ՄԱՐԶԱԿԱՆ – ՄԱՆՉԵՍԹԸՐ ԵՈՒՆԱՅԹԸՏ ՇԱՀԵՑԱՒ ԱՆԳԼԻՈՅ «ՍՈՒՓԸՐ ԳԱՓ»Ը

0
178

Հոլանտացի յարձակող Ռոպին Վան Փըրսիի նշանակած երկու կոլերուն շնորհիւ, Մանչեսթըր Եունայթըտ   2-0 արդիւնքով պարտութեան մատնեց  Ուիկանը եւ շահեցաւ Անգլիոյ «Սուփըր Գափ»ը:  Եունայթըտ,  մարզիչ Տէյվիտ Մոյսի  գլխաւորութեամբ  շահեցաւ առաջին տիտղոսը:

ՀԱՅԱՍՏԱՆԻ ԵՐԻՏԱՍԱՐԴԱԿԱՆ  ՀԱՒԱՔԱԿԱՆԸ ՊԱՐՏՈՒԹԵԱՆ ՄԱՏՆԵՑ ՂԱԶԱԽԻՍՏԱՆԸ

 Աստանայի մէջ, ֆութպոլի  Եւրոպայի  երիտասարդական ախոյեանութեան ընտրական հանգրուանի   10-րդ  խմբակի մրցումներուն,  Հայաստանի հաւաքականը  1-0 արդիւնքով պարտութեան մատնեց Ղազախիստանը:   Հայաստանի կոլը մրցումի  4-րդ վայրկեանին նշանակեց Գագիկ Պօղոսեան:

10-րդ խմբակին մէջ Իսլանտայի հւաքականը,   երկու  մրցումերէ ետք վեց միաւորով կը գլխաւորէ  ընդհանուր դասաւորումը: Խմբակին մէջ ընդգրկուած  են  Հայաստանը,Ղազախիստանը,  Իսլանտան,  Ֆրանսան եւ  Պելառուսը:

ՓՈՐԹՕ  ՇԱՀԵՑԱՒ «ՍՈՒՓԸՐ  ԳԱՓ»Ը

Փորթօ շահեցաւ  Փորթուգալի «Սուփըր Գափ»ը՝  3-0 արդիւնքով պարտութեան մատնելով   Վիթորիա Կիմարէշը:  Լիքա, Մարթինէզ եւ  Լուչօ նշանակեցին  Փորթոյի կոլերը:  Նշենք, թէ  իր պատմութեան մէջ, Փորթօ  27 անգամ շահած է  Փուրթուգալի ֆութպոլի ախոյեանութեան տիտղոսը,  քսան անգամ՝ «Սուփըր Գափ»ը:

ՖԱՊՐԵԿԱՍ՝  ԵՐԲԵՔ ՉԵՄ ՄՏԱԾԱԾ ԼՔԵԼ ՊԱՐՉԵԼՈՆԱՆ

Պարչելոնայի եւ Սպանիոյ հաւաքականի կիսապաշտպան  Սեսկ Ֆապրեկաս  վերջ դրաւ Մանչեսթըր Եունայթըտին միանալու խօսակցութիւններուն:  26-ամեայ  ֆութպոլիստը յայտարարեց, թէ  միշտ երազած է  կրել Պարչելոնայի շապիկը եւ երբեք մտադրութիւն  չունի    լքելու սպանական ակումբը:  Նշենք,թէ Մանչեսթըր Եունայթըտ  պատրաստ է 40 միլիոն  սթերլին գումար մը վճարելու Ֆապրեկասի համար: 

Ներկայիս անգլիական ակումբը կը փորձէ  իր կազմին մէջ ունենալ Էվըրթընի  կիսապաշտպան Մարուան  ֆելայինին:

Միւս կողմէ, Պարչելոնայի  արժանթինցի կիսապաշտպան Խաւիյէ  Մասչերանօ պատրաստակամութիւն յայտնեց  հեռանալու ակումբէն:  29-ամեայ մարզիկը   յայտնեց, թէ պահեստայիններու մէջ մնալու պարագային,  պատրաստ է  հեռանալու ակումբէն:

 

100  ՄԻԼԻՈՆԸ ՇԱՏ Է   ՊԷՅԼԻ ՀԱՄԱՐ

Կարէթ  Պէյլի փոխանցումը Ռէալ Մատրիտին կը թուի, թէ սառած է: Ռէալ Մատրիտ ակումբի նախագահ  Ֆլորենթինօ  Փերէս յայտարարեց, թէ իր կարծիքով,  հարիւր  միլիոն  եուրօն  բաւական մեծ գումար  մըն է Կարէթ Պէյլի համար:  Փերէս ըսաւ, թէ  հիանալի յարաբերութիւններ ունի  Թոթենհամի հետ, սակայն    հարիւր  միլիոնը շատ  մեծ  գումար մըն  է, ոեւէ  ֆութպոլիստ համար:

