ՆԱԽԱԳԱՀ ՍԸԼԷՅՄԱՆ ՊԱՀԱՆՋԵՑ ԱՒԵԼԻ ՀԵՏԵՒՈՂԱԿԱՆ ԸԼԼԱԼ ԱՊԱՀՈՎԱԿԱՆ ԿԱՅՈՒՆՈՒԹԵԱՆ

0
133

Հանրապետութեան նախագահ Միշէլ Սըլէյման յայտարարեց, թէ  հարաւային արուարձաններու մէջ պայթումին թիրախը  Լիբանանն է:  Նախագահը ապահովական բոլոր կառոյցներէն  պահանջեց  աչալրջութեամբ եւ աւելի հետեւողական  քայլերով  նախանձախնդիր  դառնալ երկրին անվտանգութեան:

 Ռուէյսի պայթումին շուրջ  հետաքննութիւնները տակաւին  չյանգեցան որեւէ եզրակացութեան:  Ապահովական  մարմիններու մօտ  ցարդ  անորոշ  կը մնայ  պայթումին  եղանակը:  Անոնց տեսակէտները կը տարուբերին  անձնասպանական գործողութեան եւ ականուած  ինքնաշարժի մը  պայթումին միջեւ: Երրորդ  վարկած մըն ալ՝ անհաւանական չի գտներ,  գործողութիւնը  անձամբ  ինքնաշարժով  իրականացնելու տարբերակը: Հաւաստի  տուեալներ կը յայտնեն, թէ պայթումին համար  օգտագործուած է  անծանօթ նիւթ մը: Նշենք, թէ պայթումը   բացած է  վաթսուն սանթիմեթր խորութեամբ եւ  երկու հարիւր քառասուն սանթիմեթր տրամագիծով    փոս մը: «Ալ Մանար» հեռատեսիլի կայանը հաղորդեց, թէ  չորս  դիակներու ինքնութիւնը կը մնայ անորոշ:

Լոնտոնի մէջ լոյս տեսնող «Ալ Հայեաթ» օրաթերթը իր տեղեկութիւնները ականատեսներէ քաղելով, կը գրէ  թէ  ականուած  ինքնաշարժը  շաբաթներ առաջ  տեսնուած է հարաւային արուարձաններուն  մէջ:  Սակայն ապահովական այլ  աղբիւրներ կը  նշեն, թէ ականուած  ինքնաշարժը  գողծուած է:  Անոնք կ’աւելցնեն, թէ  Հըզպալլա  ապահովական  խիստ  քայլերու դիմած է հարաւային արուարձաններու մէջ, որովհետեւ  շշուկներ կ’ըսեն, թէ   եօթ ականուած  ինքնաշարժներ մուտք գործած են  շրջանը:

LEAVE A REPLY

Please enter your comment!
Please enter your name here