ՄԱԿ՝ ԲՌՆՈՒԹԻՒՆԸ ԴԱԴՐԵՑՆԵԼՈՒ ԿՈՉ ՈՒՂՂԵՑ ԵԳԻՊՏՈՍԻ ՀԱԿԱՄԱՐՏՈՒԹԵԱՆ ԿՈՂՄԵՐՈՒՆ

0
106

Եգիպտոսի քաղաքական եւ  ապահովական  զարգացումները ուղղահայեաց  բաժանումի ենթարկած են  ժողովուրդը:  Հակամարտութեան  կողմերը անփոփոխ կը պահեն իրենց կեցուածքները:  Փոխհասկացութեան եզրեր  ստեղծելու  ճիգերն ու կոչերը  կը մնան ապարդիւն: Առողջապահութեան նախարարութեան  տուեալներով,  զոհերուն  թիւը բարձրացած է  681-ի: Վիրաւորները՝  4572: Պաշտօնէն   հեռացուած  նախագահ Մոհամմէտ Մորսիի կողմնակիցները կը  խոստանան շարունակել  նոր իշխանութիւններու դէմ  ըմբոստութիւնը:

ՄԱԿ-ի Ապահովութեան Խորհուրդ  դռնփակ  նիստ մը   գումարեց Եգիպտոսի   կացութեան  վերաբերեալ եւ բռնութիւնը դադրեցնելու   կոչ ուղղեց  հակամարտութեան երկու կողմերուն:  Միացեալ Նահանգներու նախագահ  Պարաք  Օպամա  դատապարտեց  Եգիպտոսի մէջ ուժի  գործածութիւնը:  Ան  յայտնեց, թէ   Ուաշինկթըն  հաւասար  հեռաւորութիւն կը պահէ  կողմերէն եւ պահանջեց   ջնջել  ստիպողական վիճակը: Օպամա նաեւ   ջնջեց  Եգիպտոսի հետ ամենամեայ  զօրավարժութիւնները: Սակայն  նախագահին  ելոյթէն  ժամեր ետք,  պաշտպանութեան նախարար Չաք Հէյկըլ իր եգիպտացի պաշտօնակիցին՝ Ապտէլ  Ֆաթահ Սիսիին յայտնեց, թէ  Ուաշինկթըն պիտի շարունակէ Գահիրէի հետ  զինուորական կապերը:

Եւրոպական  Միութիւնը նոյնպէս  դատապարտեց  Եգիպտոսի մէջ տեղի ունեցող  վայրագութիւնը: Եւրոպական Միութեան արտաքին գործոց  նախարարները որոշեցին  Շաբաթ  օր  յատուկ  նիստ մը  գումարել եւ  քննարկել  Եգիպտոսի  իրավիճակը:  

 Միւս կողէ, Ժամանակաւոր նախագահ Ատլի Մանսուր   ընդունեց   արտաքին  գործոց նախարար Մուհամմէտ Ալ Պարատէյի  հրաժարականը:Մանսուր  նաեւ խոստացաւ  վերակառուցել  ղպտի համայնքին պատկանող եկեղեցիները:

Եգիպտական իշխանութիւնները  ժամանակաւորապէս փակեցին  երկիրը Կազային  միացնող Ռաֆահի անցքը, իսկ ատեանը երեսուն  օրով երկարաձգեց տապալուած նախագահ Մոհամմէտ Մորսիի ձերբակալութիւնը:

Դիւանագիտական գետնի վրայ, Եգիպտոս եւ Թուրքիա փոխյարաբերութիւններուն մէջ արձանագրուեցաւ նոր մագլցում:  Զոյգ պետութիւնները տուն կանչեցին իրենց  դեսպանները:

Ապահովական  գետնի վրայ, Եգիպտոս  բոլորեց  բախումներով   լեցուն  օր մը: Իսլամական Եղբայրակցութեան հոգեւոր առաջնորդ   Մուհամմէտ Պատիյ  յայտարարե, թէ վճռած են շարունակելու   հաւաքները, մինչեւ  յեղաշրջումին  ջնջումը:

LEAVE A REPLY

Please enter your comment!
Please enter your name here