ԻՍՐԱՅԷԼ ՊԱՏԱՍԽԱՆԵՑ ԼԻԲԱՆԱՆԷՆ ԱՐՁԱԿՈՒԱԾ ՀՐԹԻՌՆԵՐՈՒՆ

0
104

 Լիբանան պաշտօնական  բողոք  մը յղեց ՄԱԿ-ին՝  իսրայէլեան  օդուժին կողմէ  Նաամէի շրջանը  ռմբակոծելու  ոտնձգութեան դէմ:  Բողոքագիրին մէջ նշուած է, թէ սահմանային խախտումները անհրաժեշտ է լուծել ՖԻՒՆԻԼ-ի խաղաղապահ  ուժերու հետաքննիչ յանձնախումբին հովանաւորութեան տակ եւ ոչ՝  գերիշխանութեան  ոտնահարութեամբ:  Իսրայէլեան   հակադարձութիւնը կու գայ Հինգշաբթի օր, հարաւային   Լիբանանէն  հիւսիսային Իսրայէլի ուղղութեամբ առնուազն չորս «Քաթիուշա» տիպի հրթիռներ արձակուելու   պատճառով:  Արձակուած  հրթիռներուն հետեւանքով,  չորս  իսրայէլացիներ   փոխադրուեցան հիւանդանոց:  Իսրայէլեան բանակը  հաղորդեց, որ հրթիռարձակումին պատասխանատուն «Հըզպալլա»ն չէ, այլ՝ « Ալ Քայիտա»ի առնչակից խմբաւորում մը:

Իսրայէլեան պատասխանը չուշացաւ:  Ուրբաթ առաւօտեան, իսրայէլեան  օդանաւեր  ռմբակոծեցին Սայտայի  մօտակայ  Նաամէի  շրջանը: «Հաարէց» օրաթերթը  հաղորդեց, թէ  յարձակումը   կատարուած է   բարեյաջող եւ մասնակցող բոլոր  օդանաւները  անվնաս  վերադարձած են  ռազմախարիսխ:

Իսրայէլի պաշտպանութեան բանակը  հրապարակեց հաղորդագրութիւն մը , որուն մէջ  Լիբանանի իշխանութիւններուն վերագրեց յարձակումին պատասխանատուութիւնը: Իսկ անվտանգութեան նախարարութիւնը   զգուշացուց, որ  կրկնութեան պարագային, հակադարձութիւնը  աւելի արագ եւ խիստ պիտի  ըլլայ:  Լարուած այս մթնոլորտին լոյսին տակ, իսրայէլեան բանակը  հրահանգեց  մինչեւ Կիրակի եերկոյեան փակ պահել Հայֆայի  օդակայանը:

LEAVE A REPLY

Please enter your comment!
Please enter your name here