ՔԵՐՐԻ ԿԸ ՆԿԱՏՈՒԻ ԱՐՑԱԽԻ ՀԱՐՑՈՎ ՅԱՌԱՋԴԻՄՈՒԹԻՒՆ ԱՊԱՀՈՎՈՂ ԼԱՒԱԳՈՅՆ ԱՆՁԸ

0
115

Ղարաբաղեան տագնապի կարգաւորման աշխատանքները փակուղիէն դուրս պիտի գայ այն պահուն, երբ Միացեալ Նահանգներու պետական քարտուղար  Ճոն Քերրի կարենայ նախաձեռնել բարձր մակարդակի բանակցութիւններու՝ հակամարտող կողմերուն միջեւ, որպէսզի առանց նախապայմաններու լուծում մը գտնէ հակամարտութեան. այս մասին ամերիկեան «The National Interest» պարբերականին մէջ գրած է ամերիկացի վերլուծաբան Ալեքսանտր Փիթըրսըն:
«Քերրի, լուծէ՛ ղարաբաղեան հակամարտութիւնը» վերնագիրով իր յօդուածին մէջ հեղինակը կը բացատրէ, որ Ամերիկա Ատրպէյճանը կը համարէ իր դաշնակիցը եւ գործընկերը, մինչ Քերրի կը վայելէ Ամերիկայի հայութեան վստահութիւնը՝ նկատի ունենալով, որ ան երկար տարիներ եղած է մեծաթիւ հայ բնակչութիւն ունեցող Մեսաչուսեց նահանգը ներկայացնող ծերակուտականը:
Փիթըրսըն կը գրէ, թէ Ուաշինկթըն ցարդ չէ փափաքած միջամուխ ըլլալ ղարաբաղեան հակամարտութեան առջեւ դուռ բացած «խճճուած պատմութեան», «սակայն այսօր այդ հակամարտութիւնը, որ հեռու է «սառած» վիճակէն, կը սպառնայ շրջուիլ Ամերիկայի դէմ, եթէ ամերիկեան ղեկավարութիւնը առաւելագոյն ջանքեր չդնէ՝ զայն կարգաւորելու համար», կ՛աւելցնէ ան:
Ան նաեւ կը յայտնէ, թէ մինչ Միջին Արեւելքի մէջ ամերիկեան քաղաքականութիւնը յաջողութիւններ կը դիմագրաւէ, ղարաբաղեան հակամարտութեան մէջ բեկումը կրնայ դառնալ Ամերիկայի արտաքին քաղաքականութեան մեծագոյն յաջողութիւնը, որուն Օպամայի վարչակազմը ծայրայեղ կարիքն ունի:
«Նկատի առնելով Ռուսիոյ հետ վատթարացող յարաբերութիւնները՝ Ղարաբաղի մէջ իրավիճակը կրնայ օգտագործուիլ Միացեալ Նահանգներու շահերուն դէմ, ինչ որ բաղձալի չէ Ամերիկայի համար կարեւոր այդ տարածաշրջանին մէջ, որ սահմանակից է Իրանի եւ կրնայ կամուրջ մը հանդիսանալ Աֆղանիստանէն դաշնակից ուժերը դուրս բերելու գործողութեան», կը գրէ Փիթըրսըն:
Հեղինակը կ՛առաջարկէ ղարաբաղեան հակամարտութիւնը քննարկել ոչ թէ իբրեւ «խճճուած բազմամեայ տագնապ», այլ՝ ամերիկեան ներկայ վարչակազմին կողմէ ինքզինք դրսեւորելու հնարաւորութիւն: «Այսպիսի հնարաւորութիւն պէտք չէ կորսնցնել», եզրակացուցած է ան:

 

LEAVE A REPLY

Please enter your comment!
Please enter your name here