24 ԶՈՀ, 336 ՎԻՐԱՒՈՐ՝ ՀԱՐԱՒԱՅԻՆ ԱՐՈՒԱՐՁԱՆՆԵՐՈՒ ՄԷՋ ԱԿԱՆՈՒԱԾ ԻՆՔՆԱՇԱՐԺԻ ՄԸ ՊԱՅԹՈՒՄԻՆ ՀԵՏԵՒԱՆՔՈՎ

0
108

 Խռովարարութեան  ձեռքերը կը  փորձեն  խանգարել Լիբանանի  քաղաքային  կայունութիւնը: Հինգշաբթի երեկոյեան, ժամը  6. 08-ին ականուած ինքնաշարժ մը պայթեցաւ հարաւային արուարձաններու Ռուէյս  շրջանի  «Սէյիտ  Ալ Շուհատէ» կեդրոնատեղիին մօտակայ վայրի մը  մէջ:  Պայթումը պատահեցաւ «Մահֆուզ Սթորզ» հագուստեղէնի  խանութին  եւ վառելանիւթի  կայանի մը  միջեւ գործող գլխաւոր ճանապարհին վրայ: Պայթումին բոցերը տարածուեցան բնակելի շէնքերուն ուղղութեամբ: 

Առողջապահութեան նախարարութիւնը    բոլոր հիւանդանոցներէն  պահանջեց անմիջական օգնութիւն ցուցաբերել  պայթումէն տուժած  քաղաքացիներուն: Քաղաքային պաշտպանութեան  միաւորներ անմիջապէս  փութացին   պայթումին  վայրը եւ  առաջնային  օգնութիւն հայթայթեցին վիրաւորներուն: Հրշէջներ փութացին  մարելու պայթումին հետեւանով ծագած  բոցերը:  Առողջապահութեան նախարարութիւնը  երէկ կէսօրին  յայտարարեց պայթումին հաշուեկշիռը՝  24 զոհ, 336 վիրաւոր:Այսուհանդերձ,   շատ հաւանական է, որ   զոհերու  թիւը աւելնայ յառաջիկայ ժամերուն, որովհետեւ պայթումին հետեւանքով կորսուածներու  ճակատագիրը կը մնայ անորոշ:

Անպաշտօն  աղբիւրներ կը յայտնեն, թէ  զետեղուած   ռումբը առնուազն  կը  կշռէր  վաթսուն քիլոկրամ:  «Ալ Մանար» հեռատեսիլի կայանը հաղորդեց, թէ  պայթումը կրնայ  ըլլալ անձնասպանական  գործողութեան  հետեւանք: Ապահովական  մարմիններ եւս յայտնեցին, թէ  անձնասպանական  գործողութեան  մը հետեւանք ըլլալու հաւանականութիւնները սկսած են աւելնալ: Այս՝ եւ ահաբեկչական գործողութիւնը իրականացնողին ինքնութեան  վերաբերեալ տարրալուծարանի քննութիւններուն արդիւնքը  պիտի  յայտարարուի այսօր՝ Շաբաթ:  Աւելի ուշ, «Ալ Մանար» հաղորդեց, թէ պայթումը կատարուած է  2002-ի մոտէլ՝   սեւ գոյնով, Պի.Էմ. Տապլիու. Մակնիշը կրող ինքնաշարժի մը  միջոցաւ:

Հըզպալլայի պատասխանատուներ  հերքեցին պայթումին  թիրախը անձնաւորութիւն մը  ըլլալու մասին  տեղեկութիւնները:

Նշենք, թէ   մօտաւորապէս    քառասուն օրեր առաջ պայթում մը պատահեցաւ  Պիր Էլ Ապըտի մէջ, պատճառելով  նիւթական վնասներ:

LEAVE A REPLY

Please enter your comment!
Please enter your name here