ՊԱՐԶԱՆԻ ՀԵՏԱՔՆՆՈՒԹԻՒՆ ՎԱՐՈՂ ՊԱՏՈՒԻՐԱԿՈՒԹԻՒՆ Կ’ՈՒՂԱՐԿԷ ՀԻՒՍԻՍԱՅԻՆ ՍՈՒՐԻԱ

0
115

Թրքական «Զաման» թերթը կը հաղորդէ, որ հիւսիսային Իրաքի Քիւրտիստանի շրջանային կառավարութեան նախագահ Մասուտ Պարզանի խումբ մը ներկայացուցիչներ ուղարկած է Սուրիա՝ հետաքննելու համար այն տեղեկութիւնները, թէ «Քայիտա»ի առնչուած զինեալ խմբաւորումներ Սուրիոյ մէջ քիւրտ բնակչութիւնը թիրախ կը դարձնեն:
Քրտական ազգային խորհրդաժողովի անդամ մը յայտնած է, որ պատուիրակութիւնը հաւանաբար այս մասին զեկուցում մը ներկայացնէ Օգոստոս 24-ին նախատեսուած Քրտական ազգային խորհրդաժողովին:
Պարզանի պահանջած է ստուգել մամլոյ այն տեղեկութիւնները, թէ քիւրտ քաղաքայիններ Սուրիոյ մէջ ահաբեկչական խմբաւորումներու կողմէ կանոնաւոր կերպով յարձակումներու կ՛ենթարկուին, որպէսզի, ի հարկին, կարելի ըլլայ անոնց ապահովութիւնը երաշխաւորելու նպատակով քայլերու դիմել:
Հիւսիսային Սուրիոյ մէջ գործող քրտական Ժողովրդավարական Միութիւն կուսակցութեան ղեկավար Սալեհ Մուսլիմ յայտնեց, որ քրտական շրջանները պաշտպանելու բաւարար ուժեր ունի եւ արտաքին ուժերէ օգնութեան կարիք չունի: «Եթէ քրտական այլ կուսակցութիւններ կ՛ուզեն օգնել, անոնք պէտք է մեզի զինամթերք, զէնքեր, սննդեղէն եւ հագուստներ ուղարկեն», ըսաւ Մուսլիմ:

 

LEAVE A REPLY

Please enter your comment!
Please enter your name here