26 ՊԱՂԵՍՏԻՆՑԻՆԵՐ ԱԶԱՏ ՊԻՏԻ ԱՐՁԱԿՈՒԻՆ ԱՅՍՕՐ

0
104

Եթէ  իսրայէլեան  կառավարութեան  տուած  խոստումը ճիշդ դուրս գայ,  պաղեստինցի 26 արգելափակեալներ ազատ պիտի արձակուին այսօր: Ըստ իսրայէլեան կառավարութեան, ազատ արձակելու որոշումը առնուած է  իբրեւ բարի կամեցողութիւն իսրայէլապաղեստինեան  բանակցութիւններուն: Նշենք, թէ վաղը՝  Չորեքշաբթի,  Երուսաղէմի մէջ  Միացեալ Նահանգներու   հովանաւորութեան տակ պիտի  վերսկսին  Ուաշինկթընի մէջ  մեկնարկած   խաղաղութեան բանկցութիւնները:

  Խաղաղութեան  բանակցութիւններու նախօրէին, իսրայէլեան կառավարութիւնը  կանաչ լոյս  տուաւ բռնագրաւուած  հողերու վրայ  1200 բնակելի  միաւորներ կառուցելու  ծրագրի մը: Իսրայէլեան կառավարութիւնը անտեսեց պաղեստինեան կողմին քննադատութիւնները: Պաղեստինեան Իշխանութեան գլխաւոր բանագնաց Սայէպ Օրէյղաթ դատապարտեց  Արեւմտեան Ափին եւ Երուսաղէմի մէջ բնակութեան նոր   միաւորներ կառուցելու  իսրայէլեան կառավարութեան  որոշումը:

 «Սքայ Նիուզ» լրատուական գործակալութիւնը հաղորդեց, թէ  պաղեստինեան կողմը  կ’ուսումնասիրէ բանակցութեան հանդիպումէն  բացակայելու  կարելիութիւն մը, առ ի բողոք իսրայէլեան բնակութեան ծրագիրներուն:   Միւս կողմէ, Միջին Արեւելքի խաղաղութեան ամերիկացի բանագնաց Մարթին Էնտիք այսօր պիտի  ժամանէ  Երուսաղէմ: Իսկ  միջինարեւելեան  օստաններ այցելող Գերմանիոյ արտաքին գործոց նախարար  Կիտօ Ուեսթէրուելէ զգուշացուց, թէ Միջին Արեւելքի խաղաղութեան բանակցութիւնները հասած են  ճակատագրական հանգրուանի մը  առջեւ,  հետեւաբար անհրաժեշտ է  կառուցողական մօտեցում  ցուցաբերել  խաղաղութեան  գործընթացին:

Իսրայէլեան բանակը  երէկ, Արեւմտեան Ափին մէջ  ձերբակալեց  12  պաղեստինցիներ:

LEAVE A REPLY

Please enter your comment!
Please enter your name here