ԹՈՒՐՔԻՈՅ ԱՍՈՐԻՆԵՐՆ ԱԼ ՄԱՅՐԵՆԻ ԼԵԶՈՒՈՎ ՈՒՍՈՒՑՄԱՆ ԻՐԱՒՈՒՆՔ ՊԻՏԻ ՈՒՆԵՆԱՆ

0
140

Թրքական ատեան մը վերջապէս ասորիներուն արտօնեց  մայրենի լեզուով ուսուցման իրաւունք: Ասորի համայնքը կրթական նախարարութեան դիմում կատարած էր՝ խնդրելով, որ մայրենի լեզուով ուսուցման դպրոց բանալու իրաւունք տրուի իրենց եւս, ինչպէս տրուած է միւս փոքրամասնութիւններուն։ Բայց նախարարութիւնը այս դիմումը մերժած էր այն պատճառաբանութեամբ, որ ասորիները ընդունուած չեն որպէս փոքրամասնութիւն։ Այս մերժումէն ետք, ասորիները դիմած էին  դատարան։
Դատարանը գտաւ, թէ Լոզանի դաշնագիրին մէջ փոքրամասնութիւններուն անունները չեն ճշդուած. հոն խօսուած է միայն ոչ իսլամ համայնքներու մասին, ուստի ասորիները կրնան մաս կազմել այդ խմբակին եւ ունենալ մայրենի լեզուով դասաւանդող իրենց դպրոցները։
Ասորի համայնքի պետի տեղակալ Քենան Կիւրտալ յիշեցուց, որ ասորերէնը աշխարհի ամէնէն հին լեզուներէն մէկն է, սակայն անհետանալու վտանգին դէմ յանդիման կը գտնուի ներկայիս։ «Կ՛ուզենք, որ մեր տղաքը ասորերէն սորվին», ըսաւ ան։
Սամաթիոյ մէջ ասորիներու յատուկ չորս յարկանի շէնք դպրոցի պիտի վերածուի։ Ասորերէն դասաւանդելու կոչուած ուսուցիչները պիտի ընտրուին Մարտինի Արթուքլու համալսարանին մէջ ասորերէնի ամպիոնին հետեւած անձերէն։

 

LEAVE A REPLY

Please enter your comment!
Please enter your name here