ԼԻԲԱՆԱՆԵԱՆ ԿԱՐՃ ԼՈՒՐԵՐ

0
123

– Լիբանանի տարբեր շրջաններու մէջ,  Մուսթաքպալ Հոսանքի կողմէ  կազմակերպուած «իֆթար»ներուն առիթով արտասանած իր խօսքին մէջ, նախկին վարչապետ Սաատ Հարիրի  յայտարարեց, թէ Մուսթաքպալ   Հոսանքը  միշտ ձգտած է  կերտել պետութիւն եւ յարգել սահմանադրական հաստատութիւնները: Ան պահանջեց  լուծել  ապօրէն զէնքին հարցը եւ դադրեցնել Սուրիոյ հակամարտութեան մասնակցութիւնը: Ան միաժամանակ  մերժեց Հըզպալլայի մասնակցութեամբ կառավարութիւն մը, աւելցնելով, որ Հըզպալլա  խախտած է  լիբանանեան  առօրեայի  բոլոր օրէնքները:  

-«Սաութ Լուպնան» (100.5) ձայնասփիւռի կայանը հաղորդեց, թէ Ապու Մուազ  Մութասամ  Հասան անունով  անձ մը,  Սուրիոյ՝  Ղալաաթ Ալ Հոսնի մէջ կատարած է անձնասպանական  գործողութիւն, դառնալով Սուրիոյ հակամարտութեան ընթացքին անձնասպանական գործողութիւն կատարող առաջին լիբանանցին:

-Ելեւմտական նախարարութիւնը  յայտնեց, թէ  ի վիճակի պիտի  չըլլայ ապահովելու  ընդհանուր մարզի  պաշտօնէութեան  աշխատավարձերը: Նախարարութիւնը կը կարօտի   15  միլիառ լիբանանեան ոսկի  գումարի մը, վճարելու ներքին գործոց նախարարութեան պաշտօնեաներուն   աշխատավարձերը:

-Ապահովական  աղբիւրներ  հաղորդեցին, թէ  Եարզէի  վրայ արձակուած  հրթիռներուն  վայրը Պշամուն  քաղաքէն դուրս  ինկող Եահուտիյէ գիւղն է: Աղբիւրները կ’ենթադրեն, որ  միայն  կազմակերպուած  միլիսները  կը տիրապետեն  շարժուն յենարաններով օժտուած , արագ  տեղափոխութեան  հրթիռներու: Աղբիւրները նաեւ կը հաւաստեն, թէ  հրթիռներուն  թիրախը  լիբանանեան բանակն էր եւ ոչ՝ Պաապտայի պալատը:

– Ներքին գործոց նախարար Մարուան  Շերպէլ  դիտել տուաւ, որ  Պաապտայի  պալատին վրայ արձակուած հրթիռները,  համայն   Լիբանանի վրայ   յարձակում են: Ան նշեց, թէ Լիբանան  տեղափոխուած  սուրիացիներու խիտ ներկայութիւնը իր ժխտական անդրադարձը  կ’ունենայ  երկրին  ապահովական եւ  տնտեսական  կացութեան վրայ:  Շերպէլ նշեց, թէ Լիբանանեան բանակը  յաւելեալ զօրագունդ մը  տեղակայած է  Շուֆի  մէջ:

LEAVE A REPLY

Please enter your comment!
Please enter your name here