ՄԱՐԶԱԿԱՆ – ՓԱՐԻ ՍԷՆ ԺԵՐՄԷՆ ՍՈՒՓԸՐ ԳԱՒԱԹԱԿԻՐ

0
174

Փարի Սէն Ժերմէն ակումբը իր պատմութեան մէջ երրորդ անգամ ըլլալով  նուաճեց Ֆրանսայի  ֆութպոլի «Սուփըր Գափ»ը: Արդարեւ, Պորտոյի դէմ կատարած մրցումին իննիսուն վայրկեանները  1-1 հաւասարութեամբ  վերջ գտնելէ ետք, մրցումին յաւելեալ  վայրկեաններուն, Ալեքսի  նշանակած կոլը  յաղթանակ  պարգեւեց մայրաքաղաքի  կազմին:  Սէն Ժերմէնի յարձակող Զլաթան Իպրահիմովիչ ըսաւ, թէ արդէն իսկ  շահած է  մրցաշրջանի առաջին տիտղոսը:  Ան հաւաստեց, թէ  ֆրանսական ակումբը օժտուած է հիանալի  ֆութպոլիստներով   եւ  հզօր   ակումբ է:

Նշենք, թէ Փարի Սէն Ժերմէն 1995 եւ 1998-ին  նուաճած է Ֆրանսայի «Սուփըր Գափ»ը:

 

ՆԵԼՍՈՆ ՍՏԵՓԱՆԵԱՆԻ ՅԻՇԱՏԱԿԻՆ ՄՐՑԱՇԱՐՔԸ ՍԿՍԱՒ

Երեւանի մէջ, Հայաստանի  վարչապետ  Տիգրան Սարգսեանի եւ պաշտպանութեան նախարար Սէյրան  Օհանեան կատարեցին  Երկրորդ  Համաշխարհային պատերազմի   հերռս Նելսոն Ստեփանեանի յիշատակին կազմակերպուած, սամպոյի   վեցերորդ  միջազգային մրցաշարքին բացումը:  Մրցաշարքին  կը մասնակցին  եօթ  պետութիւններու՝   Հայաստանի,  Արցախի, Յունաստանի,  Ռուսիոյ, Լիթվիոյ,  Վրաստանի եւ Ռումանիոյ  աւելի քան հարիւր յիսուն մարզիկներ:

Կ’արժէ նշել, որ այս տարի  Հայաստանի մէջ  մեծ շուքով կը նշուի  հերոս օդաչուին ծննդեան  հարիւրամեակը:

ԼԻԼԻԹ ՄԿՐՏՉԵԱՆ  ՊՐՈՆԶԷ ՄԵՏԱԼԱԿԻՐ

Սերպիոյ  մայրաքաղաք  Պելկրատի մէջ  տեղի ունեցաւ ճատրակի  անհատական 14-րդ ախոյեանոթիւնը:  Հայ  ճատրակիստ  Լիլիթ  Մկրտչեան դարձաւ  Եւրոպայի անհատական ախոյեանութեան պրոնզէ մետալակիր:  Մկրտչեան, ութ կէտ  հաւաքեց  հնարաւոր  տասնմէկէն:  Մրցաշարին յաղթողը դուրս  եկաւ հունգարացի  Տհան  Տրանք Հոանքը՝  ինը միաւոր:

ՖՈՒԹՊՈԼԻ ԲԱՐԵԿԱՄԱԿԱՆ   ՄՐՑՈՒՄՆԵՐ

Լոս Անճելոսի  մէջ տեղի ունեցող  ֆութպոլի  միջազգային  մրցաշարքի մը  ընթացքին,  Ռէալ  Մատրիտ  2-1  արդիւնքով պարտութեան մատնեց Էվըրթընը:  Սպանական  կազմին կոլերը նշանակեցին Քրիսթիանօ Ռոնալտօն եւ Մեսութ  Օզիլը:  Էվըրթընի կոլը  նշանակեց  Նիքիթա Ելավիչը: Միեւնոյն մրցաշարքին գծով,  Լոս Անճելըս Կալաքսիզ՝ 3-1 արդիւնքով պարտութեան մատնեց Եուվենթուսը:  Նշենք թէ մրցաշարքին կը մասնակցին  Վալենսիան եւ Ինթէր  Միլանը:

