ԹՈՒՐՔ ՍՊԱՆԵՐ՝ ՃԵՊՀԷԹ ԱԼ ՆՈՒՍՐԱՅԻ ԶԳԵՍՏՆԵՐՈՎ ԿԸ ԹԱՓԱՆՑԵՆ ՍՈՒՐԻԱ

0
122

Միջազգային  լրատուական գործակալութիւններ կը  հաղորդեն, թէ  մօտաւորապէս երկու հարիւր   թուրք սպաներ, Ճեպհէթ Ալ Նուսրա  ծայրայեղական   խմբաւորումին  արտահագուստով    թափանցած են  Սուրիոյ  Հալէպ քաղաքի մատոյցները: Թուրքիոյ  սահմանագծին մօտ  քիւրտերու եւ Ճեպհէթ Ալ Նուսրայի  զինեալներուն միջեւ  մագլցումը կը մնայ  նոյն լարուածութեան վրայ:   Սուրիոյ քրտական Ժողովրդային Միութիւն  Կուսակցութեան  պետ  Սալիհ Մուսլիմ  դարձեալ այցելեց  Անգարա: Թուրքիոյ արտաքին գործոց նախարար Ահմէտ Տաւուտօղլու   հերքեց   հիւսիսային  Սուրիոյ   քիւրտ բնակիչները   սպաննելու մասին  տեղեկութիւնները, զանոնք նկատելով «մտացածին»:

Ծայրայեղականները  պատանդ  վերցուցին  պելառուս եւ  մոլտովացի երկու կին:

Քուէյթեան «Քապաս» օրաթերթը հաղորդեց, որ Սուրիոյ տագնապի լուծման «Ժընեւ -2» միջազգային խորհրդաժողովի գումարումին համար միջազգային գաղտնի ու բացայայտ ջանքերը կ՛արագանան: Դիւանագիտական բարձրաստիճան աղբիւրներ թերթին յայտնած են, որ այդ խորհրդաժողովի գումարման ձախողութիւնը դարձեալ օրակարգի նիւթ պիտի դարձնէ Սուրիոյ մասնատման հարցը, որովհետեւ տագնապին առնչակից կողմերէն որեւէ մէկը չի կրնար ճակատամարտը վճռել:
Ըստ նոյն աղբիւրներուն՝ Սուրիոյ մասնատման ընտրանքը, որուն «Բ. ծրագիր» անունը կը տրուի, «թէ՛ դիւրին է, թէ՛ դժուար», որովհետեւ եթէ վարչակարգը պատրաստ է երկրին հիւսիսը սուրիական ազատ բանակին հետ դաշնակից իսլամական պետութեան մը զիջելու, ապա ան առայժմս կը մերժէ Դամասկոսէն հրաժարիլ:
«Եթէ ծովեզերեայ շրջաններուն մէջ քրիստոնեաներու հետ դաշնակից ալաուիական պետութիւն մը հիմնել կարելի է, ապա տիւրզիներու՝ իրենց բնակած շրջաններուն վրայ վերահսկողութիւն հաստատելու հարցը աւելի՛ բարդ է: Մինչ քիւրտերու ճակատագիրը գրեթէ վճռուած կը թուի, եւ անոնք ամբողջական կամ հիւսիսային Իրաքի նման մասնակի անկախութիւն պիտի ունենան, Դամասկոսի եւ Հալէպի առեւտրականները վարչակարգին հետ եւ անոր դէմ եղող խմբակներու բաժնուած են: Աղբիւրները կը նշէն, որ թէեւ հիւսիսային Սուրիոյ մէջ անջատ պետութեան մը կազմութիւնը կարելի է, ատիկա իսլամականներուն եւ Սուրիական ազատ բանակին միջեւ կռուախնձոր պիտի մնայ», գրած է թերթը:

Սուրիոյ ընդդիմադիր եւ յեղափոխական ուժերը  Իսթանպուլի մէջ  խորհրդաժողով մը գումարեցին երէկ:

LEAVE A REPLY

Please enter your comment!
Please enter your name here