ՄՈՍԿՈՒԱ ԿԸ ՊԱՀԱՆՋԷ «ԺԸՆԵՒ – 2» ԽՈՐՀՐԴԱԺՈՂՈՎԻՆ ՔԻՒՐՏԵՐՈՒ ՄԱՍՆԱԿՑՈՒԹԻՒՆԸ

0
129

Սուրիոյ Քրտական Բարձրագոյն Խորհուրդի 10 անդամներէն մէկը հանդիսացող Իսա Հուսօ, Թուրքիոյ սահմանակից հիւսիսային Սուրիոյ Գամիշլի քաղաքին մէջ ահաբեկուեցաւ Երեքշաբթի, 30 Յուլիսին: Ան սպաննուեցաւ, երբ քաղաքը գտնուող իր բնակարանէն դուրս եկած պահուն, անոր ինքնաշարժին մէջ զետեղուած ական մը պայթեցաւ:
Քրտական Բարձրագոյն Խորհուրդին մաս կազմող Քրտական Ժողովրդավարական Միութիւն կուսակցութեան Եւրոպայի բանբեր Նաուաֆ Խալիլ դատապարտեց Հուսոյի ահաբեկումը՝ աւելցնելով. «Հուսոյի հեղինակութիւնը ունեցող անձի մը ահաբեկումը Սուրիոյ մէջ բոլոր քրտական կուսակցութիւններուն յստակ պատգամ մըն է, որ կը սպառնայ քրտական շրջաններուն մէջ կայունութիւնը հարուածել»:
Ան նաեւ նշեց, որ քաղաքը իսլամ արմատական կազմակերպութեանց կողմէ շարունակական յարձակումներու կ՛ենթարկուի, ու ամբաստանեց այդ կազմակերպութիւնները եւ «այլ կողմեր»՝ Հուսոյի սպանութեան յանցանքով:
Խալիլ քննադատեց քրտական շրջաններուն դէմ ծայրայեղ իսլամականներու յարձակումներուն նկատմամբ սուրիական ընդդիմադիր Ազգային համաձայնական մարմինին եւ Սուրիական ազատ բանակին լռութիւնը:
Միւս կողմէ, Ռուսիոյ արտաքին գործոց նախարարութիւնը կոչ ուղղեց երաշխաւորելու «Ժընեւ- 2» խորհրդաժողովին մէջ այլ ուժերու կողքին հաւասարապէս սուրիացի քիւրտերուն ներկայութիւնը, որպէսզի անոնք այդ խորհրդաժողովին ընթացքին իրենց ձգտումները ներկայացնեն ու զանոնք պաշտպանեն սուրիական համապարփակ քաղաքական հոլովոյթի մը ծիրին մէջ:
Ռուսիոյ արտաքին գործոց նախարարութիւնը աւելցուց, որ Մայիս ամսուան ընթացքին Քրտական Բարձրագոյն Խորհուրդէն ստացած է նամակ մը, որուն մէջ խորհրդաժողովի քրտական արդար ներկայացուցչութիւնը երաշխաւորելու համար օժանդակութիւն կը խնդրուէր, որովհետեւ քրտական մտահոգութիւններու եւ տեսակէտներու փոխանցման համար, կարելի չէ լիազօրել կառավարութիւնը կամ որեւէ ընդդիմադիր կողմ: Նախարարութիւնը նշեց. «Մոսկուա կը հասկնայ այս կեցուածքը, որ ցուցանիշն է սուրիացի քիւրտերու ձգտումին՝ ապրելու միացեալ, ժողովրդավար եւ անկախ Սուրիոյ մէջ, ուր կրօնի, լեզուի, յարանուանութեան հիմամբ բաժանում չկայ, եւ ուր երաշխաւորուած  են  բոլոր յարանուանութեանց իրաւունքները »:

 

LEAVE A REPLY

Please enter your comment!
Please enter your name here