ԱՏԷԼ ԿԸ ՆԵՐԿԱՅԱՑՆԷ ԵՐԿԽՕՍՈՒԹԵԱՆ ԻՐ ՊԱՅՄԱՆՆԵՐԸ

0
100

Եգիպտոսի  ժամանակաւոր նախագահ Ատէլ  Մանսուր պատրաստակամութիւն  յայտնեց  երկխօսութեամբ լուծելու   երկրին  հակամարտութիւնը, այն պայմանով  որ   ընդդդիմութիւնը դադրեցնէ  բողոքի հաւաքները: Ատէլ նշեց, թէ անվտանգութեան խորհուրդի  բոլոր անդամները  համաձայն  են իր  նախաձեռնութեան:

 Միացեալ  Նահանգներու պետական քարտուղարութեան տեղակալ  Ուիլիյըմ Պըրնզ  երկարաձգեց  Եգիպտոս  կատարած իր  այցելութիւնը՝ հակամարտութեան  կողմերուն միջեւ փոխհասկացողութեան եզրեր  ստեղծելու մտահոգութեամբ: Պըրնզի պնդումներուն տակ, պաշտպանութեան նախարար Ապտէլ Ֆաթահ  Ալ Սիսի  ընդունեց Իսլամական Եղբայրակցութեան  ներկայացուցիչներու պատուիրակութիւն մը: 

Բրիտանական   թերթեր իրենց այսօրուան երէկուան   համարներուն   մէջ կը  գրէին, թէ  եգիպտական  իշխանութիւնները պատրաստ են  ազատ արձակելու  Մոհամմէտ Մորսին, պայմանաւ որ ան   լքէ  Եգիպտոսը:  Ըստ բրիտանական   մամուլին, այս  ծրագիրը  մշակուած է  Ուաշինթընի եւ  Եւրոպական   Միութեան նախաձեռնութեամբ: Մորսի  կալանքի  տակ կը  գտնուի, մայրաքաղաքէն  ոչ շատ հեռու վայրի մը  մէջ:  Մորսիի  կողմնակիցները   երէկ, յաջորդական  չորրորդ օրը  ըլլալով  փորձեցին գրաւել Գահիրէի մէջ գործող  հեռատեսիլի կայանը: Ոստիկանութիւնը, արցունքաբեր կազով   ետ  մղեց ցուցարարները: Գահիրէի  գրեթէ բոլոր գլխաւոր հրապարակներուն  մէջ  բախումներ տեղի կ’ունենան  հակամարտութեան երկու կողմերուն  միջեւ:  Բախումներուն զոհ դարձան տասնեակաւոր  քաղաքցիներ: Մորսիի  կողմնակիցները կը  պնդեն,թէ պայքարը պիտի շարունակեն մինչեւ  վերականգնեն անոր  նախագահի կարգավիճակը:

Միւս կողմէ,  Գահիրէի գերագոյն ատեանը յայտարարեց, թէ  Իսլամական եղբայրակցութեան  ղեկավարներուն դատավարութիւնը պիտի սկսի 25  Օգոստոսին: Տնտեսագիտական  տուեալներու վկայութեամբ,  երկրին վնասները  քաղաքականներկայ  պայմաններուն հետեւանքով կը կազմեն 17.1  միլիառ տոլար:

LEAVE A REPLY

Please enter your comment!
Please enter your name here