Սպանական   թերթերը կը  նշեն, թէ Պէյլի փոխանցումը հասած է  115 միլիոն եուրոյի սահմանը:   Թոթենհամ,  Պէյլի  փոխանցումին  փոխարէն կը պահանջէ  100 միլիոն եուրօ, առաւել՝ Ռէալի  ֆութպոլիստներէն  Խօսէ Ռոտրիկէզը եւ Ալվարօ Մորաթան:

 

ՄՈՒՐԻՆԻՕ՝ ՊԱՐՉԵԼՈՆԱ ԺԱՄԱՆԱԿ ԿԸ ՎԱՏՆԷ

 Չելսի խումբի մարզիչ  Ժոզէ Մուրինիօ յայտարարեց, թէ   Պարչելոնա  անիմաստ տեղ ժամանակ կը վատնէ  Տաւիտ Լուիզը   ձեռք բերելու համար:   Պարչելոնա  35  միլիոն սթերլին գումար մը առաջարկած է    Լուիզի փոխանցումը իրականացնելու  համար:  Մուրինօ ըսաւ, թէ  նպատակ չունի վաճառելու Լուիզը եւ  խորհուրդ տուաւ,որ  գաթալոնական ակումբը այլ  պաշտպան մը  փնտռէ:

ՍՈՒԱՐԷԶ ՆԵՐՈՂՈՒԹԻՒՆ  ՊԷՏՔ Է ԽՆԴՐԷ

 Լիվըրփուլ խումբի մարզիչ Պրենտըն    Ռոտճըրզ  յայտարարեց, թէ  յարձակող Լուիս Սուարէզ   ներողութիւն պէտք է խնդրէ ակումբին տնօրէնութենէն եւ մարզիկներէն, որպէսզի  վերամիանայ   առաջին կազմին: Մամուլի մէջ  լոյս  տեսած ուրուկուէյցի   ֆութպոլիստին   յայտարարութիւնները զայրացուցած են անգլիական ակումբը: Սուարէզ  կը  փափաքի լքել  Լիվըրփուլը, սակայն կը պնդէ, թէ այլ ակումբի մը   միանալու   խոստում  տրուած է  իրեն՝ անցեալ տարեշրջանին:   Լիվըրփուլի պատասխանատուները կը հերքեն նման խոստումի մը իրողութիւնը:

 Փարի Սէն Ժերմէնի եւ Ուրուկույէի հաւաքականի յարձակող  Էտինսոն Գաւանի բուռն  յարձակում մը կատարեց Լիվըրփուլի  ղեկավարութեան հասցէին:  Գաւանի  ըսաւ, թէ  Պրենտըն Ռոճըրզ պէտք է  բառարանին մէջ կարդայ «յարգանք» եւ «հաւատարմութիւն» բառերուն բացատրութիւնը:  

ԱՆՃԵԼՈԹԻ՝  ՌՈՆԱԼՏՕ  ՕՐԻՆԱԿ ԿԸ ԾԱՌԱՅԷ  ԵՐԻՏԱՍԱՐԴՆԵՐՈՒՆ

 Ռէալ Մատրիտ խումբի մարզիչ Գառլօ Անճելոթի  դրուատեց  Քրիսթլիանօ Ռոնալտօն, նշելով, թէ  փորթուգալացի  յարձակողը իր   ընթացքով, տիպար  օրինակ կը ծառայէ երիտասարդ ֆութպոլիստներուն:  Անճելոթի  յայտնեց, թէ իր խումբը պատրաստ է   Սպանիոյ ախոյեանութեան նոր   մրցաշրջանին:

 Ռէալ Մատրիտ  կը փորձէ իր կազմին մէջ ունենալ  Իտալիոյ հաւաքականի եւ Ա.Սէ. Միլանի երիտասարդ   յետսապահ  Մաթիա Տէ  Շիլիօն:   Մասնագէտները՝ «Փոքրիկ Մալտինի»  կը կոչեն  20-ամեայ ֆութպոլիստը:  

