ԻՐԱՆԻ ԱՐՏԱՔԻՆ ՔԱՂԱՔԱԿԱՆՈՒԹԻՒՆԸ ՀԱՒԱՍԱՐԱԿՇՌՈՒԱԾ ՊԻՏԻ ԸԼԼԱՅ

0
118

Իրանի նախագահ Հասան Ռոհանի նշեց, որ իր կառավարութեան արտաքին քաղաքականութիւնը հաւասարակշռուած պիտի ըլլայ՝ Իրանի ապահովութիւնը եւ բարգաւաճումը երաշխաւորելու համար: Ան Իրանի խորհրդարանին առջեւ իր արտասանած խօսքին մէջ յայտնեց, թէ հաւասարակշռուած ըլլալ կը նշանակէ ձգտումներուն եւ իրողութեան միջեւ հաւասարակշռութիւն հաստատել՝ վստահեցնելով, որ իր կառավարութեան արտաքին քաղաքականութիւնը հիմնուած է Իրանի ազգային շահերուն դէմ լարուածութիւններու կանխարգիլման վրայ: Ռոհանի շեշտեց, որ այդ քաղաքականութիւնը նաեւ այլ երկիրներու հետ վստահութեան հաստատման վրայ հիմնուած է:
Միւս կողմէ, Իրանի արտաքին գործոց նախարար Ալի Աքպար Սալեհի յայտնեց, որ վստահ է, թէ Իրանի հիւլէական թղթածրարի հարցը դէպի լուծում կ՛ուղղուի: Իրանեան «Ֆարս» լրատու գործակալութիւնը հաղորդեց, որ Սալեհի իր պաշտօնավարութեան աւարտին տրուած մամլոյ ասուլիսին ընթացքին աւելցուց, որ Իրանի արտաքին գործոց նոր նախարար Ճաուատ Զարիֆ նախարարութեան մէջ փորձառութիւն ունեցող եւ արհեստավարժ դիւանագէտ մըն է:
«Վստահ եմ, որ ան իր առաքելութեան մէջ պիտի յաջողի: Ան հանրապետութեան նախագահին եւ անոր մերձաւոր շրջանակին վստահութիւնը կը վայելէ», աւելցուց Սալեհի:

 

LEAVE A REPLY

Please enter your comment!
Please enter your name here