ՄԱՐԶԱԿԱՆ – ՍԵՐԵՆԱ ՈՒԻԼԻՅԸՄԶ ԴԱՐՁԵԱԼ ԱՌԱՋԻՆ ԴԻՐՔԻ ՎՐԱՅ

0
121

 Արհեստավարժ թենիսի համաշխարհային  ֆետերասիոնը հրապարակեց   5  Օգոստոսի դրութեամբ, աղջկանց  թենիսի համաշխարհային  դասաւորումը: Սերենա Ուիլիյըմզ կը շարունակէ  գլխաւորել  աղիւսակը:  Պելառուս  Վիքթորիա Ազարենքա  բարձրացաւ երկրորդ դիրքին՝  շրջանցելով  Մարիա  Շարափովան:  Չորրորդ  դիրքին վրայ կու գայ լեհ  Ակնեսքա Ռատուանսքայը, իսկ   հինգերորդ դիրքի վրայ,  չին՝  Լի Նան:

ԽՈՒԱՆ  ԼԱ ՓՈՐԹԱ՝  ՄՈՒՐԻՆԻՕ  ՊԱՐՉԵԼՈՆԱՅԻ  ՀԱՄԱԿԻՐ  Է

Գաթալոնական ակումբի նախկին տնօրէն Խուան Լա Փորթա  դիտել տուաւ, թէ  Ժոզէ Մուրինիօ  Պարչելոնայի  ջերմ համակիր  մըն է:« Մուրինիոյի հետ պայմանագիր կնքել անհնար էր, որովհետեւ պայմանաւորուած էինք Խօսէփ  Կուարտիոլայի հետ: Ան  կը փափաքէր   գաթալոնական ակումբը  փոխադրուիլ» ըսաւ  Լա  Փորթա:  

Ան միաժամանակ  յայտնեց, թէ  կը  յարգէ  Ռէալ  Մատրիտի նախագահ  Ֆլորենթինօ  Փերէզը, սակայն նոյնը  չի կրնար  ըսել Պարչելոնայի այժմու նախագահ  Սանտրօ  Ռոսելի մասին, որովհետեւ անոր որոշումները ցաւալի են .« Կուարտիոլան բազմաթիւ    որակներ ունի, սակայն անոնք  չեն հետաքրքրեր  Ռոսելին». ըսաւ  Լա Փորթա:

ԵՈՒՆԱՅԹԸՏ ՄԵՐԺԵՑ  ՉԵԼՍԻԻ ԱՌԱՋԱՐԿԸ

Մանչեսթըր  Եունայթըտ մերժեց Անգլիոյ հաւաքականի յարձակող  Ուէյն  Ռունին վաճառելու  Չելսիի առաջարկը:  Չելսի, 25  միլիոն սթերլին  գումար մը առաջարկեց  27-ամեայ Ռունիի համար:  Եունայթըտի մարզիչ  Տէյվիտ Մոյզ  մերժեց  Չելսիի առաջարկը, յայտնելով թէ խումբին  մէջ կը  փափաքի պահել Ռունին: Անցնող տարեշրջանին, Ռունի  33 մրցում կատարեց Եունայթըտի շապիկով,   նշանակելով 13 կոլ:

ՌՕՆԱԼՏՕ  ՆՈՐ ՊԱՅՄԱՆԱԳՐՈՒԹՒԻՆ ՄԸ ԿՆՔԵՑ   ՌԷԱԼԻ ՀԵՏ

 Ռէալ Մատրիտի եւ  Փորթուգալի հաւաքականի  յարձակող Քրիսթիանօ Ռոնալտօ  նոր պայմանագրութիւն մը կնքեց  սպանական ակումբին հետ:  Նոր պայմանագրութիւնը կ’աւարտի  2018-ին:  Ռոնալտօ տարեկան 17  միլիոն եուրօ գումար մը պիտի ստանայ : Այս գումարը  շատ աւելի է  քան՝  Մեսիի աշխատավարձը:

Յատկանշական  է, որ   փորթուգալացի ֆութպոլիստը  քան մը օր առաջ կը յայտարարէր, թէ  վստահ  չէր, ասպարէզը  Ռէալի հետ  աւարտելէն:

ՉԵԼՍԻ  45  ՄԻԼԻՈՆ ԿԸ ՊԱՀԱՆՋԷ ԼՈՒԻՍԻ   ՀԱՄԱՐ

Արդէն մարզասէրներուն  ծանօթ է, որ  գաթալոնական  Պարչելոնա ակումբի  տնօրէնութիւնը  կեդրոնական  յետսապահ մը կը  փնտռէ,  նոր եղանակի  սեմին:

Պարչելոնա՝  35  միլիոն սթերլինի  առաջարկ մը ներկայացուց  Չելսիի պրազիլիացի  յետսապահ Տաւիտ Լուիզի համար: Անգլիական ակումբը պահանջեց՝  45:  Այժմ Պարչելոնա  իր ուշադրութիւնը  կեդրոնացուցած է  Լիվըրփուլի յետսապահ Տանիէլ Ակէրի  վրայ: Սպանիոյ հաւաքականի անդամ Ժեռար  Փիքէ   ըսաւ, թէ  բաւական  դժուար պիտի  ըլլայ կեդրոնական պաշտպան մը   գտնել Պարչելոնայի  համար:

Միսւ կողմէ, Պարչելոնա կը փորձէ  իր կազմին մէջ  ունենալ արժանթինեան Նուելս   Օլտ Պոյզ խումբին  27-ամեայ   բերդապահ Նահուէլ  Գուզմանը:

ՍՈԼՏԱՏՕ ՄԻԱՑԱՒ  ԹՈԹԵՆՀԱՄԻ

Սպանիոյ հաւաքականի եւ  Վալենսիայի յարձակող Ռոպերթօ Սոլտատօ միացաւ Թոթենհամի: 28-ամեայ    յարձակողը  չորս տարուան պայմանագրութիւն մը  կնքեց   անգլիական ակումբին հետ:  Փոխանցման սակը կը գնահատուի  26  միլիոն սթերլին:

Անցնող տարեշրջանին Սոլտատօ  46  մրցում կատարած է  Վալենսիայի  շապիկով, նշանակելով  30  կոլ:

ՎԱՐԴԱՆ ՄԻՆԱՍԵԱՆ՝  ՀԱՒԱՔԱԿԱՆԻՆ ԿԸ ՊԱԿՍԻ  ԿԱՅՈՒՆՈՒԹԻՒՆ

 Հայաստանի  հաւաքականի մարզիչ Վարդան Մինասեան  յայտարարեց, թէ   հաւաքականը արդէն ունի իր ձեռագիրը, սակայն անոր կը պակսի  կայունութիւն:

Հայաստանի հաւաքականը  14   Օգոստոսին բարեկամական  հանդիպում մը պիտի ունենայ Ալպանիոյ դէմ:  Մինասեան նշեց, թէ  Հրայր Մկոյեանի, Հենրիխ Մխիթարեանի մասնակցութիւնը կասկածելի  է սոյն հանդիպումին:

LEAVE A REPLY

Please enter your comment!
Please enter your name here