ՀԱՅԱՍՏԱՆ – ՔԻՒՐՏԻՍՏԱՆ ՅԱՐԱԲԵՐՈՒԹԻՒՆ ՀԱՍՏԱՏԵԼՈՒ ԴՐԱԿԱՆ ՔԱՅԼԵՐ

0
137

 

Քրտական շարք մը լրատուամիջոցներ անդրադարձած են Հայաստանի տնտեսութեան փոխնախարար Տիգրան Յարութիւնեանի կողմէ հիւսիսային Իրաքի Քիւրտիստան այցելութեան՝ նշելով, որ Հայաստանի եւ իրաքեան Քիւրտիստանի կառավարութիւններու ներկայացուցիչները դիւանագիտական եւ տնտեսական հզօր յարաբերութիւններ հաստատելու պատրաստակամութիւն յայտնած են:
Այս մասին խօսուած է նաեւ իրաքեան Քիւրտիստանի վարչապետ Նաճիրվան Պարզանիի եւ Տիգրան Յարութիւնեանի ղեկավարած պատուիրակութեանց հանդիպման ընթացքին:
Քիւրտիստանի կառավարութեան պաշտօնական կայքին վրայ տեղ գտած հաղորդագրութեան համաձայն՝ հանդիպման ներկայ եղած է նաեւ Իրաքի փոխվարչապետ Ռաուշ Նուրի Շաուէյսը:
Ըստ քրտական մամուլին՝ Տիգրան Յարութիւնեան Քիւրտիստանի հետ տարբեր ոլորտներու մէջ յարաբերութիւններ հաստատելու պատրաստակամութիւն յայտնած է Իրաք-Հայաստան առեւտրատնտեսական յանձնախումբի գործունէութեան շրջանակներուն մէջ: Ան կարեւոր նկատած է Հայաստանի եւ Քիւրտիստանի միջեւ առկայ յարաբերութիւններու ամրապնդումը՝ նշելով յատկապէս, թէ Քիւրտիստանի մէջ հայկական ներկայացուցչութիւն բանալու եւ Հայաստան-Քիւրտիստան օդային ուղիղ թռիչքներ հաստատելու հարցերը պէտք է քննուին:
Պարզանի ողջունած է յարաբերութիւններու ամրապնդման նպաստող որեւէ քայլ, որ, նկատի ունենալով բոլոր կողմերուն շահերը՝ կը նպաստէ Քիւրտիստանի զարգացման:
Տիգրան Յարութիւնեան հանդիպում ունեցած է նաեւ Քիւրտիստանի արտաքին գործոց նախարար Ֆալահ Մուսթաֆա Պաքիրի հետ, որ իր կարգին կարեւոր նկատած է Հայաստանի հետ դիւանագիտական յարաբերութիւններու հաստատումը, իսկ հայ պաշտօնեան պատասխանած է, թէ այդ հարցը տակաւին քննարկման փուլի մէջ է:

 

LEAVE A REPLY

Please enter your comment!
Please enter your name here