ԱՆԳԼԻԱ  ՀԱՒԱՆՈՒԹԻՒՆ  ԿՈՒ ՏԱՅ  2022-Ի ՄՈՆՏԻԱԼԸ  ՁՄԵՌԸ ԿԱՅԱՑՆԵԼՈՒ ԱՌԱՋԱՐԿԻՆ

Անգլիոյ ֆութպոլի ֆետերասիոնի  նախագահ  Կրէկ  Տայք  յայտարարեց, թէ անհնար է  Մոնտիալ  2022-ը  ամրան ընթացքին կայացնել Քաթարի մէջ: «Նոյնիսկ  եթէ  մարզադաշտերուն մէջ  զետեղուին  օդափոխութեան համակարգեր,  համակիրներուն համար անհնար պիտի  ըլլայ  դիմանալ տաք եղանակին». ըսաւ ան:

ՖԻՖԱ-ի նախագահ Սեփ Փլաթըր նոյնպէս արտայայտուած էր   2022-ի Մոնտիալը  ձմրան կայացնելու կարելիութեան մասին:  Աւելի կանուխ, ՖԻՖԱ-ի  նախագահութեան անդամ Թէօ  Ցուանցիքըր    մեծագոյն սխալը նկատած էր՝  Քաթարին Մոնտիալ կազմակերպելու իրաւունք շնորհելու որոշումը:

ՌՈՒՆԻ ՇՆՈՐՀԱԿԱԼՈՒԹԻՒՆ ՅԱՅՏՆԵՑ   ՀՈՃՍԸՆԻՆ

 Մանչեսթըր Եունայթըտի  յարձակող  Ուէյն Ռունի  շնորհակալութիւն յայտնեց Անգլիոյ հաւաքականի մարզիչ  Ռոյ Հոճսընին, զինք  հաւաքականի կազմին  մէջ ընդգրկելու  որոշումին համար:

Ռունի կը փափաքի   հեռանալ Մանչեսթըր Եունայթըտէն:  Ակումբի  տնօրէնութիւնը արգիլած է  Ռունիին մարզուիլ  առաջին  խումբին հետ: Ներկայիս  Ռունի կը մարզուի  Եունայթըտի  երկրորդ  խումբին հետ:

ՄՈՍԿՈՒԱՅԻ ՄԷՋ ՍԿՍԱՆ ԱԹԼԵԹԻԶՄԻ ԱՇԽԱՐՀԻ ԱԽՈՅԵԱՆՈՒԹԵԱՆ ՄՐՑՈՒՄՆԵՐԸ

Անցնող  Շաբաթ օր, Մոսկուայի մէջ, նախագահ Վլատիմիր Փութինի    ներկայութեամբ   տեղի ունեցաւ աթլեթիզմի աշխարհի ախոյեանութեան մրցումներուն բացումը:  Մրցումներուն  փակումը  տեղի պիտի ունենայ  Կիրակի,  18  Օգոստոսին:

 100 եւ 200 մեթր վազքի աշխարհի  ախոյեան՝ ճամայիքացի  Ուսէյն  Պոլթ,  10.07  երկվայրկեանէն  հատեց հարիւր  մեթրը եւ  ստացաւ կիսաեզրափակիչին մասնակցելու իրաւունք:

ՖՈՒԹՊՈԼԻ  ԲԱՐԵԿԱՄԱԿԱՆ  ՄՐՑՈՒՄՆԵՐ

Եւրոպական բազմաթիւ  ակումբներ  կը շարունակեն  յառաջիկայ  մարզական  տարեշրջանի  իրենց  նախապատրաստութիւնները: Ծայրագոյն ասիական ոստաններ  շրջագայութեան  մեկնած Պարչելոնա  3-1 արդիւնքով պարտութեան  մատնեց   Մալեզիոյ բոլոր  աստղերը ներկայացնող հաւաքականին:   Սեսկ Ֆապրեկաս,  Նէյմար եւ  Փիքէ  նշանակեցին գաթալոնական  խումբին կոլերը:  Հելսինքիի մէջ, Ֆինլանտա, Արսենալ՝  3-1 արդիւնքով պարտութեան մատնեց  Մանչեսթըր Սիթիին:  Թէօ Ուոլքոթ,Աարոն Ռամզի եւ Օլիվիյէ  Ժիրու նշանակեցին « Կանըրզ»ներուն կոլերը:

Տապլինի մէջ,  Իրլանտա,  Լիվըրփուլ  1-0 արդիւնքով պարտութիւն մը կրեց Սելթիքէն:  Միացեալ Նահանգներու Սենթ Լուիս  քաղաքին մէջ,  Ռէալ Մատրիտ  3-0 արդիւնքով պարտութեան  մատնեց Ինթէր Միլանը:  Գագա, Ռոնալտօ եւ Ալվարէս (սեփական  բերդէն ներս)  նշանակեցին սպանական խումբին կոլերը:

Աթլեթիքօ  Մատրիտ  2-0 արդիւնքով պարտութեան մատնեց  Լաս Փալմասը:  Տաւիտ  Վիլա իր առաջին կոլը նշանակեց  Աթլեթիքոյի   շապիկով:

