ՀԱՅԿԱԿԱՆ ԶԻՆՈՒԱԾ ՈՒԺԵՐՈՒ ՄԷՋ ՄԱՀԱՑՈՒԹԻՒՆԸ ԶԳԱԼԱՊԷՍ ՆՈՒԱԶԱԾ Է

0
118

Այս տարի Հայաստանի Հանրապետութեան զինուած ուժերու շարքերուն մէջ զինուորներու մահուան դէպքերը՝ նախորդ տարուան նոյն ժամանակահատուածին հետ բաղդատելով, նուազած են 25 տոկոսով: Այս մասին «Արմէնփրէս»ին հետ ունեցած զրոյցին ընթացքին յայտնած է Հայաստանի պաշտպանութեան նախարարութեան մամլոյ խօսնակ Արծրուն Յովհաննիսեանը: «Ճիշդ է, մենք Յուլիսին մի քանի ցաւալի կորուստներ ունեցանք, սակայն, ընդհանուր առմամբ, վիճակագրութիւնը ցոյց է տալիս, որ մեր բանակում մահացութեան դէպքերն էականօրէն նուազել են», յայտնած է ան։ Անդրադառնալով տարբեր կազմակերպութիւններու եւ լրատուամիջոցներուն կողմէ տարածուող այն տեղեկութիւններուն, թէ մահացութեան դէպքերը բանակին մէջ վերջերս աւելի շատցած են, իսկ նախարարութիւնը անոնց մէկ մասը գաղտնի կը պահէ, Արծրուն Յովհաննիսեան ընդգծած է, որ անոնք անիմաստ խօսակցութիւններ են եւ չեն համապատասխաներ իրականութեան: «Բոլոր այդ կազմակերպութիւնները, որոնք իբր թէ մարդու իրաւունքների պաշտպանութեան տեսանկիւնից են հանդէս գալիս, բանակի հետ կապուած ապատեղեկատուութիւններ են տարածում՝ կորուստների մասին ուռճացուած թուեր ներկայացնելով», նշած է ան՝ ընդգծելով, որ ամէն ինչ թափանցիկ է, եւ նման պարագաներու մասին հանրութիւնը տեղեակ կը պահուի:
Յովհաննիսեանի համաձայն, այս օրերուն անկարելի է գաղտնի պահել բանակին մէջ տեղի ունեցած դժբախտ դէպքերը: Ան նշած է, որ իրականութեան չեն համապատասխաներ նման լուրերը, որոնք ուղղակի շահարկումներ են եւ անհեթեթ ու անհիմն յայտարարութիւններ։

LEAVE A REPLY

Please enter your comment!
Please enter your name here