ՆԱԽԱԳԱՀ ՍԸԼԷՅՄԱՆ՝ ԻՍԿԱԿԱՆ ՆԱՀԱՏԱԿՈՒԹԻՒՆԸ ՅԱՆՈՒՆ ՀԱՅՐԵՆԻՔԻ ՊԱՇՏՊԱՆՈՒԹԵԱՆ Կ’ԸԼԼԱՅ – ԼԻԲԱՆԱՆՑԻ ԺՈՂՈՎՈՒՐԴԸ ԶՈՀՈՂՈՒԹԻՒՆՆԵՐ ԿԸ ՊԱՀԱՆՋԷ ԼԻԲԱՆԱՆԻ ՀԱՄԱՐ

0
111

 Լիբանան  երէկ    համազգային տարողութեամբ  նշեց ազգային  բանակի հիմնադրութեան  68-րդ տարեդարձը:  Այս  հպարտառիթ օրուան  առիթով,  երէկ  առաւօտեան, Ֆայատիյէի  Շուքրի Ղանէմ զօրանոցին մէջ տեղի ունեցաւ  հանդիսութիւն:  Ի ներկայութիւն հանարապետութեան նախագահ Միշէլ Սըլէյմանի, նորանշանակ վարչապետ  Թամամ Սալամի, հրաժարեալ վարչապետ Նեժիպ Միքաթիի,  խորհրդարանի նախագահ Նեպիհ Պըրրիի,  նախարարներու,  երեսփոխաններու,   իրաւագէտներու,  դիւանագէտներու,  զինուորական բարձրաստիճան պատասխանատուներու՝ Ֆայատիյէի   սպայից վարժարանին մէջ տեղի ունեցաւ  զինուորական տողանք մը,  ապա՝  նորագիր սպաներու  վկայականաց  բաշխում, որմէ ետք հանրապետութեան նախագահ Միշէլ Սըլէյման արտասանեց օրուան խորհուրդը ներկայացնող  բաւական կարեւոր խօսք մը:

    Նախագահ Սըլէյման  նշեց, թէ  ժամանակն է, որ   պետականութիւնը եւ  բանակը դառնան   ճակատատագրական հարցերու եւ ուժի գործածութեան  վերաբերեալ  որոշումի միակ տէրերը .« անհրաժեշտութիւն կը նկատենք  պաշտպանութեան ռազմավարութեան մը   ճշդումը,  Դիմադրութեան  զէնքը  Լիբանանի սահմաններէն  դուրս   գալու  հետեւանքով». դիտել տուաւ Սըլէյման եւ աւելցուց.«   Լիբանանեան  բանակին դերկատարութիւնը աւելի պիտի դժուարանայ,  երբ  կողմ մը կամ կողմեր  միջամուխ  կը դառնան   Լիբանանի սահմաններէն դուրս տեղի ունեցող  հակամարտութիններու:  Ժամանակը, երբ  բանակին  չէր արտօնուած  պաշտպանել Լիբանանը   մեկնած է: Առանց  բանակի,  գոյութիւն  չունի ապահովութիւն  եւ արժանապատուութիւն». ըսաւ Սըլէյման:«  Բազմաթիւ յեղափոխութիւններ տեղի ունեցան Միջին Արեւելքի եւ արաբական աշխարհին մէջ, վարչակարգեր փոփոխութեան ենթարկուեցան, սակայն շնորհիւ բանակին,  Լիբանանի ժողովրդավարական դրութիւնը  պահպանեց իր գոյութիւնը» շեշտեց Սըլէյման: Հանրապետութեան նախագահը  նաեւ   ըսաւ, թէ  պետութիւնը, անկախ՝  համայնքային եւ յարանուանական  խտրութիւններէ, կը պահպանէ   քաղաքացիներու  իրաւունքներն ու  արժանապատուութիւնը: « Առանց բանակի կարելի չէ   կերտել ապահովութիւն,  գերիշխանութիւն եւ հայրենիք: Բանակը կը մնայ  քաղաքային անվտանգութեան,  վարչակարգի  պահպանութեան  պատնէշը». յայտնեց ան:  Այս առիթով, հանրապետութեան նախագահը շեշտեց, թէ երկխօսութիւնը կը մնայ  տարակարծութիւնները  լուծելու   հիմնական  միջոցը:  Ան մերժեց  բանակին հասցէին  քննադատութիւնները եւ  նաեւ  յայտնեց, թէ  բանակը  հաշուետու չէ  այլոց  գործած սխալներուն:

Նախագահ Սըլէյմանի  խօսքէն ետք տեղի ունեցաւ  զինուորական տողանցք:

LEAVE A REPLY

Please enter your comment!
Please enter your name here