ԹՈՒՐՔԻԱ ՏԵՂԵԱԿ ՉԷ, ՈՐ ՌՈՒՍ ՍԱՀՄԱՆԱՊԱՀՆԵՐԸ ԿԸ ՊԱՀՊԱՆԵՆ ՀԱՅ-ԹՐՔԱԿԱՆ ՍԱՀՄԱՆԸ

0
144

Հայ-թրքական  սահմանին վրայ  տեղի ունեցաւ  միջադէպ,  որ կրնայ   բաւական հեռու  տանող հետեւանքներ ունենալ:Ըստ թրքական  կառավարութեան, հայ սահմանապահները  թուրք սահմանախախտ մը սպաննած են սահմանագիծին վրայ: Թուրքերը կը պնդեն, թէ  սպաննուած  քաղաքացին եղած է հովիւ:  Ենթական իբրեւ թէ  սահմանը անցած է  ոչխարները  փնտռելու համար:  Թրքական կողմը կը հաստատէ, որ  հովիւը  ապօրինի անցած է սահմանը, սակայն միաժամանակ կը նշէ որ  հովիւը եղած է անզէն:

Սահման խախտելը ոտնձգութիւն է պետութեան  նկատմամբ եւ սահմանապահները պէտք է գործեն անկասելի: Հայաստանի արտաքին գործոց նախարարութիւնը արձագանգելով  Թուրքիոյ  բողոքին, ցաւ  յայտնեց պատահարին համար,  մաղթելով որ  նմանատիպ դէպքեր  չեն կրկնուիր ապագային:

Կարսի  նահանգապետ Էյուպ  Թեպէ լրագրողներուն յայտնեց, թէ   35-ամեայ հովիւ  Մուսթաֆա  Ուլքէրը , 31 Յուլիսի երեկոյեան, կորսուած անասուն մը  փնտռելու   միջոցին յայտնուած է  հայկական հողերու վրայ: Սահմանապահները կրակ բացած են անոր վրայ, ծանր վիրաւորելով  Մուսթաֆան: Անոր դին վերցնելու համար,  Կարսի իշխանութիւնները եւ  թուրք սահմանապահները բանակցութիւններ վարած են հայկական  կողմին հետ  եւ համապատասխան արձանագրութիւններ կատարելէ ետք վերցուցած են  մահացած հովիւին դին:

Թուրքիոյ արտաքին գործոց  նախարարութիւնը  2 Օգոստոսին  յայտարարութիւն մը տարածեց, հովիւին կապակցութեամբ՝ դատապարտելով անմեղ  քաղաքացիին՝  սահմանը խախտելու պատճառով  սպանութիւնը:

Սակայն « Իթար- Թասս» լրատուական գործակալութիւնը բոլորովին  տարբեր մեկնաբանութեամբ  նկարագրեց պատահարը:  Հայաստանի մօտ տեղակայուած   Ռուսիոյ սահմանային զօրքերու  մամուլի ծառայութեան ղեկավար  Սերկէյ  Գրեչին ըսաւ, թէ   հատելով Հայաստանի  հետ սահմանը՝  35-ամեայ թուրք հովիւը կրակ բացած է ռուս  սահմանապահներու  ուղղութեամբ,  ապա փորձած  է ներթափանցել Հայաստանի տարածքը:  Ռուս սահմանապահները  բացած են պատասխան կրակ՝  վիրաւորելով  սահմանախախտը:

LEAVE A REPLY

Please enter your comment!
Please enter your name here