ԹՈՒՐՔԵՐՆ ԱԼ ՀԱՏՈՒՑՈՒՄ ԿԸ ՊԱՀԱՆՋԵՆ…

0
115

Անցեալ շաբաթ հայ-թրքական սահմանը հատած եւ ռուս սահմանապահներու կողմէ գնդակահարուած թուրք հովիւին՝ Մուսթաֆա Ուլքերի հետ կապուած միջադէպը կը շարունակէ մնալ Թուրքիոյ լրագրական քննարկումներու օրակարգին վրայ:
Ըստ «Ermenihaber.am» կայքին՝ Թուրքիոյ լոպիական ռազմավարական հետազօտութիւններու «Լոպիսաւ» կեդրոնի ղեկավար Էրճիւմենք Քըլըչ, զրուցելով թրքական «Հապերվաքթիմ» կայքի լրագրողին հետ՝ ըսած է, թէ «հայերն ու հրեաները կարծես թէ աւանդոյթ դարձուցած են թուրքերուն հանդէպ վատ վերաբերմունքը»: Քըլըչն իր հայրենակիցներէն պահանջած է անտարբերութեան չմատնել հովիւին սպանութեան դէպքը:
«Աշխարհի տարածքին 22 երկիր հայկական բանաձեւ ընդունած է, 30 երկիրներու մէջ Հայկական Ցեղասպանութեան յուշարձան կայ, բայց այսօր, բոլոր այդ երկիրները կը լռեն: Հարկաւոր է լռութեան չմատնել տեղի ունեցած վերջին դէպքը (հովիւի սպանութիւնը): Անհրաժեշտ է, որ այդ մէկը պետական մակարդակով պահուի օրակարգի վրայ: Անհրաժեշտ է, որ հայերը նիւթական փոխհատուցում տան սպաննուած հովիւի ընտանիքին: Պէտք չէ միայն ճառերով բողոքել, հարկաւոր է կառավարութեան դիւանագիտական քայլերով յստակ միջամտութիւն ցոյց տալ», ըսած է թուրք փորձագէտը՝ ընդգծելով, որ ինչպէս «Կապոյտ Մարմարա» նաւուն դէպքէն ետք կոշտ հակադարձութիւն ցուցաբերուեցաւ Թուրքիոյ քաղաքացիներ սպաննած Իսրայէլին, նոյնը պէտք է կատարուի Հայաստանի դէմ:
Նշենք, որ «Լոպիսաւ» գրասենեակներ ունի Պոլսոյ եւ Ուաշինկթընի մէջ ու Հայկական Ցեղասպանութեան հարիւրամեակին ընդառաջ կ՛իրականացնէ լոպիական գործունէութիւն ու բողոքներ պիտի յղէ այն երկիրներուն, որոնք ճանչցած են Հայկական Ցեղասպանութիւնը կամ անոր զոհերու յիշատակին նուիրուած յուշակոթողներ տեղադրած են: Ան նաեւ կը սպասարկէ Ատրպէյճանի շահերուն՝ Արցախի հարցով:

Տարօրինակօրէն, ազերիական աղբիւրներ կը հաղորդեն, թէ  հօտը փնտռող  հօտաղը ազգութեամբ  ազերի էր: Որու՞ն հաւատալ…:

 

LEAVE A REPLY

Please enter your comment!
Please enter your name here