ՕՃԱԼԱՆԻ ԵՂԲԱՅՐԸ ԿԸ ԲՈՂՈՔԷ ԱՆՈՐ ՊԱՅՄԱՆՆԵՐԷՆ

0
131

Ցմահ բանտարկութեան դատապարտուած քիւրտ ղեկավար Ապտուլլա  Օճալանի եղբայրը՝ Մեհմէտ, այցելեց իր եղբօրը ու ըսաւ, թէ շատ դժգոհ էր իր եղբօր բանտային պայմաններէն եւ անոր վրայ պարտադրուած իրաւական սահմանափակումներէն։ Ան խիստ հակազդեցութիւն ցոյց տուաւ նաեւ այն շշուկներուն, ըստ որոնց՝ Օճալանի համար «վիլլա» մը կը պատրաստուի։
Մեհմէտ Օճալան ըսաւ. «Եղբայրս՝ Ապտուլլա Օճալան, կամ Աբօ, ի՛նչ անուն կ՛ուզէք՝ տուէ՛ք, երկու տարիէ ի վեր զրկուած է փաստաբաններուն հետ խօսելու իրաւունքէն։ Կ՛ըսուի նաեւ, որ ան ցկեանս բանտարկեալներու համար պատրաստուած նոր օրէնքէն պիտի չկարենայ օգտուիլ։ Իրաւական պետութեան մը մէջ այսպիսի բան կ՛ըլլա՞յ։ Օրէնքները բոլորին համար ալ նոյն ձեւով պէտք չէ՞ որ գործադրուին»։
Ան անդրադարձաւ նաեւ հաշտութեան գործընթացին եւ ըսաւ, որ քիւրտերը իրենց առաւելագոյն նպաստը կը բերեն գործընթացին, բայց դիմացի կողմն ալ պէտք է բերէ իր նպաստը, եթէ իսկապէս լուծում մը կը փնտռուի։ «Օճալանն է, որ գլխաւոր բաժինը ունի հաշտութեան գործընթացին մէջ, ուրեմն պէտք է բարելաւուին անոր բանտային պայմանները։ Այս վիճակին մէջ, ան որքա՞ն կրնայ նպաստել հաշտութեան», ըսաւ Մեհմէտ Օճալան՝ աւելցնելով. «Կ՛ուզենք, որ ընտանիքներն ու փաստաբանները ազատօրէն կարենան Իմրալը երթալ»։
Մեհմէտ Օճալան օգտուած էր այն որոշումէն, ըստ որուն՝ Օճալանի ընտանիքը ամէն ամսուան երկրորդ Երկուշաբթի օրը կրնայ տեսակցութիւն մը ունենալ Օճալանի հետ։

 

LEAVE A REPLY

Please enter your comment!
Please enter your name here