ՏԵՄՍԻ ԿԸ ԲԱՑԱՏՐԷ ՍՈՒՐԻՈՅ ՔԻՄԻԱԿԱՆ ԶԷՆՔԵՐՈՒՆ ՊԱՐԱԳԱՆ

0
112

Միացեալ Նահանգներու  բանակի միացեալ  ուժերու շտապի պետ, Մայքըլ Տեմսի, միջինարեւելեան շրջագայութեան ծիրին մէջ այցելեց Իսրայէլ:  Թել Աւիւի մէջ Տեմսի յաջորդական  հանդիպումներ ունեցաւ  Իսրայէլի   վարչապետ Պենիամին Նեթանիահուի եւ  պաշտպանութեան նախարար  Պենի Կանցի   հետ:  Լրագրողներուն  հետ  ունեցած զրոյցին ընթացքին,  Տեմսի  յայտնեց, թէ սուրիական բանակը անվտանգութեան նկատառումներէ  մեկնելով, ժամանակ առ  ժամանակ տարբեր   վայրեր կը  փոխադրէ քիմիական զէնքերը:  Միացեալ Նահանգներ  15  միլիոն տոլարի ներդրում մը խոստացաւ կատարել Սուրիոյ  ընդդիմութեան իշխանութեան  ազդեցութեան տակ գտնուող  շրջաններուն:  Օգնութիւններու մեծամասնութիւնը պիտի բաշխուի երկրին  ենթակառոյցը    վերաշինելու ծրագիրներուն:   Գերմանիա եւ  Արաբական Միացեալ Էմիրութիւնները նոյնպէս  պատրաստակամութիւն յայտնեցին մասնակցելու  օժանդակութեան  ծրագիրներուն:  Այս   սնտուկը  պիտի  գործէ  անջատ եւ առնչութիւն պիտի չունենայ  մարդասիրական օգնութեան համար ստեղծուած  սնտուկին:

Հալէպի մէջ առեւանգուած յոյն ուղղափառ  համայնքի Պուլոս Եազըճի եւ ասորի համայնքի Եուհաննա Իպրահիմ եպիսկոպոսներուն ճակատագրին  վերաբերեալ վերջին  տեղեկութիւնները կը յայտնեն, թէ  երկու  հոգեւորականները, ծայրայեղականներու  ձեռամբ սպաննուած են Մայիս ամսուան ընթացքին:

«Տը Նիւ Եորք Թայմզ»  օրաթերթը կը գրէ, թէ  Սուտան՝ քաթարեան  դրամագլուխով  եւ  Թուրքիոյ ճանապարհով  զէնք կը  հայթայթէ Սուրիոյ ընդդիմութեան: Ռազմական գետնի վրայ, բանակը կայունութիւն  վերահաստատեց  Համայի  կարգ մը  գիւղերու մէջ  : « Ալ  Մէյէտին»  հեռատեսիլի կայանը հաղորդեց, թէ  Ճեպհէթ  Ալ Նուսրայի   ընդհանուր  պատասխանատուն՝ Իմէտ Ահմէտ սպաննուած է Դամասկոսի մէջ:

LEAVE A REPLY

Please enter your comment!
Please enter your name here