Լոնտոնի մէջ, աւանդական «էմիրէյց Գափ»ի քառանդամ մրցաշարքի առաջին հանդիպումին, Արսենալ 2-2 արդիւնքով հաւասարութիւն մը արձանագրեց   Նափոլիի դէմ: Առաջին կիսախաղին իտալացիները ձեռք բերին 2-0 արդիւնքով առաւելութիւն մը: Սակայն երկրորդ  կիսախաղին,  Ժիրու եւ Գոսիէլնի հաւասարեցուցին արդիւնքը: Մրցաշարքին երկրորդ օրուան  մրցումներուն, Արսենալ 2-0 արդիւնքով խոնարհեցաւ  Կալաթասարայի առջեւ:   Փորթօ՝ 3-1 արդիւնքով պարտութեան մատնեց  Նափոլիին: Էնֆիլտ Ռոտ մարզադաշտին մէջ, Լիվըրփուլ 2-0 արդիւնքով պարտութեան մատնեց   Յունաստանի ա:ոյեան Օլիմփիաքոսը:  Ճօ Ալէն եւ  Ճորտան Էնտըրսըն նշանակեցին «Կարմիրներ»ուն կոլերը:

Մոնաքօ, սեփական դաշտին  մէջ 5-2  արդիւնքով պարտութեան մատնեց  Թոթենհամը:  Կարէթ  Պէյլ կը  բացակայէր  լոնտոնեան կազմէն:

 

ՖԱՊՐԵԿԱՍԸ ՊԻՏԻ  ՈՐՈՇԷ ԻՐ  ՃԱԿԱՏԱԳԻՐԸ

Պարչելոնայի մարզիչ  Ճերարտ   Մարթինօ յայտարարեց, թէ  Սեսկ Ֆապրեկաս անձամբ պիտի որոշէ իր ճակատագիրը:  Անգլիական  Մանչեսթըր  Եունայթըտ ակումբը կը փորձէ  փոխան 35 միլիոն եուրօ գումարի ապահովել 26-ամեայ  միջնապահին  փոխանցումը: Ֆապրեկաս  վերջերս յայտնած էր, թէ  Մարթինիոյի կը մնայ որոշել  իր  փոխանցումին ընթացքը: «Խօսած  եմ  Ֆապրեկասին հետ, ան  լաւագոյններէն է, սակայն  ինք պիտի առնէ որոշումը». ըսաւ  Մարթինօ:

Պարչելոնա եւ  Ռէալ Մատրիտ կը  մրցին  Սեւիլիայի  ֆրանասացի կիսապաշտպան Ժոֆրէյ   Գոնտոկպիայի ստորագրութեան համար:   Սեւիլիա քսան միլիոն եուրօ  կը  պահանջէ  Գոնտոկպիայի   փոխանցումին համար:

ՊԱՅԵՐՆ ԿԸ ՄԵՐԺԷ ՀՐԱԺԱՐԻԼ ՇԱՔԻՐԻԷՆ

Շալքէ 04  ակումբը  հետաքրքրութիւն կը ցուցաբերէ Զուիցերիոյ հաւաքականի եւ Պայերն Միւնիխի կիսապաշտպան Ճերտան  Շաքիրի նկատմամբ:  Շալքէ  պաշտօնական առաջարկ մը ներկայացուցած է 21-ամեայ կիսապաշտպանին համար: Պայերն  մերժած է առաջարկը:  Շաքիրի անցնող մարզաշրջանին  քսանվեց անգամ ներկայացած է դաշտ եւ  նշանակելով  չորս կոլ:

 

ՎԻԼԱՇ ՊՈԱՇ ԿԸ ՄԵՐԺԷ ՎԱՃԱՌԵԼ ՊԷՅԼԸ

Թոթենհամի մարզիչ Անտրէ Վիլաշ  Պոաշ  անակնկալ յայտարարութիւն մը կատարեց, ըսելով,  թէ  Կարէթ  Պէյլի  փոխանցումին մասին տեղեկութիւնները  չեն համապատասխաներ իրականութեան, ան պիտի մնայ  Թոթենհամի  խաղացող: «Գառլօ Անճելոթիին շատ կը յարգեմ: Ան պէտք չէ խօսեր Պէյլի մասին, որովհետեւ  Պէյլը Ռէալի  մարզիկ չէ». ըսաւ  Պոաշ,աւելցնելով որ ինք հեռանկարային խումբ կը պատրաստէ, որուն մաս կը կազմէ  Պէյլը: Փորթուգալացի  մարզիչը   միաժամանակ խոստովանեցաւ, թէ   Թոթենհամ նախապէս մերժած է  Պէյլի վերաբերեալ  Մոնաքոյէն առաջարկ մը:

