ԼԻԲԱՆԱՆԵԱՆ ԿԱՐՃ ԼՈՒՐԵՐ

0
143

–         Խորհրդարանի նախագահին  գրասենեակը  յայտարարեց, թէ երկրին ապահովական եւ  քաղաքական պայմաններուն  պատճառով,   Նեպիհ Պըրրի  շնորհաւորութիւններ պիտի  չընդունի Ֆիթրի տօնին առիթով:

–         Լիբանանեան օրաթերթերու համաձայն,  հանրապետութեան նախագահ Միշէլ Սըլէյման եւ նորանշանակ վարչապետ  Թամամ Սալամ  Ֆիթրի  տօներէն ետք կը  ծրագրեն   այցելել Սէուտական Արաբիա եւ  հանդիպում մը ունենալ Ապտալլա Պըն Ապտէլ Ազիզ   վեհապետին հետ: Սըլէյմանի եւ Սալամի  խօսակցութիւններուն առանցքը պիտի  ըլլայ  նոր կառավարութեան կազմութիւնը: Սակայն, Սալամի  մօտիկ աղբիւրները  հերքեցին  վերոյիշեալ տեղեկութիւնները:

–         Ահմէտ Ասիրի հրապարակած  վերջին ձայնագրութեան լոյսին  տակ,  Այն Հելու  գաղթակայանին մէջ գործող պաղեստինեան կազմակերպութիւնները  գումարեցին ընդլայնուած նիստ մը:  Ժողովին մասնակիցները  որոշեցին բարելաւել գաղթակայանին ապահովական  իրավիճակը  եւ  մերժեցին  գաղթակայանին կայունութիւնը խախտելու  փորձերը:

–         Ուատի Խալէտի  շրջանը վերջին ժամանակաշրջանին   փոփոխութեան ենթարկած է անունը՝  «Ուատի  Խալէտիստանի» վերածելով:  Ապահովական   կառոյցները կը հաւաստեն, թէ  շրջանը դարձած  է Սուրիոյ այսպէս  կոչուած ազատ բանակին  զինամթերքի պահեստարանը:  Հոմսէն,   Քըսէյրէն եւ այլ  շրջաններէ  փախուստ տուող  զինեալներու իննիսուն առ հարիւրը ապաստան  կը  գտնեն  Ուատի Խալէտի մէջ:

–         Ապահովական  մարմիններու  հետապնդումներուն տակ գտնուող Ֆատէլ Շաքէր թաքնուած է   Այն Հելու գաղթակայանին մէջ:  Արդարութենէ փախուստ տուած  երգիչը  «իֆթար»ներ կը կազմակերպէ  ի պատիւ  Ճընտ Էլ Շամի զինեալներուն:  

–         ՄԱԿ-ի ընդհանուր  քարտուղար  Պան Քի Մուն առաջարկեց  մէկ  տարի պայմանաժամով  երկարաձգել  հարաւային Լիբանանի մէջ տեղակայուած  ՖԻՒՆԻԼ-ի խաղաղապահ  ուժերու ծառայութեան  ժամկէտը:

–         Հրաժարեալ վարչապետ  Նեժիպ Միքաթի հրամանագիր մը  լոյս ընծայեց, որուն հիման վրայ  պետական բոլոր հաստատութիւնները  փակ  պիտի մնան 15  Օգոստոսին՝  Սուրբ  Աստուածածնի Վերափոխութեան տօնին առիթով:

LEAVE A REPLY

Please enter your comment!
Please enter your name here