ԱՍՈՐԻՆԵՐՈՒ ՑԵՂԱՍՊԱՆՈՒԹԻՒՆԸ ՃԱՆՉՆԱԼՈՒ ԿՈՉ ԻՐԱՔԻ ՔՐՏԱԿԱՆ ԿԱՌԱՎԱՐՈՒԹԵԱՆ

0
131

 

Ամերիկայի  Միջագետքի կազմակերպութիւնը եւ Իրաքի Քրիստոնէական Օգնութեան Խորհուրդը կոչ ըրած են հիւսիսային Իրաքի Քրտական Շրջանային կառավարութեան, որ պաշտօնապէս ճանչնան Օսմանեան կայսրութեան տարածքին 1915-ին տեղի ունեցած ասորիներու եւ հայերու ցեղասպանութիւնները եւ ներողութիւն խնդրեն անոնց մէջ քիւրտերու մեղսակցութեան համար:
Քրտական Շրջանային կառավարութեան նախագահ Մասուտ Պարզանիի ուղղուած նամակի մը մէջ, ինչպէս նաեւ Օգոստոս 7-ին տեղի ունեցած ասորիներու Նահատակաց օրուան ոգեկոչման արարողութեան ընթացքին շեշտուած է, թէ աշխարհի ասորիները կը պահանջեն, որ քրտական կառավարութիւնը նման քայլերու դիմէ՝ յիշեցնելով, որ 2007-ին Ցեղասպանագէտներու Միջազգային Միութիւնը պաշտօնապէս ճանչցած է ասորիներու եւ յոյներու ցեղասպանութիւնները (նոյն միութիւնը Հայկական Ցեղասպանութիւնը ճանչցած էր 1997-ին):
Նամակին մէջ նաեւ կը շեշտուի, թէ նման ճանաչում մը կենսական է քրտական կառավարութեան համար, որ աշխատանք կը տանի «քրտական ցեղասպանութիւն» պիտակը ապահովելու՝ Իրաքի նախկին նախագահ Սատտամ Հիւսէյնի օրօք քիւրտերուն դէմ իրականացուած ջարդերուն:
Ամերիկայի  Միջագետքի կազմակերպութիւնը Միացեալ Նահանգներու տարածքին ապրող ասորիներու իրաւանց պաշտպան կազմակերպութիւն մըն է, իսկ Իրաքի Քրիստոնէական Օգնութեան Խորհուրդը կը ներկայացնէ Իրաքի քրիստոնեայ համայնքներուն շահերը:

 

LEAVE A REPLY

Please enter your comment!
Please enter your name here