ԱՌԵՒԱՆԳՈՒԱԾ ԹՈՒՐՔ ՕԴԱՉՈՒՆԵՐՈՒՆ ԹՂԹԱԾՐԱՐԸ ԶԵՐՕ ԿԷՏԻ ՎՐԱՅ

0
140

Առեւանգուած երկու  թուրք  օդաչուներուն թթղթածրարը կը մնայ  միեւնոյն   նախնական վիճակին մէջ:  Լիբանանեան  կառավարութիւնը  հետզհետէ կը համոզուի, թէ առեւանգումին ետին պահուած են քաղաքական  հարցեր: Թուրքիոյ արտաքին գործոց նախարարութիւնը հաւաստիացուց, թէ առեւանգումը  հետեւանքներ պիտի  չունենայ  երկու  երկիրներուն փոխյարաբերութիւններուն, ինչպէս նաեւ Թուրքիոյ մէջ հաստատուած  լիբանանցիներու վրայ:

Ներքին գործոց նախարար Մարուան Շարպէլ  անընդունելի նկատեց Ազէզի մէջ առեւանգուած  լիբանանցիներու  հարազատներուն յղած  սպառնալիքները:  Նախարարը  միաժամանակ  զգուշացուց  օդակայանի ճանապարհը փակելու  փորձերէն:  Շարպէլ  ապահովական նիստ մը գումարեց  օդակայանին  մէջ, օդակայանի անվտանգութեան ընդհանուր պատասխանատու, գնդապետ Ժան  Թուլուզեանի գրասենեակին մէջ, խորհրդարանական  հանրօգուտ  շինութեանց եւ փոխադրութեան  յանձնախումբի  պետ, երեսփոխան Մուհամմէտ Քապպանիի եւ ապահովական կառոյցներու  ներկայացուցիչներու մասնակցութեամբ: Սոյն նիստէն բացակայեցան նախարար Ղազի Արիտին եւ  խորհրդարանական յանձնախումբին  մաս  կազմող  Հըզպալլայի երեսփոխանները:  Շարպէլ   նիստէն մեկնեցաւ, առանց կատարելու  որեւէ  յայտարարութիւն:  Երեսփոխան Քապպանի յայտնեց, թէ օդակայանին անվտանգութիւնը  քաղաքական  որոշումի կարօտող   հարց մը դարձած  է:

Սուրիոյ   ընդդիմադիր ազգային խորհուրդի  ներկայացուցիչ  Հալիտ Հոճա յայտարարեց, թէ  առեւանգողերը մերժած են  օդաչուները ազատ արձակելու  նպատակով  Սէուտական Արաբիոյ եւ Քաթարի կողմէ  առարկուած 50-60  միլիոն տոլարի գումար:  Ըստ Ճոճայի, անոնք՝ առեւանգողները,  օդաչուներուն  փոխարէն  կը պահանջեն ազատ արձակել Ազէզի մէջ առեւանգուած լիբանանցիները: Հոճայի կարծիքով, օդաչուներու հարցը  կարելի  պիտի չըլլայ լուծել կարճ  ժամանակամիջոցի մէջ:

LEAVE A REPLY

Please enter your comment!
Please enter your name here