ՀԱՅՐԵՆԻՔԻ ՎԱՀԱՆԱԿԻՐԸ 68 ՏԱՐԵԿԱՆ ԴԱՐՁԱՒ

0
122

Այսօր  համայն  Լիբանանը  իր բոլոր  համայնքներով, քաղաքական  հոսանքներով  կը  տօնէ  հայրենիքի վահան՝  լիբանանեան բանակին  հիմնադրութեան   տարեդարձը:

Բանակի նուիրագործումը  ընձիւղուած է  հայրենիքի  գոյութեան հետ եւ՝  հակառակը: Գուրգուրալ բանակին, կը նշանակէ   պաշտպանել հայրենիքը:  Բանակն է  հայրենիքի  գերիշխանութեան, անոր բոլոր զաւակներուն անվտանգութեան հանապազօրեայ պաշտպանը:

Նախամարդէն  սկսեալ, մարդիկ, յետագային՝  ժողովուրդներ ապաւինած են  այն ուժերուն վրայ, որոնք  երաշխիք  դարձած են  իրենց գոյութեան եւ բարօրութեան: Պետութիւններու ձեւաւորման ընթացքին,  հաւաքականութիւններու  անվտանգութիւնը, երկրի սահմանները պաշտպանող ուժերուն տրուած է  բանակ եզրը:

 Բանակը կը մնայ  պետութեան մը,   ժողովուրդի  մը պաշտպանութեան  յենակէտը:   Օտար  ներխուժողներու եւ  միջամտութիւններու դէմ՝  փրկութեան լաստը: 

 Ազգեր, մեծ թէ փոքր,  կ’ապրին  շնորհիւ՝  հայրենատուր եւ  նուիրական շունչով, հայրենիքի  հողին հետ շաղախուած բանակի   բիւրաւոր  նահատակներու  արեամբ:

Երկիր մը, վարչական  ինչպիսի դրուածք ալ ունենայ՝ դեմոկրատական, միապետական, բռնատիրական, մենատիրական, միեւնոյնն է,  հայրենանուէր բանակին  միջոցաւ պիտի  պահպանէ իր  վարչակարգը եւ  սահմաններուն անվտանգութիւնը:  Բանակը կը մնայ   պետութիւններու յարատեւութեան գրաւականը: Բանակին արժանապատուութիւնը  միաժամանակ  ժողովուրդին արժանապատուութիւնն է:

Բանակի  տօնին առիթով հանդիսութիւնները  պիտի  աւարտին երեկոյեան  ժամերուն:  Խոստումներն ու մաղթանքները  թուղթի վրայ  կրնան  մնալ,  եթէ ոմանք  հակընթաց քայլերով, գիտակցաբար կամ՝ ոչ,   շարունակեն բանակը մխրճել ներքին   հակամարտութիւններու խորխորատը:  Բանակը  չի պատկանիր որոշակի   հաւաքականութեան,  ոչ ալ՝  համայնքի մը կամակատարն է ան: Բանակը պաշտպանն ու վահանակիրն  է  հարենիքին: Ամօթանք է պարզապէս, յարաբերական հաշիւներու թելադրութեան տակ, մնայուն  կշտամբանքի ենթարկել  բանակը եւ յանկարծ հերոսացնել զայն: Զինուորական կառոյցին հանդէպ հաւատարմութիւնը պիտի  ըլլայ ամբողջական: Մասնակի  մօտեցումները  կը մնան  խոտելի:

Բանակի  օրը, ազգային  ուխտը եւ հայրենիքի  ծառայութեան   հաւատքը  վերանորոգելու  խորհուրդ  մը կը պատգամէ  բոլոր անոնց , որոնք կը  մեղանչեն ազգային ու հաւաքական  շահերու դէմ  եւ  կը  վիճարկեն բանակին նուիրականութիւնը: Շրջաանյին զարգացումներուն մէջ  մեր քաջարի բաանկին վերապահուած է  մեծ ու ծանր դերակատարութիւն: Լիբանանի պարագային բանակը ոչ միայն  խաղաղութեան եւ  ապահովական կայունութեան երաշխիքն է, այլեւ՝  համայնքային  համակեցութեան:

