ՂԱՐԱԲԱՂԵԱՆ ԲՈՒՐԴԷ ԹԵԼԸ ՊԻՏԻ ԱՐՏԱԾՈՒԻ ՌՈՒՍԻԱ

0
102

Ղարաբաղեան «Ֆորեստ» ընկերութիւնը կը պատրաստուի բուրդէ թել արտածելու Ռուսիա: Այս մասին «Նիուզ»ի թղթակիցին յայտնած է ընկերութեան տնօրէն Իրինա Պետրոսեանը: Ձեռնարկութիւնը աշխատանքներու պիտի սկսի Սեպտեմբեր 2013-ին եւ պիտի արտադրէ ո՛չ միայն բուրդէ թել, այլ բուրդէ գուլպաներ:
Այս նախագիծը Լեռնային Ղարաբաղի փոխվարչապետ Արթուր Աղաբեկեանի  մշակած եւ ներդրողներու առաջարկուած ծրագիրին մաս կը կազմէ։ Երկու այլ ընկերութիւններ ալ «Ֆորեստ»էն թել պիտի գնեն. անոնցմէ մէկը «Նայթեքս» ձեռնարկութիւնն է (Մարալիկի բամպակի վերամշակման գործարանը), որ իր կարգին բուրդէ գուլպաներ եւ գործուածք պիտի արտադրէ:
«Ֆորեստ»ը կը ծրագրէ բուրդ գնել ողջ Ղարաբաղէն, ինչպէս նաեւ Հայաստանի Սիւնիքի, Գեղարքունիքի մարզերէն: 2014-ին ընկերութիւնը կը պատրաստուի 150 թոն բուրդ կուտակել:
Ընկերութիւնը կը պատրաստուի մասնակցելու Հայաստանի եւ Լեռնային Ղարաբաղի պաշտպանութեան նախարարութիւններու մրցումներուն՝ բանակին բուրդէ կիսագուլպաներ մատակարարելու համար: Իսկ թելի համար շուկան, բացի Հայաստանէն եւ Ղարաբաղէն, պիտի ծառայէ նաեւ Ռուսիոյ: «Այնտեղից մեզ արդէն յառաջիկայ արտադրանքի պահանջարկ ներկայացրել են: Մեզ օգնում է  այն հանգամանքը, որ  Ռուսաստանի հարաւում, ինչպէս նաեւ Վրաստանում եւ Հայաստանում  բրդէ թելի արտադրութեան գործարան չկայ: Ուստի մենք հնարաւորութիւն ունենք իւրացնել ռուսաստանեան շուկայի  մի մասը», եզրափակած է Իրինա Պետրոսեանը:

 

LEAVE A REPLY

Please enter your comment!
Please enter your name here