ՀԱՅԱՍՏԱՆԻ  ՀԱՒԱՔԱԿԱՆԸ ԿԸ ՆԱԽԱՊՏՐԱՍՏՈՒԻ  ԱԼՊԱՆԻՈՅ ԴԷՄ ՄՐՑՈՒՄԻՆ

Հայաստանի  ֆութպոլի  հաւաքականը  Չորեքշաբթի, 14  Օգոստոսին,  Թիրանայի մէջ  բարեկամական մրցում մը պիտի կատարէ  Ալպանիոյ հաւաքականին դէմ:  Հաւաքականի անդամ, կիսապաշտպան  Մարքոս Պիզելի յայտնեց, թէ հաւաքականին  բոլոր մրցումները դժուար պիտի ըլլան:

 Կիսապաշտպան  Հերիխ Մխիթարեան, վնասուածքի պատճառով,   պիտի  բացակայի  Ալպանիոյ դէմ  Հայաստանի հաւաքականին  մրցումէն: Հաւաքականի անդամ  Արաս Օզպիլիս  նշեց, թէ  Մխիթարեանը  շատ կարեւոր ֆութպոլիստ է   հաւաքականին համար, սակայն անհրաժեշտ է ցոյց տալ, որ  Հայաստանի հաւաքականը կրնայ խաղալ եւ  յաղթել առանց յառաջատար  ֆութպոլիստներու:

ՏՈՐԹՄՈՒՆՏ  ՅԱՂԹԱՆԱԿՈՎ ՍԿՍԱՒ  ԵՂԱՆԱԿԸ

 Ուրբաթ օր  պաշտօնապէս  սկսան Գերմանիոյ  ֆութպոլի 2013-14 տարեշրջանի ախոյեանութեան մրցումները: Գերմանիոյ փոխախոյեան  Պորուսիա  Տորթմունտ  իր առաջին հանդիպումին, 4-0 արդիւնքով պարտութեան մատնեց Օկսպուրկը:  Տորթմունտի մարզիչ Եուրկէն  Գլոփ  յայտարարեց, թէ  քիչ խումբեր կրնան Օկսպուրկի մէջ չորս  գնդակ  զետեղել տեղւոյն խումբին բերդը:

Միւս կողմէ,  Պայերն Միւնիխ ակումբի  նախագահ Գառլ Հայնց Ռումենիկէ   բացառեց խումբի յարձակող Մարիօ  Մանջուկիչը, Տորթմունտի յարձակող  Ռոպերթ Լեւանտովսքիի հետ   փոխանակելու տարբերակը:    Լեհաստանի հաւաքականի յարձակողը կը փափաքի հեռանալ Տորթմունտէն, սակայն ակումբին  ղեկավարութիւնը կը  մերժէ հրաժարիլ  Լեւանտովսքիէն:

Պայերն Միւնիխի  մարզական  հարցերու տնօրէն  Մաթիաս Զամէր  յայտարարեց, թէ  ողբերգութիւն  պիտի չպատահի, եթէ մարզիչ Խօսէփ Կուարտիոլա  առաջին  եղանակին որեւէ մրցանակ  չպարգեւէ   պաւարիական ակումբին:

 

Գերմանիոյ բաժակի  1/16-րդ հանգրուանի մրցումներուն, Պորուսիա Տորթմունտի մրցակիցը պիտի  ըլլայ Միւնիխ -1860-ը,  իսկ Պայերն Միւնիխի մրցակիցը՝  Հանովըր 96-ը:

 

ՖԱԼՔԱՈՅԻ ԱՌԱՋԻՆ ԿՈԼԸ ՖՐԱՆՍԱՅԻ ՄԷՋ

Մոնաքօ յաղթանակով սկսաւ  Ֆրանսայի ֆութպոլի ախոյեանութիւնը: Առաջին դասակարգի նորեկը,  շնորհիւ Ռիվիէրէի (82-րդ վայրկեան) եւ  Ֆալքաոյի (87-րդ վայրկեան)  նշանակած կոլերուն,  յաջողեցաւ մրցակիցի  դաշտին մէջ,  2-0 արդիւնքով պարտութեան մատնել  Պորտօն:  Մարզիչ  Միշէլ Տէր  Զաքարեանի գլխաւորած Նանթը, 2-0 արդիւնքով  պարտութեան մատնեց Պասթիան:   Լիոն՝  չորս անպատասխան գնդակ զետեղեց  Նիսի  բերդին մէջ:

 

 

 

 

LEAVE A REPLY

Please enter your comment!
Please enter your name here