Մարզական  կարգ մը օրաթերթերու համաձայն, Կարէթ Պէյլի  հաշուած ժամեր մնացած են  անգլիական ակումբին հետ: Ռէալ Մատրիտ  պատրաստ է փոխան  120 միլիոն եուրօ  վճարելու անոր փոխանցումին համար:

Միւս կողմէ, Ռէալ  Մատրիտի յետսապահներէն Ֆապիօ Գուենթրաու յայտարարեց, թէ  արգելք մը չունի տեղափոխուելու Թոթենհամ: Փորթուգալացի  մարզիկին կը  գրաւէ այն  հանգամանքը, որ  անգլիական ակումբին մէջ պիտի աշխատի հայրենակից  Անտրէ  Վիլաշ Պոաշի գլխաւորութեան տակ:

Թոթենհամի մարզիկներէն  Գլայվ  Տեմսի  միացաւ  ամերիկեան   Սիէթըլ ակումբին:

 

ՆԷՅՄԱՐԻ ՄՕՏ ԱՐԵԱՆ  ՀԻՒԱՆԴՈՒԹԻՒՆ ՅԱՅՏՆԱԲԵՐՈՒԱԾ  Է

Պարչելոնայի  յարձակող Նէյմարի մօտ յայտնաբերուեցաւ սակաւարիւնութեան (անեմիա)  հիւանդութիւն: Գաթալոնական ակումբի բժշկական կազմը սոյն ախտորոշումը կատարեց՝ արեան քննութիւններու լոյսին տակ:

Սոյն  յայտնութենէն ետք, Նէյմար պէտք է մարզուի  թեթեւ ծրագրով  եւ շատ հաւանաբար  վերադառնայ  Պարչելոնայի  ասիական  շրջագայութենէն:  Յիշեցնենք, որ  ամրան սկիզբը, Նէյմար  ենթարկուեցաւ կոկորդի վիրահատութեան:

Պարչելոնայի յարձակող Լիոնէլ Մեսի պահանջեց վերանայիլ իր պայմանագրութեան կարգ մը կէտերուն:  Մեսիի  դժգոհութեան  պատճառը երիտասարդ  յարձակող Նէյմարն է:  Մեսիի հայրը  հանդիպում մը պիտի ունենայ  Պարչելոնայի  տնօրէնութեան հետ, իր  զաւակին աշխատավարձը  աւելցնելու նպատակով:  Մեսի տակաւին վերջերս, մինչեւ 2018, նոր պայմանագրութիւն մը  ստորագրեց գաթալոնական ակումբին հետ:

ՌԱՄՈՍ՝  ԳԱՍԻՅԱՍ ԱՇԽԱՐԻ ԼԱՒԱԳՈՅՆ ԲԵՐԴԱՊԱՀՆ Է

Ռէալ Մատրիտի  յետսապահ  Սերժիօ Ռամոս, Լոս Անճելոսի մէջ  Ռէալի եւ Էվըրթընի միջեւ  մրցումը աւարտելէ ետք յայտարարեց, թէ Իկէր Գասիյաս կը մնայ աշխարհի լաւագոյն  բերդապահը: «Ինծի համար շատ  հաճելի է, որ  մեր բերդը Գասիյասը կը պաշտպանէ». ըսաւ Ռամոս, միաժամանակ մաղթելով որ պահեստային բերդապահ Տիէկօ Ռամոս շարունակէ  անցեալ տարուան  ընթացքին ցուցադրած  փայլուն մարզավիճակը:

Յիշեցնենք, որ նախկին մարզիչ Ժոզէ Մուրինիոյ հետ  վէճի պատճառով, անցնող  չորս տարիներուն  Գասիյաս  յայտնուեցաւ  Ռէալի պահեստայիններուն մէջ:  Գառլօ Անճելոթի  դարձեալ  Գասիյասը  վերադարձուց հիմնական կազմին:

