ՄԱՐԶԱԿԱՆ – ԵՈՒՆԱՅԹԸՏ ԿԸ ՀԵՏԱՊՆԴԷ ՖԷԼԱՅԻՆԻՆ

0
115

Մանչեսթըր Եունայթըտի մարզիչ  Տէյվիտ Մոյզ  վերջնականապէս հրաժարեցաւ Պարչելոնայի  միջնապահ  Սեսկ Ֆապրեկասէն եւ  ուշադրութիւնը կեդրոնացուց Էվըրթընի պելճիքացի միջնապահ Մարուան  Ֆէլայինիի վրայ:  «Կարմիր Սատանաներ»ը   25  միլիոն սթերլինի  գումար մը  պատրաստ  են առաջարկելու   25-ամեայ միջնապահին փոխանցումին համար:

Միւս կողմէ,  մարզիչ  Տէյվիտ Մոյզ նշեց, թէ  Ռունի  վնասուածքի  պատճառով,  կարճ բացակայութիւն մը պիտի ունենայ խումբէն, բայց անմիջապէս պիտի  վերադառնայ: Ան  խուսափեցաւ  մեկնաբանել կատարել  Ռունիի  փոխանցումին մասին  շրջող տեղեկութիւնները:

ՄԽԻԹԱՐԵԱՆ ԱՆՀԱՄԲԵՐ ԴԱՐՁԱԾ Է

Հայաստանի հաւաքականի եւ Պորուսիա Տորթմունտի  միջնապահ Հենրիխ Մխիթարեան ամբողջական ապաքինելէ ետք, անհամբեր կը սպասէ  ֆութպոլի ախոյեանութեան մեկնարկին:

Գերմանիոյ  ֆութպոլի  2013-14  մարզական տարեշրջանի ախոյեանութեան  վարագոյրը պիտի  բարձրանայ   Շաբաթ, 10  Օգոստոսին:

  ՄԱՐԹԻՆՕ ԿԸ ՆԱԽԸՆՏՐԷ ՍԱՆՉԷՍԸ

Գաթալոնական  Պարչելոնա խումբի մարզիչ  Ճերարտօ Մարթինօ նոր մարզաշրջանի սեմին մեծ յոյսեր կապած է  Չիլիի հաւաքականի  յարձակող Ալեքսիս Սանչէսի  հետ: Մարթինոյի  կարծիքով,  24-ամեայ   ֆութպոլիստը  օրինակելի  տիպար մըն  է  Պարչելոնայի մնացեալ ֆութպոլիստներուն համար:

Վերջին  շրջանին լուրեր կը  շրջէին, թէ  Սանչէս պիտի  հեռանայ  Պարչելոնայէն:  Սանչէս,  2011-ին միացաւ Պարչելոնային:  Ան, 87  մրցում կատարած է  գաթալոնական խումբին շապիկով, նշանակելով 26 կոլ:

Միւս կողմէ,  Պարչելոնայի նախկին  մարզիչներէն  Եոհան Գրոյֆ  յայտարարեց, թէ   մարզչութեան  պաշտօնին Մարթինոյի   ընտրութիւնը սխալ քայլ մըն էր՝ Մեսի եւ Նէյմար պիտի կորսուին անոր  ներկայութեան:

ՀԱՅԱՍՏԱՆ ԿԸ ՄԱՍՆԱԿՑԻ ՃԱՏՐԱԿԻ ԵՒՐՈՊԱՅԻ ՊԱՏԱՆԵԿԱՆ ԱԽՈՅԵԱՆՈՒԹԵԱՆ

Հայաստանի  ճատրակի պատանեկան  հաւաքականը 26  ներկայացուցիչներով  պիտի  մասնակցի 28 Սեպտեմբերէն  9 Հոկտեմբերի  միջեւ,  Մոնթենեկրոյի  Պուտվա  քաղաքին մէջ  տեղի ունենալիք  Եւրոպայի  պատանեկան  ախոյեանութեան:

ՍՈՒԱՐԷԶ Կ’ԱԿՆԿԱԼԷ ՈՐ ԼԻՎԸՐՓՈՒԼ   ՅԱՐԳԷ ԽՈՍՏՈՒՄԸ

 Լիվըրփուլ խումբի  յարձակող Լուիս Սուարէզ  կը պահանջէ, որ  անգլիական ակումբի տնօրէնութիւնը  յարգէ անցեալ տարեշրջանի սեմին իրեն  տուած խոստումը:  Ըստ Սուարէզի,  Լիվըրփուլի տնօրէնութիւնը խոստացած է  ընդառաջել այլ ակումբի մը միանալու Սուարէզի  փափաքին, եթէ Լիվըրփուլ ձախողի  հասնիլ «Չեմփիընզ Լիկ» մրցաշարքին:  Անգլիական ակումբը կը  հերքէ նման  խոստումի մը մասին Սուարէզի հաստատումները:  Ըստ երեւոյթին, Սուարէզ, մինչեւ շաբաթավերջ, փոխանցումի   գրաւոր դիմում մը պիտի ներկայացնէ ակումբի տնօրէնութեան:

ԱՆՃԵԼՈԹԻ ԿԸ ՄԵՐԺԷ ԽՕՍԻԼ ՊԷՅԼԻ ՄԱՍԻՆ

Ռէալ Մատրիտի մարզիչ Գառլօ Անճելոթի յայտնեց, թէ կը նախընտրէ չխօսիլ Կարէթ Պէյլի  փոխանցումին մասին, որովհետեւ Թոթենհամի մարզիչ Անտրէ  Վիլաշ Պոաշ կը  զայրանայ   Պէյլի փոխանցումին մասին  խօսակցութիւններէն:

Կարէթ  Պէյլ  ցանկութիւն  յայտնած է միանալու սպանական ակումբին, սակայն  Թոթենհամի  տնօրէնութիւնը կը մերժէ փոխանցումի առաջարկը:

 

LEAVE A REPLY

Please enter your comment!
Please enter your name here