 Բանակին ազգանուէր ծառայութիւնները  բոլորին կը  թելադրէ  չսակարկել անոր  ընտրանքներուն առջեւ, թշնամանք չցուցաբերել եւ  թելադրութիւններ չկատարել  անոր հրամանատարութեան, ընդհակառակը՝ բարձր  պահել անոր վարկն ու հեղինակութիւն:

Չի բաւեր,  հանրապետութեան նախագահը արժեւորէ բանակին սխրագործութիւնները: Չի  բաւեր, որ երկրին «զոյգ»  վարչապետները իրենց վստահութիւնը յայտնեն բանակին: Չի բաւեր, խորհրդարանի նախագահը կարմիր գիծ  յայտարարէ բանակը՝  քաղաքական խմբաւորումներներէն եւ հոգեւորականներէն  կը  պահանջուի զուսպ  ըլլալ  բանակին հանդէպ, նպատակավրէպ  ու  հակոտնեայ  կեցուածքներուն  թիրախը չդարձնել զայն:    Համազգային  ծառայութեան  վրայ ինկած բանակի  նահատակները  մեծարանքի ու   պղպջակային   դրուատանքներու անհրաժեշտութիւնը  չունին: Բանակի դրօշին երդնած  իւրաքանչիւր   ծառայող,  ուխտած է իր  գերագոյն զոհուղութեամբ   պաշտպանել   հայրենիքի  հողը, գերիշխանութիւնը, անոր անվտանգութիւնը, պատիւն ու արժանապատուութիւնը:

Բանակի  օրը ուխտի վերնորոգման  օր ըլլայ համայն լիբանանցիներուն: Բոլորս կ’ապրինք այնպիսի հանգրուանի մը մէջ, ուր այսպէս կոչուած արաբական գարունները թեւակոխած են իրենց մայրամուտը:  Հիւսիսային  Ափրիկէյէն  մինչեւ  հիւսիսային Սուրիա ի զուր կը թափի արաբ  բազմաչարչար   ժողովուրդին արիւնը…:  

Լիբանանեան բանակի  տօնին առիթով կ’ուզենք վերահաստատել  բանակի դերակատարութեան եւ առաքելութեան վերաբերեալ  մեր հաւատոյ  հանգանակը: Լիբանանեան բանակը կը մնայ  երկրի  անկախութեան, գերիշխանութեան, անվտանգութեան, անոր սահմանագիծերուն պաշտպանութեան  վահանակիրը:  Անտեղի  եւ ապօրէն  կը նկատենք զինուորական  հաստատութեան հակակշիռէն  դուրս գտնուող զէնքը:  Ազգային միասնականութեան  ներհակ կը գտնենք Սուրիա ուղուող  վարձկաններու  համար, Լիբանանը անցումային գօտիի  վերածելու  փորձերը,  ինչպէս նաեւ՝  Սուրիոյ հակամարտութեան որեւէ  կերպ միջամտելու  ոմանց յաւակնութիւնները: Այսօրուան հրամայականը պիտի  ըլլայ՝  երկիրը  ամէն գնով  հեռացնել շրջանային  զարգացումներէն: Այս  պատասխանատու  հանգրուանին վիթխարի դերակատարութիւն  վերապահուած է  լիբանանեան բանակին: Գործնապէս ցոյց տանք  բանակին հանդէպ մեր նախանձախնդրութիւնը: Զօրակցինք ու ապաւինինք անոր քայլերուն:

Բանակի  տօնը  համազգային  հպարտանքի եւ հայրենիքի անկախութեան համար ինկած նահատակներու  յիշատակի  օրն է  միաժամանակ: Յարգանք լիբանանեան բանակի  բիւրաւոր նահատակներուն,  յարգանք Լիբանանի անկախութեան  ճամբուն վրայ ինկած բոլոր նահատակներուն  յիշատակին:  Յարգանք հայրենիքի սահմանագիծերը  պաշտպանող  քաջարի  լիբանանցի զինուորին:

ԱՀԱՐՈՆ ՇԽՐՏԸՄԵԱՆ

LEAVE A REPLY

Please enter your comment!
Please enter your name here