ՄԱԿ ԴԱՏԱՊԱՐՏԵՑ ՀԱՐԱՒԱՅԻՆ ԱՐՈՒԱՐՁԱՆՆԵՐՈՒ ՊԱՅԹՈՒՄԸ

0
106

ՄԱԿ-ի  Ապահովութեան Խորհուրդը  դատապարտեց  հարաւային արուարձաններուն  մէջ պատահած ահաբեկչական յարձակումը:  ՄԱԿ  պահանջեց  հետապնդել յանցագործները  եւ ատեանին յանձնել:  Արաբական Լիկայի  ընդհանուր քարտուղար Նեպիլ Ալ Արապի  դատապարտեց պայթումը, յայտնելով որ պայթումէն գլխաւոր օգտուողները  պիտի  ըլլան Լիբանանի թշնամիները: Բրիտանիոյ Միջին Արեւելքի հարցերու նախարար  Ալիսթըր Պըրթ դատապարտեց պայթումը,   ընդգծելով որ  ահաբեկչութիւնը եւ ծայրայեղականութիւնը  տեղ չունին Լիբանանի մէջ:  

Հանրապետութեան նախագահ Միշէլ Սըլէյման դատապարտեց հարաւային արուարձաններու պայթումը, զայն նկատելով անմեղներու արեամբ  պատգամներ փոխանցելու  անհեթեթ արարք մը: Սըլէյման  ըսաւ, թէ  պայթումին ետին կեցած է  Իսրայէլը:

 Լիբանանեան բանակը  յայտարարեց, թէ  Ռուէյսի  պայթումը կազմակերպուած էր  ականուած ինքնաշարժի  մը միջոցաւ: Հրաժարեալ  վարչապետ  Նեժիպ Միքաթի  Ազգային Սուգ յայտարարեց  Ուրբաթ օր  եւ ժողովի հրաւիրեց պաշտպանութեան  գերագոյն խորհուրդը:  Նորանշանակ  վարչապետ Թամամ Սալամ դատապարտելով  պայթումը, մաղթեց որ ազգային միասնականութիւնը յաղթահարէ  ապահովական կայունութիւնը  քայքայել փորձողներու ծրագիրներուն: Խորհրդարանի նախագահ Նեպիհ Պըրրի ըսաւ, թէ հարաւային արուարձաններու պայթումը կը  ծառայէ միայն  Իսրայէլի շահերուն: Ընկերվար  Յառաջդիմական Կուսակցութեան պետ Ուալիտ Ճոմպլաթ պահանջեց անվտանգութեան գրասենեակ մը  ստեղծել բանակին եւ Հըզպալլայի համագործակցութեամբ: «Անհրաժեշտ է  չէզոքութիւն պահել արտերկրի զարգացումներուն հանդէպ  եւ ազգային  միասնականութեան կառավարութիւն  կազմել, եթէ  կարենանք».յայտնեց Ճոմպլաթ: Նախկին վարչապետ Սաատ Հարիրի   հեռաձայնային հաղորդակցութիւն մը ունեցաւ Նեպիհ Պըրրիի հետ  եւ ցաւակցութիւն յայտնեց  զոհերու  ընտանիքներուն:

LEAVE A REPLY

Please enter your comment!
Please enter your name here