21 ԶՈՀ, 125-Է ԱՒԵԼԻ ՎԻՐԱՒՈՐ՝ ՀԱՐԱՒԱՅԻՆ ԱՐՈՒԱՐՁԱՆՆԵՐՈՒ ՄԷՋ ԱԿԱՆՈՒԱԾ ԻՆՔՆԱՇԱՐԺԻ ՄԸ ՊԱՅԹՈՒՄԻՆ ՀԵՏԵՒԱՆՔՈՎ – ՈՒՐԲԱԹ ՕՐ՝ ԱԶԳԱՅԻՆ ՍՈՒԳ

0
1406

    Խռովարարութեան  ձեռքերը կը  փորձեն  խանգարել Լիբանանի  քաղաքային  կայունութիւնը: Այսօր երեկոյեան, ժամը  6. 08-ին ականուած ինքնաշարժ մը պայթեցաւ հարաւային արուարձաններու Ռուէյս  շրջանի  «Սէյիտ  Ալ Շուհատէ» կեդրոնատեղիին  մօտակայ  վայրի մը  մէջ:  Պայթումը պատահեցաւ«Մահֆուզ Սթոր» հագուստեղէնի  խանութիւն  եւ վառելանիւթի  կայանի մը  միջեւ գործող գլխաւոր ճանապարհին վրայ: Պայթումին բոցերը տարածուեցան բնակելի շէնքերուն ուղղութեամբ: 

Լիբանանեան  Կարմիր Խաչի   ընդհանուր  քարտուղար  Ճորճ  Քաթաննէ  յայտարարեց , թէ պայթումին  հետեւանքով վիրաւորուած են   հարիւր քսանէ  աւելի  անձեր, կան նաեւ մեծ թիւով  զոհեր: Ներքին գործոց նախարարութիւնը  հաղորդեց, թէ ականուած  ինքնաշարժ մը  պայթած է  հարաւային արուարձաններու մէջ:  Առողջապահութեան նախարարութիւնը    բոլոր հիւանդանոցներէն  պահանջեց անմիջական օգնութիւն ցուցաբերել  պայթումէն տուժած  քաղաքացիներուն: Քաղաքային պաշտպանութեան  միաւորներ անմիջապէս  փութացին   պայթումին  վայրը եւ  առաջնային  օգնութիւն ցոյց տուին վիրաւորներուն: Հրշէջներ փութացին  փորձեցին մարել պայթումին հետեւանով ծագած  բոցը: Պայթումէն  ժամեր ետք, Կարմիր Խաչը պաշտօնապէս  յայտարարեց, թէ  պայթումին պաշտօնական հաշուեկշիռը՝  21  սպաննեալ,  125-է աւելի  վիրաւոր:

 «Ալ Մանար» հեռատեսիլի կայանը հաղորդեց, թէ  կասկածներ կան, որ պայթումը կրնայ  ըլլալ անձնասպանական  գործողութեան  հետեւանք:

Հըզպալլայի պատասխանատուներ  հերքեցին պայթումին  թիրախը անձնաւորութիւն մը  ըլլալու մասին  տեղեկութիւնները:

 Հանրապետութեան նախագահ Միշէլ Սըլէյման դատապարտեց հարաւային արուարձաններու պայթումը, զայն նկատելով անմեղներու արեամբ  պատգամներ փոխանցելու  անհեթեթ արարք մը: Լիբանանեան բանակը  յայտարարեց, թէ  Ռուէյսի  պայթումը ականահարուած ինքնաշարժի  հետեւանք է: Հրաժարեալ  վարչապետ  Նեժիպ Միքաթի  Ազգային Սուգ յայտարարեց  Ուրբաթ օր  եւ ժողովի հրաւիրեց պաշտպանութեան  գերագոյն խորհուրդը:  Նորանշանակ  վարչապետ Թամամ Սալամ դատապարտելով  պայթումը, մաղթեց որ ազգային միասնականութիւնը յաղթահարէ  ապահովական կայունութիւնը  քայքայել փորձողներուն ծրագիրներըւ: Խորհրդարանի նախագահ Նեպիհ Պըրրի ըսաւ, թէ հարաւային արուարձաններու պայթումը կը  ծառայէ միայն  Իսրայէլի շահերուն: Ընկերվար  Յառաջդիմական Կուսակցութեան պետ Ուալիտ Ճոմպլաթ պահանջեց անվտանգութեան գրասենեակ մը  ստեղծել բանակին եւ Հըզպալլայի համագործակցութեամբ: «Անհրաժեշտ է  չէզոքութիւն պահել արտերկրի զարգացումներուն հանդէպ  եւ ազգային  միասնականութեան կառավարութիւն  կազմել, եթէ  կարենանք».յայտնեց Ճոմպլաթ:

Նշենք, թէ   մօտաւորապէս    քառասուն օրեր առաջ պայթում մը պատահեցաւ  Պիր Էլ Ապըտի մէջ, պատճառելով  նիւթական վնասներ:

LEAVE A REPLY

Please enter your comment!
Please enter your name here