ԱՆԳԱՐԱ ԶԱՅՐԱՑԱԾ Է «ԹԱՅՄԶ»Ի ՄԷՋ ԷՐՏՈՂԱՆԸ ՔՆՆԱԴԱՏՈՂ ԲԱՑ ՆԱՄԱԿԷՆ

0
135

Արեւմտեան աշխարհէն բազմաթիւ արուեստագէտներ, գրողներ ու փաստաբաններ Լոնտոնի «Թայմզ» թերթին մէջ ամբողջ էջի մը վրայ բաց նամակ մը հրատարակեցին ու վարչապետ Ռեճէպ  Թայիփ Էրտողանը պարսաւեցին Կեզի  հանրապարտէզի ցոյցերուն ընթացքին տեղի ունեցած երիտասարդներու սպանութեան հարցով։ «Անոնք մեռան ձեր հրահանգով եւ ասիկա Սթրազպուրկի մէջ կրնայ դատի նիւթ դառնալ», գրուած էր այդ նամակին մէջ:
Ստորագրողները կ՛ըսեն, թէ հակառակ այն իրողութեան, որ հինգ անմեղ երիտասարդներ մահացած էին, Թուրքիոյ իշխող Արդարութիւն եւ Բարգաւաճում կուսակցութեան կառավարութիւնը Պոլսոյ մէջ կազմակերպեց Նիւրենպերկի մէջ կայացած հանրահաւաքները յիշեցնող հաւաքներ։
«Ձեր բանտերուն մէջ աւելի մեծ թիւով լրագրող կայ քան Չինաստանի ու Իրանի բանտերուն մէջ», ըսուած է նամակին մէջ, ուր դատապարտումի շարք մը այլ խօսքեր կան վարչապետ Էրտողանի հասցէին։
Ստորագրողներու շարքին էին գրագէտ, Աթաթիւրքի կենսագիր Էնտրու Մանկօ, բեմադրիչ Տէյվիտ Լինչ, դերասանուհի Վանեսա Ռետկրէյվ, դերասան Պեն Քինկզլի (որ նշանաւոր է իբրեւ Կանտին մարմնաւորած դերասան), դերասանուհի Սիւզան Սարանտըն եւ բազմաթիւ յայտնի ու հեղինակաւոր անձնաւորութիւններ։ Անոնց մէջ է նաեւ թուրք դաշնակահար Ֆազըլ Սայը, որ այս տարուան ընթացքին դատական հետապնդումի ենթարկուած էր՝ Թուրքիոյ մէջ ազատ արտայայտուելու իր իրաւունքը օգտագործելու համարձակութեան համար:
Նամակը  մեծ աղմուկ բարձրացուցած է Անգարայի մէջ։ Արդարեւ, Թուրքիոյ իշխող Արդարութիւն եւ Բարգաւաճում կուսակցութեան բանբեր Հիւսէյն Չելիք յայտարարութիւն մը ըրաւ ու ըսաւ, թէ այս նամակը ստորագրողները «ամբարտաւանութիւն» ի գործ դրած են իրենց այդ արարքով։ «Անոնք Սուրիոյ ու Եգիպտոսի մէջ պատահածներուն նկատմամբ ձայն չեն հանած, սակայն Թուրքիոյ խնդիրներուն միջամուխ կ՛ըլլան ու կառավարութեան վայելած ժողովրդականութեան շնորհիւ կայացած հանրահաւաքները հիթլերեան հանրահաւաքներու կը նմանցնեն», յայտարարած է Չելիք։
Դաշնակահար Ֆազըլ Սայ ըսաւ, որ նամակին կողմնակից է, որովհետեւ անիկա «պատգամ» մըն էր Թուրքիոյ կառավարութեան:

LEAVE A REPLY

Please enter your comment!
Please enter your name here