ՌՈՀԱՆԻ ՊԱՇՏՕՆԱՊԷՍ ՍՏԱՆՁՆԵՑ ՆԱԽԱԳԱՀԻ ՊԱՇՏՕՆԸ՝ ԿԸ ՄԵՐԺԵՆՔ ԲՌՆԻ ՓՈՓՈԽՈՒԹԵԱՆ ԵՆԹԱՐԿԵԼ ՎԱՐՉԱԿԱՐԳԵՐԸ ԵՒ ԻՐԱՆԻ ՀԵՏ ՀԱՐՑԵՐԸ ԼՈՒԾԵԼՈՒ ՄԻԱԿ ՄԻՋՈՑԸ ԵՐԿԽՕՍՈՒԹԻՒՆՆ Է

0
109

Հանդիսաւոր  արարողութեան մը  ընթացքին, նախագահ  Հասան Ռոհանի  կատարեց իր երդումը եւ  պաշտօնապէս  ստանձնեց  Իրանի   Իսլամական Հանրապետութեան նախագահի պաշտօնը: Արարողութեան  կը մասնակցէին  յիսունէ աւելի պետութիւններու նախագահներ, վարչապետներ, նախարարներ: Երդմնակալութեան արարողութեան ներկայ գտնուեցան նաեւ  Հայաստանի եւ  Լիբանանի նախագահները: Սուտանի նախագահ Օմար Պեշիր բացակայեցաւ արարողութենէն, որովհետեւ  Սէուտական Արաբիա Պեշիրին  արգիլեց՝ օգտագործելու իր երկրին  օդային սահմանները: Իր երդմնակալութեան առիթով արտասանած   խօսքին մէջ, Ռոհանի յայտնեց, թէ  Իրան՝ կայունութիւն եւ խաղաղութիւն կը  փնտռէ շրջանին մէջ: Ան ըսաւ, թէ  Թեհրան կը մերժէ  բռնի  փոփոխութեան ենթարկել վարչակարգերը եւ Իրանի հետ  հարցերը լուծելու միակ ճանապարհը երկխօսութիւնն է: Ռոհանի նաեւ  պահանջեց կասեցնել պատժամիջոցներու միջոցաւ սպառնալիքները:

Երդմնակալութեան արարողութենէն անմիջապէս  ետք, նախագահ  Ռոհանի ներկայացուց   նոր  կառավարութեան մէջ  կարգ մը բանալի պաշտօններու համար իր առաջադրած  թեկնածուներուն  անունները:   Առաջին վարչապետի պաշտօնին՝    Էսհաք  Ճահանկիրին:  Արտաքին գործոց նախարար՝ Մուհամմէտ Ճաուատ  Զարիֆը: Պաշտպանութեան նախարար Հիւսէյն  Տեհկանը: Ներքին գործոց նախարար՝ Ապտոլռեզա  Ռահմանի Ֆազլին:

Նշենք, թէ Ռոհանի, 15 Յունիսին  ընտրուեցաւ  Իրանի նախագահ: Ան ծանօթ  է իբրեւ ականաւոր  կրօնական եւ քաղաքական գործիչ:

Քազախիստանի նախագահ նորսուլթան Նազարպայեւ  Թեհրանի մէջ   նախագահ  Ռոհանիի հետ հանդիպելէ ետք, պատրաստակամութիւն յայտնեց  ընդունելու  Իրանի միջուկային  ծրագիրին վերաբերող՝ Վեցնեակ – Իրան   խորհրդաժողովները: Լիբանանի նախագահ  Միշէլ Սըլէյման  նոյնպէս,   Իրանի նորընտիր նախագահին հետ ունեցաւ հանդիպում մը:

LEAVE A REPLY

Please enter your comment!
Please enter your name here