցանկին մէջ  ներառնելու, Պեքաայի մէջ ապօրէն ցանքերը կանխարգիլելու, ինչպէս նաեւ երկրի ազգային անվտանգութեան  հետ առնչուած  հարցեր:

Սկզբունքով,  Պաշտպանութեան Գերագոյն  Խորհուրդի նիստերուն որոշումները կը մնան գաղտնի, սակայն լրատուական աղբիւրներ  հաղորդեցին, թէ  նիստի   ընթացքին  որոշուած է մէկ տարի   ժամկէով երկարաձգել բանակի հրամանատարին  պաշտօնավարութեան  ժամկէտը:  Զօրավար Ժան Քահուաճի, 23  Սեպտեմբերին պիտի  դառնայ  վաթսուն  տարեկան եւ պիտի կոչուի  հանգիստեան  ըստ՝  բանակի կանոնագրութեան:

Նիստը աւարտելէ ետք,  հանրապետութեան նախագահը, հրաժարեալ  վարչապետը,  պաշտպանութեան նախարարը եւ բանակի  ընդհանուր հրամանատարը  ունեցան կարճ   խորհրդակցութիւն  մը:   

 

LEAVE A REPLY

Please enter your comment!
Please enter your name here