ՄՈՐՍԻԻ ԿՈՂՄՆԱԿԻՑՆԵՐԸ ՎՃՌԱԾ ԵՆ ՇԱՐՈՒՆԱԿԵԼՈՒ ՀԱՒԱՔՆԵՐԸ

0
109

  Նախկին նախագահ Մոհամմէտ  Մորսիի  կողմնակիցները  հոծ   հաւաքներ  կատարեցին երէկ՝  երկրին  տարբեր  քաղաքներուն մէջ: Մորսիի կողմնակիցները կը մնան անդրդուելի, մինչեւ  անոր վերադարձը  նախագահի պաշտօնին: Միջազգային եւ շրջանային պետութիւններու կողմէ հակամարտութեան երկու կողմերուն  ուղղուած զգաստութեան  կոչերը  կը մնան  ապարդիւն: Ապարդիւն դուրս եկաւ նաեւ  Եւրոպական  Միութեան արտաքին  քաղաքականութեան գլխաւոր  բանագնաց  Քաթրին Աշթընի այցելութիւնը Եգիպտոս:  Աշթըն շարք մը  հանդիպումներ ունեցաւ նոր  իշխանութեան  եւ  Իսլամական Եղբայրակցութեան ներկայացուցիչներուն հետ: Ան երկու  ժամ տեւողութեամբ  հանդիպում մը ունեցաւ  բանակին կողմէ  ձերբակալուած  Եգիպտոսի նախկին նախագահ  Մոհամմէտ Մորսիի հետ:  Աշթըն հերքեց  Մորսիին քաղաքական անելէն դուրս  գալու վերաբերեալ   ծրագիր  մը  ներկայացուցած  ըլլալու  մասին տեղեկութիւնները: Ան  ջնջեց   փոխնախագահ Մուհամմէտ Ալ Պարատէյի հետ նախապէս որոշուած   միացեալ  մամլոյ ասուլիսը: Ան լրագրողներուն առջեւ  երկխօսութեան  կոչ ուղղեց  քաղաքական բոլոր հոսանքներուն եւ մեկնեցաւ:  Պարատէյ  յայտարարեց, թէ  Մոհամմէտ  Մորսի  ձախողած էր քաղաքական գետնի վրայ, սական Իսլամական Եղբայրակցութիւնը  երկրին  քաղաքական առօրեային  մէկ մասնիկն է:  Ֆրանսայի արտաքին գործոց նախարար  Լորան Ֆապիւս Մորսին ազատ արձակելու  կոչ ուղղեց  Եգիպտոսի  իշխանութիւններուն:

Ներքին  գործոց նախարարութիւնը  լոյս ընծայեց  հրամանագիր մը՝  Մորսիի կողմնակիցներէն պահանջելով  լքել  մայրաքաղաքի  գլխաւոր  հրապարակները:

Ապահովական  գետնի վրայ, Փոր Սայիտի Մար Ճըրճոս  եկեղեցւոյ առջեւ   բախումներ տեղի ունեցան  Մորսիի  հակառակորդներուն եւ կողմնակիցներուն միջեւ:  Երէկուան բախումներուն հաշուեյարդարը՝  31  զոհ,  367  վիրաւոր:

LEAVE A REPLY

Please enter your comment!
Please enter your name here