ԼԱՒՐՈՎ ԵՒ ՔԵՐՐԻ ԿԸ ՊԱՀԱՆՋԵՆ ԱՌԱՐԿԱՅԱԿԱՆ ԵՒ ԹԱՓԱՆՑԻԿ ՀԵՏԱՔՆՆՈՒԹԻՒՆ

0
105

Ռուսիոյ եւ  Միացեալ Նահանգներու արտաքին գործոց նախարարներ Սերկէյ Լաւրով եւ  Ճոն Քերրի,  հեռախօսային զրյոցի մը  ընթացքին քննարկեցին  քիմիական  զէնքի  գործածութեան կարելիութեան  մասին Սուրիոյ ընդդիմութեան  բողոքները:  Երկու կողմերը  համաձայնեցան առարկայական հետաքննութեան մը անհրաժեշտութիւնը եւ  սուրիական իշխանութիւններէն  պահանջեցին  դիւրացնել  այս ուղղութեամբՄԱԿ-ի հետաքննիչներու  ուսումնասիրութիւնները:  Կողմերը միաժամանակ Սուրիոյ ընդդիմութենէն պահանջեցին  կառուցողական քայլերու  դիմել՝ «Ժընեւ -2»  խորհրդաժողովին   յաջողութեան համար:

ՄԱԿ-ի ընդհանուր քարտուղար Պան Քի Մուն պաշտօնական  հայց  ուղարկեց Դամասկոսին՝  քիմիական զէնքի կիրառման  մասին  տեղեկութիւն քաղելու եւ շուտափոյթ   հետաքննութիւն   վարելու շուրջ:   Քի Մուն  նշեց, թէ  ՄԱԿ   ամբողջացուցած է  «Ժընեւ -2» խորհրդաժողովին   արհեստագիտական եւ  նիւթական բոլոր   նախապատրաստութիւնները: Ան  ընդգծեց, թէ միայն  ժամանակի  հարցն է, որ կը մնայ անորոշ:

 Միացեալ Նահանգներու պետական  քարտուղար  Ճոն Քերրի պատասխանելով  քիմիական զէնքի գործածաութեան  վերաբերեալ  Ուաշինկթընի կեցուածքին  յղուած  քննադատութիւններուն, յայտարարեց  թէ  Ուաշինկթըն բաւարար  ապացոյցներ չունի  տուեալ  հարցին վերաբերեալ:  Պետական քարտուղարութեան խօսնակ  Ճէն  Փսաքի նոյնպէս յայտնեց, թէ  ճիմիական զէնքի կիրառման մասին տեղեկութիւնները   չեն հաստատուած տակաւին: Արաբական Լիկայի եւ  ՄԱԿ-ի պատուիրակ Լախտար Իպրահիմի  յայտնեց, թէ   քիմիական զէնքի  գործածութեան վերաբերեալ ամբաստանութիւնները կրնան  արագացնել «Ժընեւ -2» խորհրդաժողովին թուականը:

Ռուսիա պաշտօանպէս յայտրարեց, թէ  քիմիական զէնքի  գործածութեան մասին սուրիական  իշխանութիւններու  հասցէին  ամբաստանութիւնը  նախապէս  ծրագրաւորուած  սենարիօ մըն էր    ծայրայեղականներուն կողմէ: Գետնի վրայ,   ծայրայեղականները  մերժեցին  ՄԱԿ-ի քննիչներուն մուտքը  կարգ մը  շրջաններ:

 Իրանի արտաքին գործոց նախարար  Մուհամմէտ Ճաուատ  Զարիֆ եւ  Ռուսիոյ արտաքին գործոց նախարար Սերկէյ Լաւրով  հեռաձայնային հաղորդակցութեան մը  ընթացքին, իրենց   մտահոգութիւնը յայտնեցին   վերջին շրջանին Սուրիոյ մէջ  վայրագութեան մագլցումէն:  Երկու նախարարները  շեշտեցին հակամարտութիւնը   քաղաքական ճանապարհով  լուծելու անհրաժեշտութիւնը:

Միւս կողմէ, Սուրիոյ նախագահ Պաշշար Ասատ  փոփոխութեան ենթարկեց  կառավարութեան կազմը, նշանակելով վեց նոր նախարար: 

Սուրիոյ հայաշատ  Նոր Գիւղի  շրջանը երէկ առաւօտեան դարձաւ    մեծ թիւով հրթիռներու թիրախը:  Հրթիռներէն  մէկը հարուածեց հայ  ընտանիքի մը բնակարանը, պատճառելով երկու վիրաւոր: Հաւաստի աղբիւներու համաձայն, հրթիռներ կ’արձակուին Հալէպի վիլաներու եւ Սուլէյմանիի թաղամասերու ուղղութեամբ:

LEAVE A REPLY

Please enter your comment!
Please enter your name here