ՍՈՒՐԻՈՅ ԸՆԴԴԻՄՈՒԹԻՒՆԸ ՊԻՏԻ ՄԱՍՆԱԿՑԻ « ԺԸՆԵՒ-2 » ԽՈՐՀՐԴԱԺՈՂՈՎԻՆ

0
99

Սուրիոյ ընդդիմադիր ազգային համաձայնական մարմինի նախագահ Ահմէտ Ասի Ժարպա, Քաթարի շէյխ Թամիմ Պըն Համատ Թանի իշխանին հետ ունեցած հանդիպումէն ետք յայտնեց, որ իշխանը վստահեցուցած է, թէ Քաթար կը շարունակէ «սուրիացի ժողովուրդին քաղաքական եւ զինուորական աջակցութիւն ցուցաբերել եւ թէ սուրիացի ժողովուրդին ու յեղափոխութեան կողքին պիտի ըլլայ, մինչեւ յաղթանակի կերտումը»:
Ժարպա յայտնեց, որ ինք «Ժընեւ- 2» միջազգային խորհրդաժողովին մասնակցութեան գաղափարին կը զօրակցի, պայմանաւ որ վարչակարգին հետ բանակցութեանց աւարտի ժամկէտ մը ճշդուի: Ան նաեւ նշեց, որ ընդդիմութեան կողմէ ժամանակաւոր կառավարութեան կազմութիւնը պիտի յայտարարուի մօտիկ ապագային:
Սուրիոյ վարչապետ Ուաէլ Հալքի յայտնեց. «Սուրիա կը հաւատայ, որ քաղաքական լուծումը տագնապին վերջ տալու միակ միջոցն է»: Ան նշեց նաեւ, որ «կառավարութիւնը Հալէպը իր սիրտին ու միտքին մէջ դրած է եւ անոր ու բնակչութեան կացութեան ժամ առ ժամ կը հետեւի»՝ աւելցնելով, որ «Սուրիա-Իրան յարաբերութիւնները, նախագահ Հասան Ռոհանիի ղեկավարութեան տակ, աւելի սերտ ու համագործակցական բնոյթ պիտի ստանան»:

Սուրիական բանակի հակակշիռին տակ գտնուող Հոմս քաղաքի հարաւարեւելեան շրջանին մէջ տեղի ունեցած պայթումի մը հետեւանքով սպաննուած են առնուազն 40 քաղաքացիներ եւ զինուորներ: Վիրաւորուած են 160 ուրիշներ:

 

LEAVE A REPLY

Please enter your comment!
Please enter your name here