ՄԱՐԶԱԿԱՆ – ՃԵՐԱՐՏ ՄԵՐԺԱԾ Է ՊԱՅԵՐՆԸ

0
126

Լիվըրփուլի խմբապետ Սթիվըն Ճերարտ յայտարարեց, թէ անցնող տարեշրջանին Պայերն  Միւնիխ  տեղափոխուելու  առաջարկ մը  ներկայացած է իրեն, սակայն՝  մերժած: Ճերարտ  իր խաղընկերոջ Լուիս Սուարէզին թելադրեց հաւատարիմ մնալ  Լիվըրփուլ ակումբին եւ անոր համակիրներուն:  Ի դէպ,  Սթիվըն Ճերարտ, իր  երկարամեայ ասպարէզին ընթացքին մերժած է  Չելսիի, Ա.Սէ. Միլանի, Ինթէր Միլանի, Ռէալ Մատրիտի  միանալու առաջարկներ:

Միւս կողմէ, Լուիս Սուարէզ կրնայ դատ բանալ Լիվըրփուլի դէմ: Ան կը յայտարարէ, թէ անցնող  տարեշրջանին, ակումբին պատասխանատուները,  իբրեւ թէ  Չեմփիընզ Լիկ-ի մասնակցող  որեւէ ակումբի  միանալու  բերանացի խոստում տուած են անոր: 

 

ԽԵՏԻՐԱ ԿՐՆԱՅ ՄԻԱՆԱԼ  ՉԵԼՍԻԻ

Ռէալ Մատրիտի  միջնապահներէն Սամի Խետիրա  շատ հաւանաբար  վերամիանայ իր նախկին  մարզիչին Ժոզէ Մուրինիոյին: Վերջինս  շատ կը փափաքի Չելսիի մէջ տեսնել  Խետիրան:

Ռէալ Մատրիտ  հետաքրքրուած է  Կրանատայի պրազիլիացի   պաշտպան  Կիլիերմէ  Սիքէյրայի   ծառայութիւններով: 27-ամեայ  պաշտպանը կը  դիտուի Փորթուգալի  հաւաքականի պաշտպան  Ֆապիօ  Գուենթրաուի   փոխարինող:  Սիքէյրայի պայմանագրութիւնը  Կրանատայի հետ կ’աւարտի  2017-ին: Պրազիլիացի  յետսապահը անցնող տարեշրջանին  35 անգամ դաշտ ներկայացած  Կրանատայի  շապիկով, նշանակելով  վեց կոլ:   Անոր փոխանցումը  25  միլիոն եուրօ պիտի արժէ  Ռէալին:

 

ԵՈՒՆԱՅԹԸՏԻ ՀԱՄԱԿԻՐՆԵՐԸ ՊԻՏԻ  ՈՐՈՇԵՆ  ՌՈՒՆԻԻ  ՃԱԿԱՏԱԳԻՐԸ

«Ի.Էս.Փի.Էն»  հաղորդեց,  թէ Մանչեսթըր Եունայթըտի համակիրները պիտի որոշեն Ուէյն Ռունիի  ճակատագիրը: 27-ամեայ ֆութպոլիստին ծառայութիւններով   հետաքրքրուած է  Չելսին:  Ռունի որոշած է  Մանչեսթըր Եունայթըտի  կատարելիք բարեկամական մրցումներուն  ընթացքին  գնահատել համակիրներուն  մօտեցումը:  Եթէ  համակիրները  ջերմ  ընդունելութիւն ցոյց տան՝ պիտի մնայ, իսկ  սուլելու  պարագային՝ հեռանայ: Եունայթըտ մտադրած է  ֆութպոլի բարեկամական երկու  մրցումներ կատարել  6  եւ 9  Օգոստոսին:

ՄՈՒՐԻՆԻՕ ՓՈՐՁԱԾ Է ՈՒՆԵՆԱԼ ՊԷՅԼԸ

Չելսիի մարզիչ Ժոզէ Մուրինիօ յայտարարեց, թէ անցնող մարզական տարեշրջանի սկիզբը, Ռէալ Մատրիտի մարզչութեան շրջանին փորձած էր կազմին մէջ ունենալ  Կարէթ Պէյլը, սակայն Թոթենհամ մերժած էր անոր   առաջարկը: Մուրինիոյի կարծիքով,  Ռէալ Մատրիտ այս անգամ պիտի յաջողի  ձեռք բերել 24-ամեայ միջնապահը: Արքայական ակումբը 115  միլիոն եուրօ  պիտի վճարէ  Պէյլի փոխանցումին համար:

 

ՊԱՐՉԵԼՈՆԱ ԲԱՐԵԿԱՄՈՒԹԵԱՆ  ԴԵՍՊԱՆ

Նախագահ  Շիմոն  Փերէզի հրաւէրով  Պարչելոնա  ժամանեց Իսրայէլ:  Գաթալոնական  խումբը  ցուցադրական մարզումներ պիտի կատարէ   հրեայ  եւ պաղեստինցի   երեխաներու  հետ:  Ցուցադրական մարզումներուն հրաւիրուած են  14  հազար պատանիներ: Գարլէս Փույոլ,  Իցհաք  Գուենքա եւ Իպրահիմ  Աֆելիալ, վնասուածքի  հետեւանքով  պիտի  բացակային  ՊԱրչելոնայի  Միջին Արեւելք եւ Ծայրագոյն  Արեւելք  կատարելիք շրջագայութենէն:  Պարչելոնա՝  7  Օգոստոսին պիտի մրցի Թայլանտի հաւաքականին, իսկ   10-ին՝ Մալեզիոյ  աստղերու խումբին դէմ

 

ԿՈՄԻՍ ՄԻԱՑԱՒ ՆԻՈՒՔԱՍԸԼԻ

 Լիոնի եւ Ֆրանսայի հաւաքականի  յարձակող  Պաֆեթիմի  Կոմիս միացաւ  Նիուքասըլ Եունայթըտին:  Փոխանցման սակը կը գնահատուի 8.7 միլիոն սթերլին գումար մը:  Անցնող տարեշրջանին,  Կոմիս՝ 37  մրցումներու ընթացքին նշանակեց  16 կոլ:

LEAVE A REPLY

Please enter your comment!
Please enter your name here