Ս. Աստուածածինի Վերափոխման Տօնը` Պիքֆայայի Վանքին Մէջ. «Ս. Աստուածածինը Պէտք Է Մնայ Մայրութեան Յաւիտենական Տիպար» Պատգամեց Արամ Ա. Կաթողիկոս

0
122

Ս. Աստուածածինի վերափոխման տօնին առիթով, Շաբաթ, 17 Օգոստոս 2013-ին, երեկոյեան ժամը 8:00-ին, Պիքֆայայի Ս. Աստուածածին վանքի շրջափակին մէջ սուրբ եւ անմահ պատարագ մատուցուեցաւ` հանդիսապետութեամբ Մեծի Տանն Կիլիկիոյ Արամ Ա. կաթողիկոսին:

Վանքի շրջափակին մէջ բացօթեայ նորակառոյց խորանին վրայ պատարագեց Կորիւն արք. Պապեան: Պատարագի երգեցողութիւնը կատարուեցաւ «Շնորհալի» երգչախումբին կողմէ:

1952 թուականէն սկսեալ, երբ կառուցուած է կաթողիկոսարանի Պիքֆայայի հովոցի Ս. Աստուածածին մատուռը, կաթողիկոսութեան կողմէ Ս. Մարիամ Աստուածածինի վերափոխման տօնը հռչակուած է իբրեւ «Ուխտի օր»-ը Պիքֆայայի վանքին: Հաւատացեալ ժողովուրդը հաւատարմօրէն ամէն տարի մեծախումբ բազմութեամբ ներկայ կը գտնուի սուրբ պատարագին, խաղողօրհնէքին ու աւանդական մատաղի օրհնութեան:

«Հայր մեր»-էն անմիջապէս առաջ, վեհափառ հայրապետին հանդիսապետութեամբ տեղի ունեցաւ խաղողօրհնէքի եւ մատաղօրհնէքի աւանդական արարողութիւնը, երբ երկրի բերքին ու ժողովուրդի ուխտերուն ընծան նուիրուեցաւ Աստուծոյ` յատուկ աղօթքներու ճամբով: Ապա վեհափառ հայրապետը տուաւ իր հայրապետական պատգամը` ներկայ հազարաւոր ժողովուրդին: Բազմութեան մէջ մեծ էր թիւը յատկապէս երիտասարդներուն, որոնք յատուկ կապուածութեամբ ու երկիւղածութեամբ մասնակից դարձան ուխտի օրուան: Յայտնենք, որ պատարագը արբանեակային պատկերասփիւռի կայանով սփռուեցաւ աշխարհի բոլոր կողմերը:

Վեհափառ հայրապետը իր պատգամին սկիզբը անդրադարձաւ Ս. Մարիամ Աստուածածինի տիպարին եւ եկեղեցւոյ կեանքին մէջ անոր առանցքային ներկայութեան: Ապա վեհափառը, 2013 տարին «Հայ մօր տարի» հռչակած ըլլալուն, կոչ ուղղեց հայ մայրերուն, որպէսզի հետեւին Ս. Աստուածածինի օրինակին եւ դառնան տիպար մայրեր: Այս գծով վեհափառ հայրապետը ընդգծեց երեք կարեւոր կէտեր.

ա) Հայ մայրը` աղբիւր կրօնական, հոգեւոր ու ազգային արժէքներու:

բ) Հայ մայրը` առաքեալ մարդակերտումի ու հայակերտումի: Եւ

գ) Հայ մայրը` ապաւէն հայ ազգի յաւերժութեան:

Եզրափակելով իր խօսքը` Արամ Ա. կաթողիկոս իր աղօթքը բարձրացուց Աստուծոյ, խնդրելով հիւանդներու բժշկութիւն, գործոց յաջողութիւն, սուրիահայութեան ապահովութիւն, աշխարհին խաղաղութիւն, ուխտերու կատարում եւ հայ ազգին սէր միութիւն:

Մինչեւ ուշ գիշեր հաւատացեալները մնացին վանքին մէջ եւ Ս. Կոյսի վերափոխման խորհուրդով զօրացած ու իրենց հաւատքին մէջ ամրապնդուած վերադարձան իրենց տուները:

 

LEAVE A REPLY

Please enter your comment!
Please enter your name here