ԱՐՇԻԼ ԿՈՐՔԻԻ ԿԵԱՆՔԻ ԸՆԿԵՐԸ ՄԱՀԱՑԱՒ

0
151

Արշիլ Կորքիի (Ոստանիկ Ատոյեան) ներշնչման աղբիւր Մուկուչ Մեկրուտըր Կորքի, իր մահկանացուն կնքեց 92 տարեկան հասակին:

Վերացական արտայայտչապաշտ նկարչական արուեստի ռահվիրայ Կորքիի մահէն ետք, 65 տարի շարունակ ան եղաւ Կորքիի արուեստը աշխարհին ծանօթացնողն ու Կորքիի հայկական ինքնութիւնը հաստատող գլխաւոր վկան, երբ տասնամեակներ առաջ փորձ կը կատարուէր Կորքիի վերագրել հրէական ծագում:
Ամերիկեան նաւատորմի ծովակալի մը դուստրը՝ Ակնէս Մեկրուտըր, իր կեանքի առաջին երկու տասնամեակները անցուցած է ամերիկեան եւ եւրոպական ցամաքամասերուն վրայ, Ուաշինկթընէն Հոլանտա, Զուիցերիայէն Նիւ Եորք: 19 տարեկանին, Նիւ Եորքի մէջ կը հետեւի Art Students League արուեստի ուսումնարանի դասընթացքներուն, սակայն շատ չանցած՝ համայնավար գաղափարախօսութեան քարոզչութիւն կատարող պարբերաթերթի մը մէջ կը ստանձնէ գրաշարութեան պաշտօն մը:
Նկարիչ Արշիլ Կորքիին կը ծանօթանայ 1941-ին եւ նոյն տարին իսկ կ՛ամուսնանան: Կորքի կը հայկականացնէ անունը եւ զինք կը կոչէ Մուկուչ:
Արուեստի լայն շրջանակներու ծանօթ Մուկուչը կը դառնայ Կորքիի գործերուն շուկայի անպաշտօն վերակացուն: Ան Կորքին կը մղէ, որ մասնակցի զանազան ցուցահանդէսներու:
Կորքիներու կեանքի անկիւնադարձային պահը կ՛ըլլայ 1946 թուականը, երբ հրդեհ մը կը փճացնէ Արշիլի արուեստի գործերու լաւագոյն ընտրանին: Հրդեհէն երկու ամիս ետք, բժիշկները Կորքիի մօտ կը յայտնաբերեն աղիքային քաղցկեղի նախանշաններ: Շատ չանցած՝ ինքնաշարժի արկածի մը պատճառով կը կորսնցնէ իր պաստառներուն կեանք տուող աջ ձեռքը գործածելու կարողութիւնը:
Այս բոլորը Հայկական Ցեղասպանութեան արհաւիրքը ապրած արուեստագէտը հոգեկան ընկճուածութեան կ՛առաջնորդեն, իսկ անհամաձայնութեան մը պատճառով, Մուկուչ իրենց երկու փոքր զաւակներուն՝ Մարոյի եւ Նաթաշայի հետ, կը լքէ բնակարանը: Յուլիս 21, 1948-ին, Կորքի պարանէ մը կախուելով՝ անձնասպան կ՛ըլլայ:
Մուկուչ իր կեանքի յաջորդ հանգրուանին կ՛ամուսնանայ երկու անգամ, սակայն միշտ վառ կը պահէ Արշիլ Կորքիի յիշատակն ու անոր թողած արուեստի ժառանգութիւնը:

 

LEAVE A REPLY

Please enter your comment!
Please enter your name here