Ռէալ  Մատրիտի յետսապահներէն՝ Փեփէ  չբացառեց   մայրաքաղաքի կազմը լքելու  կարելիութիւն մը: Անգլիական  Մանչեսթըր Սիթի ակումբը  սկսած է լուրջ  հետաքրքրութիւն  ցուցաբերել  Փեփէի հանդէպ:  Շատ հաւանաբար  անգլիական ակումբին շլացուցիչ  պայմանները գինովցուցած են 2007 թուականէն Ռէալի անբաժան  մասը  նկատուող  Փեփէն:

Ռէալի  մարզիկներէն Քրիսթիանօ  Ռոնալտօ  յայտարարեց, թէ պատրաստ է մնալու սպանական ակումբին հետ՝ Կարէթ Պէյլը միանալու պարագային: Ռոնալտօ  նշեց, թէ պայմաններ ունի ներկայացնելիք  Ռէալի տնօրէնութեան, որուն լոյսին տակ պիտի որոշէ  կնքել նոր պայմանագրութիւն մը: Ռոնալտօ կը պահանջէ Կարէթ Պէյլի ստանալիք աշխատավարձին կրկնապատիկը:

ԱԼ  ՇԱԱՐԱՈՒԻ ԿԸ ՄԵՐԺԷ ՄԻԱՆԱԼ  ՌԷԱԼԻ

Ա.Սէ.  Միլանի  երիտասարդ  յարձակող  Սթեֆան Ալ Շաարաուի  յայտարարեց, թէ երբեք   չէ մտածած  Միլանը լքելու մասին:  Անգիական Մանչեսթըր Սիթի ակումբը  շրջանէ մը ի վեր կը  հետապնդէ  քսանամեայ   ֆութպոլիստին   փոխանցումը: « Մանկութենէս    պաշտած եմ Միլանը, երբեք  չեմ մտածած  լքել  Միլանը, նոյնիսկ եթէ  առաջարկը  Ռէալէն  ներկայանայ».ըսաւ  Շաարաուի, որ անցնող  մարզաշրջանին  14  կոլ նշանակեց Միլանի շապիկով:

Ա.Սէ. Միլան ակումբը յառաջիկայ   քանի մը օրերուն  ընթացքին իր կազմին մէջ պիտի ունենայ Ֆիորենթինայի  երիտասարդ յարձակող  Ատեմ  Լայիչը:  21-ամեայ յարձակողը  տասնմէկ կոլ նշանակեց անցնող մարզաշրջանին:

ՄՈՐԱԹԻ  ՊԻՏԻ ՎԱՃԱՌԷ  ԻՆԹԷՐԻ  ԲԱԺՆԵՏՈՄՍԵՐԸ

Իտալական  Ինթէր Միլան ակումբի նախագահ  Մասիմօ Մորաթի  մտադրած է ինտոնեզիացի  գործարար  Էրիք Թոհիրին վաճառել ակումբին բաժնետոմսերը:.«  Ես կը մտածեմ ակումբին ապագային մասին: Մարդիկ կը խօսին  Ինթէրի պարտքերուն մասին:  Իրականութիւնը այդպէս չէ: Ինթէրին պարտքերը մնացեալ ակումբներու պարտքերուն կը նմանին:  Հիմնական հարցը եկամուտի աղբիւրներ  ապահովելն է: Մեզի նոր աղբիւրներ անհրաժեշտ են ». ըսաւ  Մորաթի:

ՄԽԻԹԱՐԵԱՆ  ՏԻՏՂՈՍ ՄԸ ԵՒՍ ՆՈՒԱՃԵՑ

Պրազիլի  Ռեկիսթրօ քաղաքին մէջ տեղի ունեցող ճատրակի  միջազգային  Օփըն մրցաշարքը աւարտեցաւ  պրազիլահայ   վարպետ  Գրիգոր-Սեւակ  Մխիթարեանի յաղթանակով: Մխիթարեան,  կարելի ինը կէտերէն ապահովեց  եօթուկէս միաւոր:  Մրցաշարքին մասնակցեցան  113   ճատրակիստներ:

 

 

LEAVE A REPLY

Please enter your comment!
Please enter your name here