ԱՐԱՊԻ՝ ՍՈՒՐԻՈՅ ԻՐԱԴԱՐՁՈՒԹԻՒՆՆԵՐԸ ՄՈՍԿՈՒԱՅԻ ԵՒ ՈՒԱՇԻՆԿԹԸՆԻ ՄԻՋԵՒ ՊԱՂ ՊԱՏԵՐԱԶՄԻ ՆՈՐԱԳՈՅՆ ՏԱՐԲԵՐԱԿԸ

0
126

Արաբական  Լիկայի   ընդհանուր քարտուղար  Նեպիլ Ալ Արապի յայտնեց, թէ Ռուսիոյ եւ Միացեալ Նահանգներու միջեւ  Սուրիոյ  մէջ տեղի ունեցող իրադարձութիւնները,  « Պաղ պատերազմ»ի   նոր  տարբերակն է:

«Ռոյթըրզ» լրատուական գործակալութիւնը  հաղորդեց, թէ  ՄԱԿ-ի  Ապահովութեան  Խորհուրդը, Սուրիոյ մէջ   քիմիական զէնքի  գործածութեան կապակցութեամբ հետաքննութիւն վարելու  որոշում  չէ  կայացուցած,  գումարած  դռնփակ նիստին ընթացքին: ՄԱԿ-ի անդամ  երեսուն հինգ երկիրներ, ներառեալ՝  Միացեալ Նահանգներ,  Բրիտանիա եւ  Ֆրանսա՝ անյապաղ հետաքննութիւն  վարելու կոչ  ըրած են շուէտացի   փրոֆեսոր  Օլէ   Սելսթրոմին:  Ռուսիա  եւ  Չինաստան մերժած են ստորագրել  հետաքննիչ  յանձնախումբին  յղուած նամակը, պահանջելով  «մանրակրկիտ, արհեստավարժ  եւ  առարկայական  հետաքննութիւն»  մը բանալ տուեալ  հարցին շուրջ:

 Միւս  կողմէ,  ՄԱԿ-ի անդամ  բազմաթիւ  պետութիւններ կասկած յայտնած են սուրիական իշխանութիւններուն դէմ  բարձրացած ամբաստանութեան : Ուրիշներ  «ստոյգ» տեղեկութիւններ պահանջած են    միջադէպին վերաբերեալ: Վերջաւորութեան,  Ապահովութեան  Խորհուրդի անդամ պետութիւնները  պահանջած են  ճշմարտութիւնը   իմանալ քիմիական զէնքի  գործածութեան վերաբերեալ:  

Ֆրանսայի արտաքին գործոց նախարար  Լորան Ֆապիւս պահանջեց ուժի դիմել, եթէ  ապացուցուի, որ սուրիական  իշխանութիւնները իսկապէս   քիմիական  զէնք օգտագործած են   ընդդիմութեան դէմ: Թուրքիոյ արտաքին գործոց նախարար Ահմէտ Տաւուտօղլու ցաւ  յայտնեց, որ Ապահովութեան Խորհուրդը   որոշում  չէր կրցած ընդունիլ  քիմիական զէնքի գործածութեան առնչութեամբ:

Ռուսիոյ արտաքին գործոց նախարարութեան  խօսնակ Ալեքսանտր Լուկաշեւիչ յայտարարեց, թէ  քիմիական  նիւթեր  պարունակող  հրթիռը արձակուած էր  ընդդիմութեան հակակշիռին տակ գտնուող   շրջաններէն:

Միացեալ Նահանգներու  եւ Իսրայէլի պաշտպանութեան նախարարներ Չաք Հէյկըլ եւ Մոշէ Եաալոն   հեռախօսազրոյցի մը  ընթացքին քննարկեցին  Սուրիոյ մէջ ենթադրեալ քիմիական   նոր յարձակման մասին տուեալները, Եգիպտոսի  իրավիճակը եւ Իրանի միջուկային ծրագիրը: Երկու նախարարները  որոշեցին շարունակել իրենց երկխօսութիւնը:

Ռազմական գետնի վրայ, սուրիական բանակը  հռետանային հարուածի տակ առաւ Դամասկոսի մերձակայ  շրջանները:  Ռմբակոծումներուն  ընթացքին վիրաւորուեցան  հայ՝ մայր եւ  որդի Միրնա եւ Նազարէթ Թորոսեանները: Անոնք  անմիջապէս փոխադրուեցան հիւանդանոց:  Անոնց վիճակը կը մնայ կայուն:  Ծայրայեղականները դարձեալ ռմբակոծեցին  նախագահ Պաշշար Ասատի նստավայրին մօտակայ  շրջանները:

LEAVE A REPLY

Please enter your comment!
Please enter your name here