ԹՐՔԱԼԵԶՈՒ ԵՐԿԻՐՆԵՐՈՒ ԳԵՐԱՍՏԻՃԱՆԻ ԵԶՐԱՓԱԿԻՉ ՀՌՉԱԿԱԳԻՐԸ «ԱՆԸՆԴՈՒՆԵԼԻ ԿԸ ԳՏՆԷ ԱՏՐՊԷՅՃԱՆԷՆ «ԲՌՆԱԳՐԱՒՈՒԱԾ» ՏԱՐԱԾՔՆԵՐԸ

0
118

Ղարաբաղեան հակամարտութեան կարգաւորումը զգալի յառաջընթաց պիտի ըլլայ Եւրասիոյ տարածութեան մէջ խաղաղութիւն, կայունութիւն եւ բարգաւաճում ապահովելու ջանքերուն մէջ, կ՛ըսուի Թրքալեզու պետութիւններու համագործակցութեան խորհուրդի 3-րդ գերաստիճանին ընթացքին վաւերացուած միացեալ հռչակագիրին մէջ:
Գերաստիճանին մասնակցեցան հիւրընկալ Ատրպէյճանի նախագահ Իլհամ Ալիեւ, Թուրքիոյ նախագահ Ապտուլլա Կիւլ, Ղրղզստանի նախագահ Ալմազպեկ Աթամպաեւ եւ Ղազախստանի նախագահ Նուրսուլթան Նազարպաեւ:
Հռչակագիրը նաեւ կը շեշտէ հայ-ատրպէյճանական հակամարտութեան կարգաւորում իրականացնել Ատրպէյճանի տարածքային ամբողջականութեան ծիրէն ներս՝ աւելցնելով, թէ Արցախի հակամարտութիւնը կը մնայ տարածաշրջանային համագործակցութեան եւ կայունութեան դիմաց կանգնած հիմնական խոչընդոտներէն մէկը:
Գերաստիճանին ընթացքին, Կիւլ յայտարարեց, որ թրքական աշխարհի բոլոր հարցերուն գլխաւորը Լեռնային Ղարաբաղի հիմնախնդիրն է՝ աւելցնելով, թէ Ատրպէյճանի «բռնագրաւուած տարածքներուն շուրջ ստեղծուած իրավիճակը անընդունելի է»:
Կիւլ նաեւ փափաք յայտնեց, որ Թրքալեզու պետութիւններու համագործակցութեան խորհուրդի ապագայ ժողովներէն մէկը կայանայ Լեռնային Ղարաբաղի մէջ:
Իր կարգին, Ալիեւ յայտարարեց, թէ 21-րդ դարը պէտք է դառնայ «թրքական աշխարհի դարաշրջան»: Ան աւելցուց, թէ տարածաշրջանի ապահովութիւնը երաշխաւորելու համար, «պէտք է մեր կարելին ընենք», նշելով, որ Ատրպէյճան երկար տարիներէ ի վեր զոհ դարձած է «հայկական յարձակողապաշտ քաղաքականութեան»:
Գերաստիճանի աւարտին, թրքալեզու պետութիւններու համագործակցութեան խորհուրդի նախագահութիւնը Ղրղզստանէն անցած է Ատրպէյճան:

LEAVE A REPLY

Please enter your comment!
Please enter your name here