ԹՈՒՐՔԻՈՅ ԲԱՆԱԿԸ ԿՐԱԿ ԿԸ ԲԱՆԱՅ ՍՈՒՐԻՈՅ ՈՒՂՂՈՒԹԵԱՄԲ

0
107

 Թուրք-սուրիական սահմանին մօտակայ սուրիական  հողերու վրայ   ծանր բախումներ  տեղի կ’ունենան    շրջանի  քրտական կազմակերպութիւններուն եւ Ճեպհէթ Ալ Նուսրա  ծայրայեղական  կազմակերպութեան զինեալներուն միջեւ:  Այդ  միջոցին, թրքական բանակը յաճախակի կրակ կը բանայ Սուրիոյ ուղղութեամբ:  

Սուրիոյ ընդդիմադիր ազգային համաձայնական մարմինի նախագահ Ահմէտ Ասի Ժարպա, Քաթարի շէյխ Թամիմ Պըն Համատ Թանի իշխանին հետ ունեցած հանդիպումէն ետք յայտնեց, որ իշխանը վստահեցուցած է, թէ Քաթար կը շարունակէ «սուրիացի ժողովուրդին քաղաքական եւ զինուորական աջակցութիւն ցուցաբերել եւ թէ սուրիացի ժողովուրդին ու յեղափոխութեան կողքին պիտի ըլլայ, մինչեւ յաղթանակի կերտումը»:
Ժարպա յայտնեց, որ ինք «Ժընեւ- 2» միջազգային խորհրդաժողովին մասնակցութեան գաղափարին կը զօրակցի, պայմանաւ որ վարչակարգին հետ բանակցութեանց աւարտի ժամկէտ մը ճշդուի: Ան նաեւ նշեց, որ ընդդիմութեան կողմէ ժամանակաւոր կառավարութեան կազմութիւնը պիտի յայտարարուի մօտիկ ապագային:
Սուրիոյ վարչապետ Ուաէլ Հալքի յայտնեց. «Սուրիա կը հաւատայ, որ քաղաքական լուծումը տագնապին վերջ տալու միակ միջոցն է»: Ան նշեց նաեւ, որ «կառավարութիւնը Հալէպը իր սիրտին ու միտքին մէջ դրած է եւ անոր ու բնակչութեան կացութեան ժամ առ ժամ կը հետեւի»՝ աւելցնելով, որ «Սուրիա-Իրան յարաբերութիւնները, նախագահ Հասան Ռոհանիի ղեկավարութեան տակ, աւելի սերտ ու համագործակցական բնոյթ պիտի ստանան»:

 

LEAVE A REPLY

Please enter your comment!
Please enter your name here