ՊԱՆ ՔԻ ՄՈՒՆ ԵՒ ԱՇԹԸՆ ԿԸ ՇԵՇՏԵՆ ՀԱՄԱԽՈՀԱԿԱՆ ԼՈՒԾՈՒՄԻ ՄԸ ԱՆՀՐԱԺԵՇՏՈՒԹԻՒՆԸ

0
97

Եւրոպական Միութեան արտաքին  քաղաքականութեան գլխաւոր բանագնաց  Քաթրին Աշթըն հեռաձայնային  հաղորդակցութիւն մը ունեցաւ  ՄԱԿ-ի ընդհանուր  քարտուղար  Պան Քի Մունի հետ  եւ  քննարկեց  Եգիպտոսի զարգացումները: Անոնք  շեշտեցին  հակամարտութեան  կողմերուն  միջեւ  համախոհական  լուծում մը  գտնելու անհրաժեշտութիւնը:

Նախկին նախագահ  Մոհամմէտ Մորսիի կողմնակիցները կ’անտեցեն գործող կառավարութեան  վերջին նախազգուշացումները եւ կը  շարունակեն Գահիրէի եւ այլ քաղաքներու մէջ նստացոյցերը:  Կառավարութիւնը ոստիկանութեան հրահանգած է կասեցնել  մայրաքաղաքի հրապարակներուն վրայ  հաւաքները: Իսլամական Եղբայրակցութեան  ղեկավարները կը  յայտարարեն, թէ  նստացոյցերը պիտի շարունակուին մինչեւ  Մորսիի իշխանութեան  վերականգնումը:  «Էմնըսթի Ինթըրնեշընըլ» մարդասիրական կազմակերպութիւնը դատապարտեց Եգիպտոսի ներքին գործոց նախարարութեան տրուած վերոյիշեալ հրահանգը, դիտել տալով որ  անոր  գործադրութիւնը յաւելեալ արիւնահոսութեան  պատճառ պիտի դառնայ  երկրին մէջ:

Միացեալ Նահանգներ Եգիպտոսի  նոր իշխանութիւններէն պահանջեց   յարգել   հաւաքներ կազմակերպելու ազատութիւնը:  Եգիպտոսի ներքին գործոց նախարարութիւնը յայտարարեց, թէ աստիճանական  քայլերու պիտի  դիմէ բազմութիւնը  ցրելու  համար: Իսլամական  Եղբայրակցութիւնը  մերժեց   հաւաքները դադրեցնելու  ներքին գործոց նախարարութեան հրահանգը:

«Սքայ Նիուզ» հաղորդեց, թէ Սինայի Արէյշ քաղաքին մէջ,  անծանօթներ յարձակում գործած են  զինուորական կացարանի մը վրայ  մը, սպաննելով   ինը  անձեր:

LEAVE A REPLY

Please enter your comment!
Please enter your name here