ԼԻԲԱՆԱՆԵԱՆ ԿԱՐՃ ԼՈՒՐԵՐ

0
135

 

–         Խորհրդարանի նախագահ  Նեպիհ Պըրրի Այն Էլ Թինէի մէջ ընդունեց  Լիբանանի մօտ  Ռուսիոյ դեսպան Ալեքսանտր Զասպիքինը եւ անոր հետ քննարկեց  լիբանանեան հարցեր, ինչպէս նաեւ Սուրիոյ իրավիճակը:

–         Լիբանանեան  բանակը Ռաս Պաալպէքի մէջ գրաւեց  Սուրիայէն  Ուատի Խալէտ «Կրատ»  տիպի  հրթիռներ փոխադրող   բեռնակառք մը: Անցնող  24  ժամերուն ընթացքին Ոատի Խալէտի լիբանանեան եւ սուրիական հատուածներուն միջեւ  տեղի ունեցան զինեալ բախումներ:

–         Բանակի ընդհանուր  հրամանատար, զօրավար  Ժան Քահուաճի ընդունեց հարաւային Մեթնի քաղաքապետութիւնները ներկայացնող պատուիրակութիւն մը:  Վերջիններս  իրենց երախտագիտութիւնը յայտնեցին ապահովական  կայունութիւնը պահպանելու  բանակին  ճիգերուն:

–         Ապահովական մարմիններ, Սայտայի, Պէյրութի եւ Պեքաայի  շրջաններուն  մէջ  ցարդ  բացայայտած են ութ ականուած ինքնաշարժներ:  Հետաքննութիւնները  բացայայտած են, թէ  միեւնոյն կազմակերպութիւնն է  հարաւային արուարձաններ արձակուած երկու հրթիռներուն, Նաամէի մէջ բացայայտուած ինքնաշարժին եւ  Պեքաայի մէջ  Հըզպալլայի   մէկ  շքախումբին դէմ   յարձակումները   իրականացնողը: 

–         Այն Հելու գաղթակայանին մէջ Ֆաթհ կազմակերպութեան  պատասխանատու  Մահէր Շապայթա հերքեց Ահմէտ Ասիրը  գաղթակայանին մէջ գտնուելու մասին տեղեկութիւնները:  Լիբանանեան բանակը ապահովական նոր քայլամիջոցներու դիմեց  Այն Հելու  գաղթակայան տանող ճանապարհներու  մուտքերուն  վրայ:

–         Բանակի  գաղտնի սպասարկութիւնը  յայտարարեց,թէ Համաս յանձնած է  բանակին պահանջած  երկու կասկածելիները, սակայն բանակը ներկայիս կը  պահանջէ   Ռաշիտիյէի   գաղթակայանին մէջ ապաստանած  այլ  յանցագործ  մը,որուն կը վերագրուի  հարաւային արուարձաններ արձակուած  երկու  հրթիռներուն պատասխանատուութիւնը: 

–         – Խորհրդարանի նախագահ Նեպիհ Պըրրի միացեալ  խառն նիստի հրաւիրեց խորհրդարանական  յանձնախումբերը,  յառաջիկայ Երեքշաբթի, 27 Օգոստոսին,:

–         Լիբանանեան բանակը  Տէր Ամարի  մէջ  գրաւեց  զէնք փոխադրող ինքնաշարժ մը, անոր վարորդը եւ  ընկերակցող մը:

–          Զինուորական ատեանի դատախազ   Ռիատ Ապու Ղիտա  հարցաքննութեան  ենթարկեց Տարայայի   միջադէպին  առիթով ձերբակալուած  վեց կասկածելիներ , ապա  ձերբակալութեան հրամանագիր արձակեց   բոլորին դէմ:

–         Յուլիս ամսուան ընթացքին,   Պէյրութի  միջազգային  օդակայան ժամանող եւ  մեկնող ուղեւորներուն թիւը  տաս առա հարիւրի  նուազում  մը արձանագրած է  անցեալ տարուան  միեւնոյն ամսուան հետ   համեմատած: Իսկ  սեփական եւ առեւտրական օդանաւներուն  շարժումը համապատասխանաբար  արձանագրած է   23 եւ 40  առ հարիւրի  նուազում մը:

 

LEAVE A REPLY

Please enter your comment!
Please enter your name here